တရားမမှုများမှ ရုံးခေါ်သက်သေ နှင့် ပြန်ခေါ်သက်သေ အကြောင်း
အရင်ရက်တွေက သက်သေအမျိုးမျိုး အကြောင်းကို အလျဉ်းသင့်သလို တင်ပြခဲ့ပါတယ်။ ဒီနေ့လည်း တင်ပြရန် ကျန်ရှိနေသေးတဲ့ - တရားမမှုတွေမှာ ရုံးခေါ်သက်သေ ဆင့်ခေါ်စစ်ဆေးပိုင်ခွင့် နဲ့ ပြန်ခေါ်သက်သေ အဖြစ် ခေါ်ယူစစ်ဆေး ပိုင်ခွင့်ဆိုင်ရာ ဥပဒေဗဟုသုတ များကိုလည်း ဆက်လက်ပြီး ပြန်လည်မျှဝေ ပေးသွားမှာ ဖြစ်ပါတယ်။ လေ့လာမှတ်သား သိရှိထားသင့်တဲ့ ဥပဒေရေးရာ ဗဟုသုတ ဖြစ်တာမို့ မျှဝေပေးရခြင်းလည်း ဖြစ်ပါတယ်။
* ရုံး ခေါ် သက် သေ
ပြစ်မှုဆိုင်ရာ အမှုတွေမှာ ပြစ်မှုဆိုင်ရာ ကျင့်ထုံးဥပဒေ ပုဒ်မ ၅၄၀ အရ ရုံးခေါ်သက်သေအဖြစ် တရားရုံး၏ ဆင်ခြင်တုံတရား နှင့်အညီ ခေါ်ယူစစ်ဆေး ပိုင်ခွင့် ရှိသလိုမျိုးပါပဲ၊ တရားမမှုတွေမှာလည်း ရုံးခေါ်သက်သေ ခေါ်ယူစစ်ဆေး ပိုင်ခွင့်ရှိကြောင်းကို တရားမကျင့်ထုံး ဥပဒေ အမိန့် ၁၆၊ နည်းဥပဒေ ၁၄ မှာ အောက်ပါအတိုင်း အတိအလင်း ပြဋ္ဌာန်းထားပါတယ်။"တရားရုံးသို့ လာရောက်ခြင်း၊ ရောက်ရှိခြင်းတို့နှင့် စပ်လျဉ်းသည့် တရားမကျင့်ထုံး ဥပဒေပါ ပြဋ္ဌာန်းချက်များ နှင့်လည်းကောင်း၊ တည်ဆဲဥပဒေ တစ်ရပ်ရပ်နှင့် လည်းကောင်း မဆန့်ကျင်စေဘဲ တရားရုံးသည် အမှုတွင် အမှုသည်တစ်ဦး မဟုတ်သော၊ ထို့ပြင် အမှုသည်တစ်ဦးက သက်သေအဖြစ် ခေါ်ယူခြင်းလည်း မပြုသော သူတစ်ဦးဦးကို စစ်ဆေးရန် လိုအပ်သည်ဟု မည်သည့်အခါမဆို ထင်မြင်လျှင် ချိန်းဆိုသော ရက်တွင် သက်သေခံရန်ဖြစ်စေ၊ ထိုသူ၏ လက်ဝယ်ရှိသော စာချုပ်စာတမ်း တစ်ခုခုကို တင်ပြရန် ဖြစ်စေ မိမိသဘောအလျောက် ထိုသူကို သက်သေအဖြစ် ဆင့်ခေါ်စေနိုင်သည့်အပြင်၊ ထိုသူကို သက်သေအဖြစ် စစ်မေးခြင်း သော်လည်းကောင်း၊ အဆိုပါ စာချုပ်စာတမ်းကို တင်ပြစေခြင်း သော်လည်းကောင်း ပြုနိုင်သည်။"
