လွတ်ငြိမ်းချမ်းသာခွင့် ပေးခြင်းဆိုင်ရာ သိကောင်းစရာ
ပြစ်ဒဏ်မှ လွတ်ငြိမ်းချမ်းသာခွင့်ဟာ ကာလ၊ ဒေသအလိုက် အခေါ်အဝေါ် အသုံးအနှုန်း ကွဲပြားမှု ရှိကြသော်လည်း၊ ကမ္ဘာ့သမိုင်းစဉ် တလျောက်မှာ လက်ခံကျင့်သုံးမှု ရှိကြပါတယ်။ ပဒေသရာဇ်ခေတ် ကာလမှာပင် သက်ဦးဆံပိုင် ဘုရင်များက မင်းပြစ်မင်းဒဏ် သင့်သူ ကျေးကျွန်တော်တွေကို ရာဇဒဏ် ဘေးက လွတ်ငြိမ်းစေပြီး အသက် ချမ်းသာပေးခဲ့တဲ့ သာဓက များစွာလည်း ရှိခဲ့ပါတယ်။ မြန်မာနိုင်ငံရဲ့ သမိုင်းစဉ် တလျှောက်မှာလည်း ဘုရင်စနစ်မှ စ၍ ယနေ့ခေတ် နိုင်ငံတော် သမ္မတ လက်ထက်တိုင်အောင် လွတ်ငြိမ်းချမ်းသာခွင့်တွေ အခါအားလျော်စွာ ပေးခဲ့ကြတာကိုလည်း တွေ့မြင်ရမှာ ဖြစ်ပါတယ်။ ယနေ့တော့ လွတ်ငြိမ်းချမ်းသာခွင့် ပေးခြင်းဆိုင်ရာ သိကောင်းစရာ အချို့ကို စာပေကျမ်းလာများ အတိုင်း ကောက်နုတ် တင်ပြပေးလိုပါတယ်။
* လွတ်ငြိမ်းချမ်းသာခွင့် (Amnesty) ဟူသည် ...
လွတ်ငြိမ်းချမ်းသာခွင့် ဆိုတာ သာမန်အားဖြင့် လူပုဂ္ဂိုလ် တစ်ဦးတည်းအတွက် ရည်ရွယ်တာ မဟုတ်ဘဲ ပြစ်မှုကျူးလွန်တဲ့ လူတစ်စု (သို့မဟုတ်) အမျိုးအစား၊ အဖွဲ့အစည်း တစ်ခုအတွက် လွတ်ငြိမ်း ချမ်းသာခွင့် ပေးခြင်းကို ဆိုလိုပါတယ်။ တစ်နည်းဆိုရရင် လွတ်ငြိမ်းချမ်းသာခွင့် ဆိုတာ ပြစ်မှုလို့ သတ်မှတ်ထားတဲ့ အပြုအမူကို ပြစ်မှုလို့ မယူဆတော့ဘဲ ပြည်သူတို့ရဲ့ အကျိုးစီးပွားအတွက် ဖျောက်ဖျက် သင်ပုန်းချေကာ ခွင့်လွှတ်ခြင်းမျိုးပဲလို့ ဆိုနိုင်ပါတယ်။ တရားရုံးတွေမှာ အမှုစစ်ဆေးခံနေရဆဲ ပုဂ္ဂိုလ်တွေနဲ့ ပြစ်ဒဏ်ကျခံ နေရသူတွေကိုပါ အထိုက်အလျောက် လွတ်ငြိမ်းချမ်းသာခွင့် ရရှိစေပါတယ်။* ဘာကြောင့် ပေးသလဲ၊ ဘယ်အခါ ပေးသလဲ
လွတ်ငြိမ်းချမ်းသာခွင့် ပေးခြင်းဟာ နိုင်ငံအကြီးအကဲက စာနာသနား သက်ညှာလို့ ဆောင်ရွက်ပေးတဲ့ သဘောသက်ရောက်ပြီး ထူးခြားတဲ့ အခါကြီး၊ ရက်ကြီး၊ အဖြစ်အပျက်၊ ဆောင်ရွက်ချက်ကြီးများ၊ ထမြောက် အောင်မြင်မှုကြီးများ စသည်တို့ ပေါ်ပေါက်တဲ့ အခါမျိုးမှာ အထိမ်းအမှတ် အဖြစ် လွတ်ငြိမ်းချမ်းသာခွင့် ပေးလေ့ရှိတာကိုလည်း လေ့လာတွေ့ရှိနိုင်မှာ ဖြစ်ပါတယ်။ ဒါ့အပြင် စစ်ပြေငြိမ်းတဲ့ အခါမျိုးမှာ ငြိမ်းချမ်းရေး စာချုပ်တွေ ချုပ်ဆိုကြရင် စစ်မက် ဓလေ့ထုံးတမ်းနဲ့ ဥပဒေ ကို မလိုက်နာခဲ့ဘဲ ကျူးလွန်ခဲ့ကြတဲ့ နှစ်ဘက် စစ်သားတွေအပေါ်မှာ ၄င်းတို့ ကျူးလွန်တဲ့ ပြစ်မှုတွေအတွက် လွတ်ငြိမ်းခွင့်ပြုရန် ရည်ရွယ်ပြီး စစ်ပြေငြိမ်းစာချုပ်တွေမှာ လွတ်ငြိမ်းချမ်းသာခွင့် ထည့်သွင်းရေးသား ချုပ်ဆို တတ်တာမျိုးလည်း ရှိကြောင်း မှတ်သားလေ့လာ ရပါတယ်။* ကွဲကွဲပြားပြား သိပါစေ
လူအများက "လွတ်ငြိမ်းခွင့်ပေးခြင်း" (Pardom) ကို "လွတ်ငြိမ်းချမ်းသာ ခွင့်ပေးခြင်း" (Amnesty) ဆိုတဲ့ ဝေါဟာရနဲ့ ရောထွေးယှက်တင် သုံးစွဲလေ့ရှိကြ ပါတယ်။ လွတ်ငြိမ်းခွင့်ပေးခြင်း (Pardom) ကို အများအတွက် မဟုတ်ဘဲ ပုဂ္ဂိုလ် တစ်ဦးတစ်ယောက် (သို့မဟုတ်) လူနည်းစုကို အကျိုးခံစားခွင့် ပေးရာမှာ သုံးစွဲလေ့ရှိတာ ဖြစ်ပါတယ်။"လွတ်ငြိမ်းခွင့်ပေးခြင်း" မှာ "ကန့်သတ်ချက် မရှိဘဲ ပေးတဲ့ လုံးဝလွတ်ငြိမ်းခွင့်" (Free Pardom) နဲ့ "စည်းကမ်း သတ်မှတ်ချက်နဲ့ ပေးတဲ့ စည်းကမ်းချက်နှင့် လွတ်ငြိမ်းခွင့် (Conditional Pardom) ဆိုပြီး နှစ်မျိုးနှစ်စား ရှိပါတယ်။ လုံးဝ လွတ်ငြိမ်းခွင့်ပေးခြင်းရဲ့အကျိုးအာနိသင်ကတော့ လွတ်ငြိမ်းခွင့် ရသူအား ပြစ်မှုထင်ရှား စီရင်ခြင်းကို ပပျောက်စေတာ ဖြစ်လို့ ဥပဒေအရ ထိုသူဟာ ပြစ်မှုကျူးလွန် ခြင်းမရှိတဲ့ အပြစ်ကင်းစင်သူ အဖြစ်ကို ရောက်ရှိသွားပါတယ်။ ပြစ်ဒဏ်ကျခံနေရဆဲ ဖြစ်ရင်လည်း ပြစ်ဒဏ်မှ လွတ်ကင်းစေခြင်းဖြင့် ထိုပြစ်ဒဏ်ကို ဖယ်ရှား ပယ်ဖျက်၊ သင်ပုန်းချေလိုက်ခြင်း လည်း ဖြစ်တယ်လို့ မှတ်သားရပါတယ်။
* လွတ်ငြိမ်းချမ်းသာ ခွင့်ပေးခြင်း အမျိုးအစားများ
"လွတ်ငြိမ်းချမ်းသာ ခွင့်ပေးခြင်း" (Amnesty) မှာတော့ အောက်ပါ အမျိုးအစားများ ပါဝင်ပါတယ်__(၁) ပြစ်ဒဏ်ဆိုင်းငံ့ခြင်း (Reprieve or Suspension of Sentence)
(၂) ပြစ်ဒဏ် ရွှေ့ဆိုင်းခြင်း (Respite)
(၃) ကျခံရန် ကျန်ရှိသော ပြစ်ဒဏ်ကို လျော့ပေါ့ခြင်း/ လျှော်ပစ်ခြင်း (Remmission)
(၄) ပြစ်ဒဏ် လျော့ချ ပြောင်းလဲပေးခြင်း (Commutation)
(၅) အမှုနှင့် ပတ်သက်၍ သက်ညှာခြင်း (Clemency) ။
* ပြစ်မှုဆိုင်ရာ ကျင့်ထုံးဥပဒေ ပုဒ်မ ၄၀၁၊ ၄၀၂ အား လေ့လာခြင်း
