ပြေလွင်မြင့်
(၁၀-၁၁-၂၀၁၆ )7 Day Daily သတင်းစာ၊စာမျက်နှာ-၇တွင်ဖော်ပြချက်အရ ကျွန်တော်ရရှိသော သတင်းအချက်အလက်မှာ အောက်ပါအတိုင်းဖြစ်ပါသည်။
ဆက်သွယ်ရေးဥပဒေပုဒ်မ ၆၆(ဃ) ဖြင့် လူတစ်ဦးတစ်ယောက်ကိုအရေးယူရန် တိုင်တန်းချက်အရ ရဲတပ်ဖွဲ့က ထိုသူ ကိုဖမ်းဆီးခဲ့သည်။ထို့နောက် ချုပ်မ်ိန့်(remand)တောင်းခံရန် မြို့နယ်တရားရုံးသို့ရုံးထုတ်ရာ စွပ်စွဲခံရသူအတွက် ရှေ့နေပါဝါ (ကိုယ်စားလှယ်စာ)တင်သွင်းခဲ့သည်။ယင်းကို ရီမန်ကာလအတွင်းရှေ့နေပါဝါလျှောက်ထားခွင့်မရှိ ဟူသော အကြောင်းပြချက် ဖြင့် တရားသူကြီးကပယ်ချခဲ့ကြောင်းသိရသည်-ဆိုသော အချက်ပဲဖြစ်သည်။
ယခု၊ ကျွန်တော်ဆွေးနွေးလိုသည်မှာ စွပ်စွဲခံရသူတစ်ဦးတစ်ယောက်ကို ရဲကဖမ်းဆီးပြီးနောက် ချုပ်မိန့် တောင်းခံရန် တရာရုံးရှေ့သို့တင်ပို့သည့်အချိန်တွင် ရှေ့နေဖြင့်ခုခံရန်ဆောင်ရွက်သည်ကို တရားရုံးက ငြင်းပယ်လိုက်ခြင်းမှာ မှန်ကန်မျှတ ခြင်းရှိမရှိဆိုသောအချက်ပဲဖြစ်ပါသည်။
××××××××××××××××××××××
ရာဇ၀တ်ကျင့်ထုံးဥပဒေပုဒ်မ ၃၄၀(၁) ပြဌာန်းချက်မှာ အောက်ပါအတိုင်းဖြစ်ပါသည်။
Any person accused of an offence before a criminal Court,or against whom procedings are instituted under this Code in any such Court, may of right be defended by apleader.
“ရာဇ၀တ်တရားရုံးတစ်ရုံးတွင် ပြစ်မှုတစ်ရပ်ဖြင့် အစွပ်စွဲခံရသူ မည်သူမဆို၊ သို့တည်းမဟုတ် -ဆိုခဲ့သည့်ရုံးတစ်ရုံးတွင် ဤကျင့်ထုံးဥပဒေအရ အမှုစွဲဆိုခြင်းခံရသူ မည်သူမဆို၊ ရှေ့နေဖြင့်ခုခံပိုင်ခွင့်ရှိသည်”
ချုပ်မိန့်ရီမန်ပေးမည့်မြို့နယ်တရားရုံး၊တရားသူကြီးက ရှေ့နေပါဝါကို လက်မခံဘဲ ငြင်းပယ်လိုက်ခြင်းမှာ စွပ်စွဲခံရသူ သည် တရားရုံး၌ “အမှုစွဲဆိုခြင်းခံရသူမဖြစ်သေး” ဟူသည့် ကောက်ယူချက်ကြောင့် ဖြစ်မည်ထင်ပါသည်။
