ပြန်လှန်စစ်မေးရာတွင် တားမြစ်ကန့်သတ်ထားသည့် အချက်များကို လေ့လာခြင်း (အပိုင်း-၃)
ပြန်လှန်စစ်မေးရာမှာ တားမြစ်ကန့်သတ်ထားတဲ့ အချက်များကို လေ့လာခဲ့ရာမှာ ယနေ့တော့ အဆုံးသတ်အဖြစ် အပိုင်း(၃)ကို တင်ပြပေးမှာ ဖြစ်ပါတယ်။ ပြန်လှန်စစ်မေးခြင်းအား ကျယ်ကျယ်ပြန့်ပြန့် မေးမြန်းခွင့် ရှိသော်လည်း၊ ပြန်လှန်မေးခွန်း မေးမြန်းကြရာမှာ တားမြစ်ကန့်သတ် ချက်တွေလည်း ရှိတယ် ဆိုတာကို သတိမူ ဂရုပြု လိုက်နာနိုင်ကြစေရန် နှင့် အမှုအခင်းများကို သက်သေခံ ဥပဒေနှင့် အညီ မှန်မှန်နှင့် မြန်မြန် စစ်ဆေး မေးမြန်းမှု ပြုနိုင်ကြစေရန် ရည်သန်လျက် တိုတိုနဲ့လိုရင်း စုစည်း ရေးသားပေး နေခြင်းပဲ ဖြစ်ပါ တယ်။ ပုဒ်မများအလိုက် လေ့လာကြည့်ကြရ အောင်ပါ။
* သက်သေခံဥပဒေ ပုဒ်မ ၁၃၉
----------------------------------တရားရုံး၌ အမှုအခင်းများ စစ်ဆေးစဉ်မှာ တစ်ဦးတစ်ယောက် သောသူရဲ့ လက်ဝယ်မှာ ရှိတဲ့ စာတမ်း အမှတ်အသား တစ်ခုခုကို တင်ပြစေဖို့ ဆင့်ဆိုခြင်းခံရသူဟာ ရုံးတော်မှ ဆင့်ဆိုတောင်းခေါ်တဲ့ စာတမ်းအမှတ် အသားကို တင်ပြရုံမျှနဲ့ သက်သေအဖြစ်သို့ မရောက်ရှိပါဘူး။ ထိုသူ့ကို သက်သေအဖြစ် တင်ပြခြင်းမျိုး မဟုတ်တဲ့ အတွက် ၎င်းအား ပြန်လှန်စစ်မေးခြင်း မပြုနိုင်ကြောင်း သက်သေခံ ဥပဒေ ပုဒ်မ ၁၃၉ က ကန့်သတ် ပြဋ္ဌာန်းထားတာကို တွေ့ရပါတယ်။
စာတမ်းအမှတ် အသားကို ဆင့်ဆိုခြင်း ခံရတဲ့သူဟာ တရားမမှုမှာ တရားမကျင့်ထုံး ဥပဒေ၊ အမိန့်-၁၆၊ နည်းဥပဒေ-၆ အရ လည်းကောင်း၊ ပြစ်မှုမှာ ပြစ်မှုဆိုင်ရာ ကျင့်ထုံးဥပဒေ ပုဒ်မ ၉၄(၂)အရ လည်းကောင်း ထိုစာမှတ်စာတမ်းကို မိမိကိုယ်တိုင် ရုံးသို့ လာရောက် တင်သွင်းရန် မလိုဘဲ၊ အခြားသူနဲ့ ကိုယ်စား တင်သွင်းရန် စေလွှတ်နိုင် ပါတယ်။ သက်သေခံ ဥပဒေ ပုဒ်မ ၁၃၉ အရ စာတမ်းအမှတ်အသား တင်သွင်းဖို့ ဆင့်ခေါ်ခံရ တဲ့သူဟာ အမှုမှာ သက်သေ ဖြစ်လာမည် မဟုတ်ပါ။ သက်သေ မဟုတ်တဲ့အတွက် သူ့ကို ပြန်လှန်စစ်မေးလို့လည်း ရမှာ မဟုတ်ပါဘူး။ ဒါပေမယ့် တစ်ခုမှတ်ရမှာက ထိုသူအား ကျမ်း (သို့မဟုတ်) ကတိသစ္စာ ပြုစေပြီး စာတမ်းအမှတ် အသားရှိ အချက်အလက် တွေကို မေးမြန်းမယ် ဆိုရင်တော့ ပြန်လှန်စစ်မေးခွင့် ရှိတယ်လို့ ဆရာ ဦးသက်ဖေရဲ့ သက်သေခံ ဥပဒေ စာအုပ်မှာ ရှင်းပြထားတာကို မှတ်သားထား သင့်ပါတယ်။
* သက်သေခံဥပဒေ ပုဒ်မ ၁၄၉
----------------------------------သက်သေခံဥပဒေ ပုဒ်မ ၁၄၈ မှာ ရည်ညွှန်း ဖော်ပြတဲ့ မေးခွန်းတွေကို မေးမြန်းသူဟာ ထိုမေးခွန်းမှာ ပါတဲ့ ရည်ညွှန်းသည့် စွပ်စွဲချက်မှာ အခြေအမြစ် ကောင်းစွာ ရှိတယ်လို့ သင့်တော်တဲ့ အကြောင်းယုတ္တိ မရှိရင် ထိုမေးခွန်းမျိုးကို မမေးသင့်ကြောင်း သက်သေခံ ဥပဒေ ပုဒ်မ ၁၄၉ မှာ ပြဋ္ဌာန်းပါရှိ ပါတယ်။ ပုဒ်မ ၁၄၈ မှာ ရည်ညွှန်းဖော်ပြ ထားတယ်ဆိုတဲ့ မေးခွန်းတွေကို ဆက်စပ်လေ့လာ ကြည့်မယ်ဆိုရင် __
(၁) မေးခွန်းတွေမှာ ပါတဲ့ ရည်ညွှန်းသည့် စွပ်စွဲချက် မှန်ကန်ပါက သက်သေ အစစ်ခံနေတဲ့ အကြောင်းအရာ နှင့်စပ်လျဉ်းလို့ ထိုသက်သေကို ယုံသင့်၊ မယုံသင့် တရားရုံးက စဉ်းစားဆင်ခြင် ရာမှာ များစွာ ထိခိုက်စေမယ်ဆိုရင် ထိုသို့သော မေးခွန်းတွေဟာ မေးထိုက်သော မေးခွန်းများဖြစ်ကြောင်း၊
(၂) စွပ်စွဲချက်သည် အချိန်ကာလ ကြာမြင့်စွာက ဖြစ်ပျက်ခဲ့တဲ့ အကြောင်းအရာတွေ ဖြစ်လို့ပဲ ဖြစ်ဖြစ်၊ ထိုစွပ်စွဲချက် မှန်ကန်လျှင်လည်း သက်သေ ထွက်ဆိုတဲ့ အကြောင်းအရာနဲ့ စပ်လျဉ်းလို့ ထိုသက်သေကို ယုံသင့်၊ မယုံသင့် တရားရုံးက စဉ်းစားဆင်ခြင် ရာမှာ ထိခိုက်စေခြင်း မရှိလျှင် (သို့မဟုတ်) အနည်းငယ်မျှသာ ထိခိုက်စေမည် ဖြစ်လျှင် ထိုသို့သော မေးခွန်းတွေကတော့ မေးသင့်သော မေးခွန်း မဟုတ်ကြောင်း၊
(၃) သက်သေရဲ့ အကျင့်စာရိတ္တကို ထိပါးစေတဲ့ စွပ်စွဲချက်ရဲ့ အရေးပါမှုနဲ့ သက်သေခံချက် တို့ရဲ့ အရေးပါမှုတို့မှာ မမျှမတအောင် ကွာခြားနေရင်လည်း ထိုသို့သော မေးခွန်းတွေကလည်း မေးသင့်သော မေးခွန်း မဟုတ်ကြောင်း၊