ပုဒ်မ ၄၀၁ အရ နိုင်ငံတော် သမ္မတဟာ မည်သို့သော အမိန့်မှာမဆို စည်းကမ်းချက် ပါသည်ဖြစ်စေ၊ မပါသည်ဖြစ်စေ ပြစ်ဒဏ်ချမှတ် ခံထားရပြီး ဖြစ်တဲ့ တရားခံတစ်ဦး အပေါ် ပြစ်ဒဏ် တစ်ခုလုံး၊ ဒါမှမဟုတ် တစ်စိတ်တစ်ဒေသကို ဆိုင်းငံ့ခြင်း (Suspersion)၊ ကျခံရန် ကျန်ရှိနေတဲ့ ပြစ်ဒဏ်ကို လျော့ပစ်ခြင်း၊ လျှော့ပေါ့စေခြင်း လုပ်ပိုင်ခွင့် ရှိပါတယ်။ ပြစ်ဒဏ်ဆိုင်းငံ့ ထားရန်၊ လွတ်ငြိမ်း သက်သာခွင့်ပေးရန် အပြစ်ကျ တရားခံက လျှောက်ထားမယ် ဆိုရင် နိုင်ငံတော် သမ္မတဟာ စစ်ဆေးတဲ့ ရုံး (သို့မဟုတ်) ပြစ်ဒဏ် အတည်ပြုတဲ့ ရုံး၌ ထိုလျှောက်လွှာကို လက်ခံရန် သင့်၊မသင့် အကြံဥာဏ် တောင်းဆိုနိုင်ပါတယ်။ လက်ခံရန် (သို့မဟုတ်) ပယ်ရန် အကြံပေးချက်ကို အမှုတွဲနှင့် တပါတည်း တင်ပြလာတဲ့ အခါမှာတော့ နိုင်ငံတော် သမ္မတဟာ လုံးဝ (သို့မဟုတ်) စည်းကမ်းချက် ပါတဲ့ ဆိုင်းငံ့သည့် အမိန့် (သို့မဟုတ်) လျော့ပေါ့စေတဲ့ အမိန့်ကို ထုတ်ပြန်နိုင်ပါတယ်။ အဲဒီလို ထုတ်ပြန်ရာမှာ လျှောက်ထားသူရဲ့ သဘောဆန္ဒကို လိုက်နာနေဖို့ မလိုပါဘူး။ နိုင်ငံတော် သမ္မတဟာ ယင်းသို့ ပြစ်ဒဏ် ဆိုင်းငံ့ရန် (သို့မဟုတ်) လျော့ပေါ့စေရန် ဆောင်ရွက်တဲ့ အခါ ဆောင်ရွက်ပုံ၊ ဆောင်ရွက်နည်းတွေကို စည်းကမ်းသတ်မှတ် ညွှန်ကြား နိုင်ပါတယ်။ ဒါပေမယ့် ဒီလို စည်းကမ်း/ ညွှန်ကြားချက် တစ်စုံတစ်ရာ ရှိတယ်လို့တော့ မကြားမိပါဘူး။ အကယ်၍သာ မရှိခဲ့ဘူး ဆိုရင်တော့ ဖွဲ့စည်းပုံ အခြေခံ ဥပဒေနဲ့ ညီညွတ်တဲ့ လွတ်ငြိမ်းချမ်းသာ ခွင့်ပေးခြင်းဆိုင်ရာ လုပ်ထုံးလုပ်နည်း တစ်ရပ်ကို (ကျင့်ထုံးအရ) ရေးဆွဲသင့်တယ်လို့ တွေးမိပါတယ်။ ပုဒ်မ ၄၀၂ အရလည်း နိုင်ငံတော် သမ္မတသည် ပြစ်ဒဏ်ကျခံ လျက်ရှိသူရဲ့ သဘောတူညီ ချက် မပါရှိဘဲ ချမှတ်တဲ့ ပြစ်ဒဏ်ထက် နိမ့်သော အခြားပြစ်ဒဏ် တစ်မျိုးမျိုးသို့ လျော့ချ ပြောင်းလဲ သတ်မှတ်ပေးနိုင်ခွင့် ရှိပါတယ်။* ၂၀၀၈ ခုနှစ်၊ ဖွဲ့စည်းပုံ အခြေခံ ဥပဒေ ပုဒ်မ ၂၀၄ (က)၊ (ခ)