ရာဇ၀တ်တရားသူကြီး၏အမိန့်၊ သို့မဟုတ် ၀ရမ်းမိန့်မပါရှိဘဲ တစ်ဦးတစ်ယောက်သောသူအား ရဲအရာရှိကဖမ်းဆီးနိုင်သည့်အကြောင်းအရာများကို ရာဇ၀တ်ကျင့်ထုံးဥပဒေ ပုဒ်မ-၅၄ မှ ၅၉ အထိတို့တွင်ဖော်ပြထားသည်။ သို့သော် ၀ရမ်းအမိန့်မပါ ဘဲ ဖမ်းဆီးထားသူတစ်ဦးကို ရဲအရာရှိက (သာမန်အားဖြင့်)၂၄နာရီထက်ပို၍ချုပ်နှောင်ခြင်းမပြုရန် ယင်းဥပဒေ ပုဒ်မ-၆၁ က တင်းတင်းကြပ်ကြပ် တားမြစ်ထားသည်။အခြေခံဥပဒေကလည်းခွင့်မပြုချေ။
သို့ဖြစ်၍၊၂၄နာရီအတွင်းမေးမြန်းစုံထောက်မှုပြီးစီးရန်လက္ခဏာမရှိလျှင်ဖြစ်စေ၊စွပ်စွဲချက်၊သို့မဟုတ်-သတင်းပေးချက် သည် ခိုင်လုံသည်-ဟုယုံကြည်ရန်အကြောင်းရှိလျှင်ဖြစ်စေ၊စွပ်စွဲခံရသူကို ရာဇ၀တ်တရားသူကြီးထံသို့ ချက်ခြင်းတင်ပို့ပေးရန် လည်း ရာဇ၀တ်ကျင့်ထုံးဥပဒေပုဒ်မ-၁၆၇ တွင် အတိအလင်းညွှန်ပြထားသည်။
ပြစ်မှုတစ်ရပ်ရပ်ဖြင့်စွပ်စွဲခံရသည့်တရားခံအား စီရင်ပိုင်ခွင့်အာဏာရှိသည့်တရားရုံးသို့တရားစွဲတင်ပို့ခြင်းမှာ ရာဇ၀တ် ကျင့်ထုံးဥပဒေပုဒ်မ-၁၇၀ အရဆောင်ရွက်ခြင်းဖြစ်သည်။စွပ်စွဲခံရသူကို ချုပ်မိန့်(remand)တောင်းခံရန် ရာဇ၀တ်တရားသူကြီး တစ်ဦးထံသို့တင်ပို့ခြင်းမှာ ပုဒ်မ၁၆၇ အရဆောင်ရွက်ခြင်းဖြစ်သည်။
သို့ဖြစ်ရာ၊ချုပ်မိန့်ရရှိရန်အတွက် ရာဇ၀တ်တရားသူကြီးထံ သို့ တင်ပို့ခံရသည့် စွပ်စွဲခံရသူသည် ပုဒ်မ-၃၄၀(၁)တွင်ဖော်ပြသည့် “အမှုစွဲဆိုခြင်းခံရသူ” ဟုတ်မဟုတ် ဆင်ခြင်ရန်ရှိပါသည်။
“ရဲက တရားခံအားချုပ်မိန့်ပေးရန်လျှောက်လွှာတစ်ခုသည် ဤဥပဒေအရပုဒ်မ ၁၆၇အတွင်း ကျရောက်သည် ဖြစ်ရာ ဤဥပဒေအရ “တရားရုံး၌စွဲဆိုသောအမှုအခင်း”ဖြစ်သည်ဟု ဆုံးဖြတ်ရမည်။ သို့ဖြစ်လေရာ ဖမ်းဆီးပြီး ၂၄နာရီ ကြာပြီးနောက် တရားခံသည် တရားရုံးရှေ့သို့ ရောက်သည့်အချိန်မှစ၍ ခုခံချေပခွင့်ရှိလာသည်။ ထို့ကြောင့် ရဲကတရားခံကို စွဲချက်ပြုလုပ်၍ တရားစွဲတင်ပို့သည်ဖြစ်စေ၊ မတင်ပို့ရသေးသည်ဖြစ်စေ၊ တရားခံ၏ တရားဝင်ကိုယ်စားလှယ်(ရှေ့နေ)အား တရားခံနှင့်တွေ့ဆုံ ခွင့်ပေးရမည်” ဟု(၅၀၊ဘုံဘေ၊စာ၇၄၁) တွင် ညွှန်ပြထားသည်။
“မည်သူမဆို ရာဇ၀တ်ရုံး၌ ပြစ်မှုတစ်ရပ်ဖြင့် အစွပ်စွဲခံရသည့်အချိန်၊သို့မဟုတ် ဆိုခဲ့သည့်ရုံးတစ်ရုံးတွင် ဤကျင့်ထုံး ဥပဒေအရ အမှုစွဲဆိုခြင်းခံရသည့်အချိန်တွင် ဤအခွင့်အရေးအစပြုသည်။