(၄) မေးခွန်းကို မဖြေဆိုလိုကြောင်း သက်သေက ငြင်းဆိုလျှင် တရားရုံးက ထိုငြင်းဆိုချက်ကို ထောက်ရှုလျက် မေးခွန်းကို ဖြေဆိုခဲ့သော် ထိုသက်သေအတွက် အကျိုးယုတ်ရန် ရှိတယ်လို့ ကောက်ယူသင့်တယ် ထင်မြင်ရင် ထိုသို့ ကောက်ယူနိုင်ကြောင်း လေ့လာ တွေ့ရှိရပါတယ်။
(ပြန်လည်ခြုံငုံ ပြောရရင် အထက်ပါအချက် (၄)ချက်မှာ ရည်ညွှန်းဖော်ပြ မေးမြန်းတဲ့ စွပ်စွဲချက်ပါသော မေးခွန်းမျိုးဟာ အခြေအမြစ် ရှိကြောင်း သင့်တော်တဲ့ အကြောင်းယုတ္တိ မရှိဘူးဆိုလျှင် အထက်ပါ မေးခွန်းမျိုးကို မမေးဖို့ သက်သေခံ ဥပဒေ ပုဒ်မ ၁၄၉ က ကန့်သတ်ထားကြောင်း ဆိုလိုရင်း ဖြစ်ပါတယ်။)
ဥပမာအားဖြင့် __ ရှေ့နေသည် သူ့အမှုသည်က သက်သေမှာ ဓားပြ ဖြစ်တယ်လို့ ပြောကြားခဲ့လျှင် သော်လည်းကောင်း၊ တရားရုံးမှာ ရှေ့နေကို လူတစ်ယောက်က - အရေးကြီးတဲ့ သက်သေမှာ ဓားပြ ဖြစ်တယ်လို့ ကျေနပ်လောက်သော အကြောင်းနဲ့ ပြောပြခဲ့လျှင် သော်လည်းကောင်း သက်သေအား ဓားပြ ဟုတ်၊မဟုတ် မေးမြန်းရန် သင့်လျော်သော အကြောင်းတွေပဲ ဖြစ်ပါတယ်။ ဒါပေမယ့်လို့ သက်သေရဲ့ အကြောင်းကို မည်သို့မျှ မသိဘဲလျက် ဓားပြ ဟုတ်၊မဟုတ် ရော်ရမ်းမှန်းဆပြီး မေးမြန်းရန် သင့်မှာ မဟုတ်ပါဘူး။ ဒါပေမယ့် ထိုသက်သေရဲ့ နေထိုင်မှု အခြေအနေနဲ့ အသက်မွေး ၀မ်းကြောင်းမှုကို မေးမြန်းရာမှာ သူက ကျေနပ်ဖွယ် မရှိတဲ့ အဖြေကို ပေးခဲ့ရင်တော့ ဆိုခဲ့ပြီးသလို မေးမြန်းရန် သင့်လျော်တဲ့ အကြောင်း ဖြစ်လာမှာ ဖြစ်ပါတယ်။
သတိချပ်ရမှာက သက်သေခံ ဥပဒေ ပုဒ်မ ၁၅၀ အရ သင့်လျော်တဲ့ အကြောင်းယုတ္တိ မရှိပါဘဲလျက် ရှေ့နေက မေးမြန်းခဲ့တယ်လို့ တရားရုံးက ထင်မြင်ယူဆလျှင် တရားရုံးက ၎င်းအမှုရဲ့ အခြေအနေကို ပြည်ထောင်စု တရားလွှတ်တော်ချုပ် သို့ဖြစ်စေ၊ ထိုရှေ့နေအပေါ် အာဏာပိုင်သူ ထံသို့ဖြစ်စေ တိုင်ကြားနိုင်တာမို့ အထူးချင့်ချိန်ပြီး မေးမြန်းဖို့ လိုအပ်မှာ ဖြစ်ပါတယ်။