၂၀၀၈ ခုနှစ်၊ ဖွဲ့စည်းပုံ အခြေခံဥပဒေ ပုဒ်မ ၂၀၄ (က)အရ နိုင်ငံတော် သမ္မတသည် ပြစ်ဒဏ် လွတ်ငြိမ်းခွင့် (Pardom) ပေးပိုင်ခွင့် ရှိပြီး၊ ပုဒ်မ ၂၀၄ (ခ)အရ နိုင်ငံတော် သမ္မတသည် အမျိုးသား ကာကွယ်ရေးနှင့် လုံခြုံရေး ကောင်စီရဲ့ထောက်ခံချက်နဲ့ အညီ လွတ်ငြိမ်းချမ်းသာခွင့် (Amnesty) ပေးပိုင်ခွင့် ရှိတယ်လို့ ပြဋ္ဌာန်းထားကို တွေ့ရပါတယ်။ ဒါကြောင့် နိုင်ငံတော် သမ္မတသည် ပြစ်မှုကျူးလွန်သူ လူတစ်စု (သို့မဟုတ်) အမျိုးအစား အဖွဲ့အစည်း တစ်ခုအတွက် လွတ်ငြိမ်းချမ်းသာခွင့် ဖြစ်သော (General Amnesty) အထွေထွေ လွတ်ငြိမ်းချမ်းသာခွင့် ပေးခြင်း မဟုတ်ဘဲ၊ ပုဂ္ဂိုလ် တစ်ဦးတစ်ယောက် (သို့မဟုတ်) လူနည်းစုအား ပြစ်မှုမှသာမက ပြစ်ဒဏ်မှပါ လွတ်ငြိမ်းခွင့်ပြုသော လုံးဝ (သို့မဟုတ်) စည်းကမ်းချက်ဖြင့် လွတ်ငြိမ်းခွင့်ပြုခြင်းနဲ့ ဆိုင်တဲ့ကိစ္စတွေကို ဆောင်ရွက်ပြီး၊ ပြစ်မှုဆိုင်ရာ ကျင့်ထုံးဥပဒေ ပုဒ်မ ၄၀၁ နဲ့ ၄၀၂ တို့အရ လျှောက်ထားကာ ပြစ်ဒဏ် ဆိုင်းငံ့ခြင်း၊ ကျန်ရှိတဲ့ ပြစ်ဒဏ်ကို လျော့ပေါ့ခြင်း၊ လျော်ပစ်ခြင်း၊ ပြစ်ဒဏ် လျော့ချ ပြောင်းလဲပေးခြင်း စတဲ့ လွတ်ငြိမ်းချမ်းသာခွင့် မျိုးကိုသာ ဖွဲ့စည်းပုံ အခြေခံဥပဒေအရ ဆောင်ရွက်ခြင်း ဖြစ်တာကို လေ့လာတွေ့ရှိ နိုင်မှာဖြစ်ပါတယ်။ ဒါ့အပြင် သေဒဏ် ချမှတ်ခံရသူရဲ့ လျှောက်ထားမှုတွေမှာလည်း မည်သည့် လွတ်ငြိမ်း ချမ်းသာခွင့်နဲ့ လျှောက်ထားစေကာမူ နိုင်ငံတော် သမ္မတကသာ ဆောင်ရွက်ရမည် ဖြစ်ကြောင်း ပြဋ္ဌာန်းထားခြင်းမျိုး ဖြစ်တယ်လို့ သုံးသပ်ရရှိပါတယ်။ယခုအခါ ၂၀၁၄ နှစ်ဟောင်းမှ ၂၀၁၅ နှစ်သစ်သို့ ကူးပြောင်းစ ဖြစ်တာမို့ မြန်မာနိုင်ငံသူ၊ နိုင်ငံသား အားလုံးရဲ့ ဦးကင်းဥသျှောင် ဖြစ်တဲ့ ပြည်ထောင်စု သမ္မတ မြန်မာနိုင်ငံတော်၏ နိုင်ငံတော် သမ္မတကြီး ဦးသိန်းစိန် အနေနဲ့ စည်းကမ်း သေ၀ပ်ပြီး အကျင့်စာရိတ္တ ပြန်လည်ပြုပြင် လာကြသော အကျဉ်းသားများနှင့် စာရိတ္တ ဆိုင်ရာ ပြစ်မှုမဟုတ်ဘဲ အခြားပြစ်မှုများနဲ့ ပြစ်ဒဏ်ကျခံပြီး၊ ကျခံဆဲ အကျဉ်းသားများကို လူသားချင်း စာနာထောက်ထား သနားငဲ့ညှာစွာနဲ့ အကျဉ်းသားများနှင့် ၎င်းတို့၏ ကျန်ရစ်သော မိသားစုဝင်များရဲ့ ကျန်းမာရေး၊ လူမှုရေး၊ စီးပွားရေး အခက်အခဲ များစွာတို့အား ပြေလျော့သက်သာရာ ရစိမ့်သောငှာ သင့်မြတ်တဲ့ အချိန်ကာလ တစ်ခုမှာ လွတ်ငြိမ်းချမ်းသာခွင့်များ ထုတ်ပြန်ပေးပါစေကြောင်း မင်္ဂလာနှစ်သစ်မှာ ဆုတောင်းလိုက် ရပါတယ် ခင်ဗျာ။
လွှမ်းမိုးအောင် (တရားရေး)