ဒီနည်းဥပဒေအရ တရားရုံးက ဘယ်အဆင့်မှာမဆို အမှုသည်လည်း မဟုတ်၊ သက်သေလည်း မဟုတ်သူ တစ်ဦးဦးကို အမှုအတွက် ခေါ်ယူစစ်ဆေးဖို့ လိုအပ်မယ်လို့ ထင်မြင်ရင် ရုံးခေါ်သက်သေအဖြစ် ဆင့်ခေါ်ပြီး စစ်ဆေးခြင်း ပြုနိုင်ကြောင်း နဲ့ ထိုသူ့ လက်ဝယ်မှာရှိတဲ့ စာချုပ်စာတမ်း တစ်ရပ်ရပ်ကိုလည်း တင်ပြစေဖို့ ဆင့်ခေါ်တင်ပြစေခြင်းမျိုး ပြုနိုင်တယ်ဆိုတာကို လေ့လာတွေ့ရှိရမှာ ဖြစ်ပါတယ်။ ဒီနည်းဥပဒေ အရ တရားရုံးတွေကို အပ်နှင်းထားတဲ့ အာဏာမှာ ဆင်ခြင်တုံတရားဖြင့် ကျင့်သုံးရမည့် အာဏာ ( Discretionary Power ) ဖြစ်ကြောင်း၊ Discretion ဆိုရာမှာ တရားစီရင်ထုံးများ အတိုင်း လိုက်နာ ဆုံးဖြတ်ရတဲ့ ( Jusicial Discretion ) ကို ဆိုလိုခြင်း ဖြစ်ကြောင်း၊ အမှုသည်တစ်ဘက်က တမင်သက်သက် ရည်ရွယ်ချက်နဲ့ ဖြစ်စေ၊ ပေါ့လျော့မှုကြောင့် ဖြစ်စေ သက်သေတစ်ဦးအား စစ်ဆေးဖို့ ချန်ထားခြင်း/ ကျန်ရှိခြင်းတွေကို ကုစားနိုင်ရန်အတွက် ဒီအာဏာကို အသုံးမပြုနိုင်ကြောင်း Mulla ရေးသားတဲ့ The Court of Procedure မှာ ဖော်ပြပါရှိတယ်လို့ လေ့လာမှတ်သားရပါတယ်။
ဒီလို ရုံးခေါ် သက်သေအဖြစ် စစ်ဆေးရန် ဆင့်ခေါ်လျှင် အဆိုပါသက်သေဟာ ရုံးချိန်းရက်မှာ လာရောက်ရမှာ ဖြစ်ပြီး၊ စာချုပ်စာတမ်းကို တင်ပြစေရန် ဆင့်ခေါ်တာမျိုး ဆိုရင်တော့ ၄င်းသူကိုယ်တိုင် ဖြစ်စေ၊ အခြားသူ တစ်ဦးဦးကို ဖြစ်စေ စေလွှတ်ပြီး ထိုစာချုပ်စာတမ်းကို တင်ပြစေနိုင်တယ် ဆိုတဲ့အကြောင်းကိုလည်း တရားမကျင့်ထုံး ဥပဒေ အမိန့် ၁၆၊ နည်းဥပဒေ ၁၅ မှာ ဆက်လက် ပြဋ္ဌာန်းထားပါတယ်။
တရားရုံးများလက်စွဲ အပိုဒ် ၁၄၆ မှာ တရားရုံးက အမိန့် ၁၆၊ နည်းဥပဒေ ၁၄ အရ သက်သေကို ဆင့်ခေါ်တဲ့အခါ တရားရုံးသည် မည်သည့်အကျိုးငှာ ထိုသက်သေကို ဆင့်ခေါ်ကြောင်း ဆုံးဖြတ်ရမယ်လို့ ဆိုပါတယ်။ ဒါ့အပြင် အမိန့်ဆင့်စာ ထုတ်ဆင့်တဲ့အတွက် ဆင့်စာခနှင့် သက်သေစရိတ် များကို ထိုသူက ပေးစေရန် တရားရုံး၏ သဘောအတိုင်း တောင်းဆိုနိုင်တယ်လို့လည်း ပြဆိုထားတာကို တွေ့ရပါတယ်။ တရားရုံးချုပ်ရဲ့ စီရင်ချက် တစ်ခုကို လေ့လာနိုင်ဖို့ တင်ပြပေးလိုက်ပါတယ် __