* သက်သေခံဥပဒေ ပုဒ်မ ၁၅၁
----------------------------------သင့်တင့် လျောက်ပတ်ခြင်း မရှိ၊ မဖွယ်မရာ ဖြစ်သည်၊ အသရေကို ထိခိုက်စေသည်၊ အရှက်တကွဲ အကျိုးနည်း ဖြစ်စေမည်ဟု တရားရုံးက ထင်မြင်သော မေးခွန်း (သို့မဟုတ်) စုံစမ်း စစ်ဆေးချက်သည် တရားရုံး ရှေ့မှောက်ရှိ ပြဿနာများနဲ့ အနည်းငယ်မျှ သက်ဆိုင်စေကာမူ အငြင်းဖြစ်သည့် အကြောင်းခြင်းရာများ နှင့်သော်လည်းကောင်း၊ အငြင်းဖြစ်သည့် အကြောင်းအရာများ တည်ရှိ၊မရှိကို ချင့်ချိန် ဆုံးဖြတ်နိုင်ရန် လိုအပ်သော အကြောင်းခြင်းရာနှင့် ပတ်သက်ခြင်း မရှိလျှင် ယင်းမေးခွန်း (သို့မဟုတ်) စုံစမ်း စစ်ဆေးချက်များကို မေးမြန်း စစ်ဆေးခြင်း မပြုရန် တရားရုံးက တားမြစ် နိုင်ကြောင်း သက်သေခံဥပဒေ ပုဒ်မ ၁၅၁ မှာ ပြဋ္ဌာန်းထားပါတယ်။
သို့သော်လည်း မုဒိန်းမှု၊ မယားခိုးမှု၊ လင်မယား ကွာလိုမှု စတဲ့ အမှုမျိုးမှာ မေးမြန်းရတဲ့ မေးခွန်းတွေဟာ အရှက်တကွဲ အကျိုးနည်းစေရန် အကြောင်း ရှိနိုင်လင့်ကစား၊ အမှုမှာ အငြင်းထွက် အကြောင်းခြင်းရာများ (facts in issue) နဲ့ ပတ်သက်နေတာ ဖြစ်တဲ့အတွက် မေးမြန်းခွင့် ရှိမှာ ဖြစ်ပါတယ်။ မေးမြန်းခွင့်မပြုတဲ့ မေးခွန်းကို တရားရုံးက မှတ်တမ်းတင် ရေးမှတ်ထားရမှာ ဖြစ်ပြီး၊ ဘာကြောင့် ထိုမေးခွန်း ကို မေးမြန်းခွင့် မပြုရကြောင်းကိုလည်း ရေးမှတ်ထားရန် လိုအပ်မှာ ဖြစ်ပါတယ်။ သို့မှသာ အယူခံ/ပြင်ဆင် ရုံးက မူလရုံးရဲ့ အမိန် မှန်၊ မမှန်ကို စိစစ် ချင့်ချိန်နိုင်မှာ ဖြစ်လို့ပါပဲ။
* သက်သေခံဥပဒေ ပုဒ်မ ၁၅၂
----------------------------------စော်ကားရန်၊ စိတ်ငြိုငြင်စေရန် ရည်ရွယ် မေးမြန်းတဲ့ မေးခွန်း ဖြစ်တယ်လို့ တရားရုံးက ထင်မြင်တဲ့ မေးခွန်း (သို့မဟုတ်) သင့်တော်သော မေးခွန်းပင် ဖြစ်သော်လည်း အကြောင်းမဲ့ ပုတ်ခတ်ခြင်း၊ မခံချင် ဖြစ်စေခြင်း၊ နာကြည်းစေခြင်း