ပုဒ်မ ၁၆၇အရ ရီမန်(ချုပ်မိန့်)တောင်းခံသည့် လျှောက်လွှာကို ရဲအရာရှိကတင်သွင်းခြင်းသည် ဤကျင့်ထုံးဥပဒေအရ အမှုစွဲဆိုခြင်း ဖြစ်သည်။ ထိုသူမှာတရားခံဖြစ်၍တရားသူကြီးရှေ့သို့ရောက်လာခြင်းဖြစ်သည်။ ထို့ကြောင့် ထိုသူ ၂၄နာရီကြာ အဖမ်းထား ရပြီးနောက် တရားရုံးသို့ရောက်လာသည့်အချိန်တွင် ဤအခွင့်အရေးအစပြုပေသည်။သူ၏ရှေ့နေ လာရောက်နိုင် သည်။ချုပ်မိန့်ကို ကန့်ကွက်နိုင်သည်။ သို့မဟုတ်-သူ၏ကိုယ်စား အခြားလျှောက်ထားမှုတစ်စုံတစ်ရာပြုလုပ်နိုင်ပေသည်။
(Llewellyn Evans, 27 Criminal Law Journal.1169)
အဆိုပါစီရင်ထုံးနှင့်ဖွင့်ဆိုချက်ညွှန်ပြချက်တို့အရဆိုလျှင် စွပ်စွဲခံရသူ(တရားခံ)အား ပြစ်မှုတစ်ရပ်ရပ်ဖြင့် တရားရုံးသို့ ရာဇ၀တ်ကျင့်ထုံးဥပဒေပုဒ်မ-၁၇၀(၁)အရ တရားစွဲတင်သည့်အခါတွင်သာမက ရဲကဖမ်းဆီးထားသည့် စွပ်စွဲခံရသူ(တရားခံ) အား ချုပ်မိန့်(remand)တောင်းခံရန်အတွက် ရာဇ၀တ်တရားသူကြီးရှေ့သို့ ရာဇ၀တ်ကျင့်ထုံးဥပဒေ ပုဒ်မ-၁၆၇အ၇ တင်ပို့ သည့်အခါတွင်လည်း “အမှုစွဲဆိုခြင်းခံရသူ”အဖြစ် မှတ်ယူရမည်ဖြစ်ရာ ရာဇ၀တ်ကျင့်ထုံးဥပဒေပုဒ်မ ၃၄၀(၁)ပြဌာန်းချက်နှင့် အညီ “ရှေ့နေဖြင့်ခုခံပိုင်ခွင့်”ကို ရရှိပေလိမ့်မည်။
မြန်မာနိုင်ငံတရားရုံးများလက်စွဲအပိုဒ်၄၀၃(၁)တွင် ရာဇ၀တ်တရားသူကြီးရှေ့သို့တရားခံကိုမယူဆောင်ခဲ့သမျှ၊ ထို့ပြင် ရီမန်အမိန့်မပေးထိုက်ကြောင်း တရားခံကအကြောင်းပြခွင့်မရရှိသမျှ ရီမန်ပေးရန်အမိန့်ကိုချမှတ်ခြင်းမပြုနိုင်- ဟူ၍လည်း ဖော် ပြထားရာ ရီမန်အမိန့်မပေးထိုက်ကြောင်း“တရားခံ၏အကြောင်းပြချက်”ကို ရှေ့နေက ကိုယ်စားလှယ်ပါဝါ တင်သွင်း၍ဆောင် ရွက်ခြင်းအား ရာဇ၀တ်တရားသူကြီးက တားမြစ်နိုင်သည့်၊သို့မဟုတ်-ငြင်းပယ်နိုင်သည့်အခွင့်အာဏာမရှိ-ဟုဆိုရပေမည်။