* တရားရုံးက အချင်းဖြစ်ပစ္စည်းကို ကြည့်ရှုစစ်ဆေးပြီး လိုအပ်သည့် ပုဂ္ဂိုလ်တို့ကို ရုံးခေါ်သက်သေ အဖြစ် အမိန့် ၁၆၊ နည်းဥပဒေ ၁၄ အရ ခေါ်ယူစစ်ဆေးခွင့် ရှိသည်။ ထိုသို့ စစ်ဆေးခြင်းကို အမှုသည်တို့က ကန့်ကွက်ခွင့် မရှိ။ ( ဦးကျော်ဇော (ခ) ဦးတောဇော် နှင့် မစိုးရီ (ခ) မမြင့်မြင့်ခိုင် ပါ(၄)၊ တရားမ ပြင်ဆင်မှု အမှတ်- ၅၁၆/၁၉၉၂၊ (၂၈-၇-၁၉၉၃) )။
* ပြန် ခေါ် သက် သေ
ပြစ်မှုဆိုင်ရာ အမှုတွေမှာ စွဲချက်မတင်မီက စစ်ဆေးခဲ့ပြီးတဲ့ တရားလိုပြ သက်သေတွေကို ပြစ်မှုဆိုင်ရာ ကျင့်ထုံးဥပဒေ ပုဒ်မ ၂၅၆(၁)အရ ပြန်ခေါ်သက်သေအဖြစ် ပြန်လည်ခေါ်ယူ စစ်ဆေးနိုင်ခွင့် ရှိသလိုပဲ၊ တရားမမှုတွေမှာလည်း အမှုရဲ့ မည်သည့်အဆင့်မှာမဆို ပြန်ခေါ်သက်သေ ခေါ်ယူစစ်ဆေးခွင့် ရှိကြောင်း တရားမကျင့်ထုံး ဥပဒေ အမိန့် ၁၈၊ နည်းဥပဒေ ၁၇ မှာ အောက်ပါအတိုင်း ပြဋ္ဌာန်းထား ပါတယ် __"တရားရုံးသည် အမှု၏ မည်သည့်အဆင့်တွင်မဆို စစ်ဆေးပြီးသော သက်သေ တစ်ဦးဦးကို ပြန်ခေါ်၍ သင့်သည်ထင်မြင်သော မေးခွန်းများကို ၄င်းအား (သက်သေခံအက် ဥပဒေနှင့် မဆန့်ကျင်စေဘဲ) မေးမြန်းနိုင်သည်။"
ဒီနည်းဥပဒေအရ အပ်နှင်းထားတဲ့ အာဏာကို တရားရုံးက ၄င်း၏သဘောအလျောက် ( Suomotu or of its own montion ) ကျင့်သုံးနိုင်သကဲ့သို့ အမှုသည် တစ်ဦးဦးရဲ့ လျှောက်ထားချက် အရလည်း ကျင့်သုံးနိုင်ကြောင်း Mulla ရဲ့ The Code of Civil Procedure မှာ ရှင်းလင်းဖော်ပြ ပါရှိတယ်လို့ မှတ်သားရပါတယ်။
ဒီနည်းဥပဒေရဲ့ သဘောကို ဆရာကြီး ဦးမြ ရှင်းပြရာမှာ -- ဒီနည်းဥပဒေအရ လုပ်ပိုင်ခွင့်ဟာ ကျယ်ပြန့်လို့ တရားရုံးရဲ့ သဘောအတိုင်း ကျင့်သုံးရန် လုပ်ပိုင်ခွင့် ဖြစ်ကြောင်း၊ သို့ရာတွင် ထူးခြားတဲ့ အခြေအနေမျိုး မှာသာ ကျင့်သုံးရန် ဖြစ်ကြောင်း၊ တရားလိုက စစ်ဆေးသော သက်သေကို တရားရုံးရဲ့ ခွင့်ပြုချက်မရဘဲ တရားပြိုင်က ပြန်လည်ခေါ်ယူ စစ်ဆေးခြင်း မပြုနိုင်ကြောင်း၊ ပြန်ခေါ်သက်သေကို တရားရုံးက စစ်ဆေး မေးမြန်းနိုင်ကြောင်း၊ တရားရုံးရဲ့ မေးမြန်းချက်တွေနဲ့ စပ်လျဉ်းလို့ ရုံးခွင့်ပြုချက် မရဘဲ ပြန်လှန်စစ်မေးခွင့် မရှိကြောင်း ရှင်းပြထားတာကို တွေ့ရှိ မှတ်သားရပါတယ်။ စီရင်ထုံးတွေကိုလည်း ဆက်လက် လေ့လာကြည့်ကြရအောင်ပါ __