ဖြစ်စေတဲ့ မေးခွန်းမျိုးကို တရားရုံးက တားမြစ်ရမယ်လို့ သက်သေခံ ဥပဒေ ပုဒ်မ ၁၅၂ မှာ ပြဋ္ဌာန်း ပါရှိပါတယ်။ သက်သေတွေဟာ အမှန်တရား ပေါ်ပေါက်ရေး အတွက် တရားရုံးသို့ လာရောက် ကူညီရသူများ ဖြစ်ကြ၍ အမှုသည်နှင့် ရှေ့နေတို့ရဲ့ စော်ကားမှု၊ စိတ်ငြိုငြင်အောင် ပြုမူ ပြောဆိုမှု တွေကို တရားရုံးက အကာအကွယ် ပေးရန် တာဝန်ရှိမှာ ဖြစ်ပါတယ်။
ပြန်လှန်စစ်မေးရာတွင် တားမြစ်ကန့်သတ်ထားသည့် အချက်များ ပါဝင်သော သက်သေခံ ဥပဒေ ပုဒ်မ ၅၆၊ ၅၇၊ ၁၂၂၊ ၁၂၃၊ ၁၂၄၊ ၁၂၅၊ ၁၂၆၊ ၁၃၉၊ ၁၄၉၊ ၁၅၁၊ ၁၅၂ တို့ကို အပိုင်း(၃)ပိုင်း ခွဲခြား၍ လေ့လာဖတ်ရှု နိုင်ကြစေရန် စုစည်း တင်ပြခဲ့ပြီ ဖြစ်ပါတယ်။ အမှားကြာ အမှန်ဖြစ်၊ တစ်ရုံး တစ်ထုံး ဆိုတာမျိုး မဖြစ်စေဖို့ သက်သေခံ ဥပဒေပါ သိမှတ် လိုက်နာရမည့် တားမြစ် ကန့်သတ်ချက် များကို တစ်စုတစ်စည်းထဲ ဖြစ်အောင် တင်ပြခဲ့ရာမှာ အားနည်းချက်များ၊ လိုအပ်ချက်များ၊ မလျော်ကန်သည်များ ရှိခဲ့ပါလျှင် နားလည် ခွင့်လွှတ်ပေး ကြပါမည့် အကြောင်းနဲ့ သွန်သင်လမ်းပြမှု ပြုပေးကြပါမည့် အကြောင်း မေတ္တာရပ်ခံ အပ်ပါတယ်ခင်ဗျ။
မိမိတို့ ဥပဒေ လောကသားများဟာ မွန်မြတ်တဲ့ ဥပဒေ ပညာရပ်နဲ့ အသက်မွေး ၀မ်းကျောင်းနေကြ သူများ ဖြစ်ကြတဲ့ အားလျော်စွာ အမှန်တရား ချိန်ခွင်ညီညာ မျှစေဖို့ ဥာဏ်ပညာ ဓါးလက်နက်နဲ့ မကောင်းသူ ပယ်၊ ကောင်းသူ ကယ်ကာ လောကပါလ တရားများ အစဉ်ရှင်သန် ထွန်းကားစေဖို့ အကျိုးတော် ဆောင်ပေးကြရမှာ ဖြစ်ပါတယ်။ အမှား ကွယ်ပျောက်၊ အမှန် ရောက်ဖို့ ရည်တူစေတနာ များနဲ့ ဥပဒေ ဘက်တော်သားများ အချင်းချင်း ဖေးမ၀န်းရံကာ အပြုသဘောဆောင် ထိန်းကျောင်း ပဲ့ပြင်ပေးကြရင်းမှ ဖြောင့်မတ် မှန်ကန်သော တရားစီရင်ရေး စနစ်ဆီသို့ ဦးတည် လှမ်းကြပါစို့လို့ လေးစားစွာ တိုက်တွန်း လိုက်ရပါတယ်။
ပညာ ဥာဏ်ရောင် ထွန်းလင်းပြောင်၍ ကောင်းကျိုး ကိုယ်၌ တည်ကြပါစေ။
လွှမ်းမိုးအောင် (တရားရေး)