စွပ်စွဲခံရသူအား ချုပ်မိန့်တောင်းသည့်အချိန်တွင် စွပ်စွဲခံရသူအတွက်ရှေ့နေပါဝါတင်သွင်းသည်ကို လက်ခံ၍ အဘယ် ကြောင့်ချုပ်မိန့်မပေးထိုက်ကြောင်းနှင့်အဘယ်ကြောင့်အာမခံရထိုက်ကြောင်းအကြောင်းပြချက်ကိုကြားနာရန်ဖြစ်ပြီး ရှေ့နေပါ ၀ါ တင်သွင်းသည်ကို ငြင်းပယ်လိုက်ခြင်းသည် ရာဇ၀တ်ကျင့်ထုံးဥပဒေပုဒ်မ ၃၄၀(၁)အရ “ရှေ့နေဖြင့်ခုခံပိုင်ခွင့်”ကိုငြင်းဆိုရာ ရောက်နိုင်သဖြင့် နောင်အခါဆင်ခြင်သင့်ကြောင်း အကြံပြုလိုက်ပါသည်။
××××××××××××××××××××××××
“ခင်ဗျားကို ကျွန်တော်ဖမ်းလိုက်ပြီ။ ခုအချိန်ကစပြီး ခင်ဗျားရဲ့ရှေ့နေကိုခေါ်နိုင်ပါတယ်”
ပြည်ပ၀တ္ထုနှင့်ရုပ်ရှင်ကားများ၌ မည်သို့သောပြစ်မှုဖြင့်စွပ်စွဲခံရသူကိုမဆို ရဲက တာဝန်အရ ဖမ်းဆီးသည့်အခါတိုင်း ထိုသို့ပြောလေ့ရှိပြီး ထိုသို့ပြောသည်ကို ကြားရသည့်အခါတိုင်းတွင်လည်း ရာဇ၀တ်ပြစ်မှုဖြင့်စွပ်စွဲခံရသူတစ်ဦး၏ ဥပဒေက ပေးအပ်ထားသည့်အခွင့်အရေးနှင့်ခုခံချေပခွင့်ကို အလေးထားသည့်စကားရပ်အဖြစ်ကျေနပ်မိပါသည်။
ဤသည်လည်း တရားဥပဒေစိုးမိုးမှု၏ကောင်းမွန်သည့် အမှတ်လက္ခဏာတစ်ခုဖြစ်တန်ရာပါသည်။
သဘောရိုးဖြင့် မှားယွင်းတတ်ပါသည်။
ဥပဒေကိုကိုင်တွယ်ကျင့်သုံး၍ တာဝန်ထမ်းရသူများ၏သောက၊ မောဟတို့ကို စာနာနားလည်ပါသည်။သို့ရာတွင် နှစ်ကာလများအတွင်း တရားစီရင်ရေးဆိုင်ရာလွတ်လပ်မှုနှင့်စပ်လျဉ်း၍
ပြင်းထန်သည့် ဝေဖန်ထိုးနှက်ချက်များကိုရင်ဆိုင်ခဲ့ရခြင်းနှင့် အခြားအကြောင်းများကြောင့် စိုးရိမ်ထိတ်လန့်မှုမကင်းသည့်တရားစီရင်မှုသန္ဓေသား ကို ထပ်မံ၍ မဖွံ့ဖြိုး မကြီးထွားစေလိုတော့ခြင်းမှာ ဤစာရေးသားခြင်း၏ အကြောင်းအရင်းတစ်ခုဖြစ်ပါသည်။
ပုံစံခွက်တစ်ခုထဲတွင် အရွတ်တက်နေသော တရားသူကြီးများကို မဆိုလိုပါ။ ပျိုရွယ်သော၊ ကြည်လင်နေဆဲဖြစ်သော တရားသူကြီးငယ်လတ်များအနေဖြင့် ပညာပြည့်အောင်လည်း အားထုတ်စေလိုပါသည်။နှလုံးလှအောင်လည်း သတိမူစေလိုပါ သည်။ “ပညာပြည့်ဝနှလုံးလှ”ပါမှ မဆုတ်မနစ်သောသတ္တိဖြင့် စီရင်ဆုံးဖြတ်နိုင်ပါမည်။
ပင်ပန်းလှပါပြီ။
တိုင်းသူပြည်သားတွေကို အမှန်တရားပြန်ပေးပါ-ဆိုသည်ကို ပြောပြဖို့မလိုတော့ဘူးထင်ပါသည်။
ပြေ လွင် မြင့်