* အမိန့် ၁၈၊ နည်းဥပဒေ ၁၇ အရ တရားရုံးသည် အမှု၏ မည်သည့်အဆင့်၌မဆို စစ်ဆေးပြီး သက်သေကို ပြန်လည်ဆင့်ခေါ်ပြီး သင့်သည် ထင်မြင်သော မေးခွန်းများကို မေးမြန်းခွင့် ရှိသည်။ အမှုစစ် တရားရုံး၏ ဤစီရင်ပိုင်ခွင့်မှာ တရားရုံး၏ ဆင်ခြင်တုံတရားဖြင့် ကျင့်သုံးရသည့် စီရင်ပိုင်ခွင့် မျိုးဖြစ်ရာ ယင်းအမိန့်မှာ တရားမျှတမှု ဆိုင်ရာ ဆင်ခြင်သုံးသပ်မှုများက၊ သို့မဟုတ် ဥပဒေ ပြဋ္ဌာန်းချက် တစ်ရပ်ရပ်က ထောက်ခံခြင်း မရှိသည့် အမိန့် မဟုတ်လျှင် သော်လည်းကောင်း၊ မှန်ကန်အောင် တည့်မတ် မပေးသော်လည်း တရားမျှတမှု ကင်းမဲ့ခြင်း ဖြစ်ပေါ်စေမည် မဟုတ်လျှင် သော်လည်းကောင်း တရားလွှတ်တော် သည် ၄င်း၏ ပြင်ဆင်မှု အာဏာများကို ကျင့်သုံးမည် မဟုတ်ပေ။ ( အေ၊အက်စ်၊အေ မဂျစ် (ခ) ကိုလူ နှင့် ပီ၊အေ၊အယ်လ် အလာမဲလူး အချီး ၊ ၁၉၄၈၊ မတစ၊ စာ-၆၇၂) ။
* အမှုသည် တစ်ဘက်ဘက်က ပြန်ခေါ်သက်သေ အဖြစ် ခေါ်ယူ စစ်ဆေးပေးရန် တင်ပြ တောင်းဆိုချက် အပေါ်တွင်လည်း တရားရုံးက သဘောအလျောက် ဤလုပ်ပိုင်ခွင့်ကို ကျင့်သုံး နိုင်သည်။ ( မာဒူဘိုင် နှင့် အမ်သာလာ၊ ၁၉၄၇၊ ဘုံဘေ၊ စာ-၁၅၆) ။
တရားမမှုတွေမှာ ရုံးခေါ်သက်သေ နဲ့ ပြန်ခေါ်သက်သေ ခေါ်ယူစစ်ဆေးနိုင် ခွင့်ဆိုင်ရာများကို လေ့လာမှတ်သား မိသလောက် ပြန်လည်မျှဝေ ပေးခြင်းသာ ဖြစ်ပါတယ်။ ဥပဒေပညာကို လေ့လာလိုက်စား တန်ဖိုးထားကြသူတို့ အတွက် အနည်းငယ်မျှပင် အကျိုးဖြစ်ထွန်းမည် ဆိုပါလျှင် ကျွန်တော် လေ့လာရှာမှီး မျှဝေရကျိုး နပ်ပြီဟု ခံယူမိပါတယ်။ စာရေးခြင်းအပေါ် ၀ါသနာထုံလို့၊ (လုပ်ငန်းတာဝန်များ ကြားကပဲ) စာရေးသားနေရင်းက စာနဲ့ အမြဲမပြတ် ထိတွေ့ခွင့်ရနေ တဲ့အတွက် စာဖတ်သူ ညီအစ်ကို မောင်နှမများကို အစဉ် ကျေးဇူးတင်လျက် ရှိပါကြောင်း ဤနေရာမှ မှတ်တမ်းတင်အပ် ပါတယ် ခင်ဗျာ။
ပ ညာ ပြည့် ၀ ၊ နှ လုံး လှ ကြ ပါ စေ ။
လွှမ်းမိုးအောင် (တရားရေး)
