တရားမမှုတွင် နောက်တိုးသက်သေ လျှောက်ထားခွင့်
ပြစ်မှုတွေမှာသာမက တရားမမှုတွေမှာလည်း နောက်တိုးသက်သေ လျှောက်ထားခွင့် ရှိကြောင်းကို ဥပဒေပညာ လေ့လာလိုက်စား နေကြသူတွေအနေနဲ့ အကျယ်တ၀ံ့ ဖတ်ရှုလေ့လာနိုင်စေဖို့ အချက်အလက်များ စုစည်းပြီး ယနေ့ ပြန်လည်မျှဝေ တင်ပြပေးသွားမှာပဲ ဖြစ်ပါတယ်။
ဘယ်လိုအမှုအခင်းမျိုးမှာမဆို အကြောင်းခြင်းရာ တစ်ရပ်ရပ်ကို သက်သေထင်ရှား တင်ပြဖို့အတွက် သက်သေဦးရေ မည်ရွေ့ မည်မျှ ရှိရမည်ဆိုသော ကန့်သတ်ချက် မရှိကြောင်း သက်သေခံအက်ဥပဒေ ပုဒ်မ ၁၃၄ မှာ ပြဋ္ဌာန်းပါရှိ ပါတယ်။ ဒီတော့ တစ်ဘက်ဘက်သော အမှုသည်အနေနဲ့ သက်သေစာရင်းမှာ ကနဦး တင်ပြထားခဲ့ပြီး ဖြစ်တဲ့ သက်သေကိုသာ အမှုမှာ စစ်ဆေးနိုင်တာမျိုး မဟုတ်ဘဲ၊ အမှုမှာ ပေါ်ပေါက်လာတဲ့ သက်သေခံချက် များအရ သော်လည်းကောင်း၊ အမှန်တရား ပေါ်ပေါက်ရေး အတွက်သော်လည်းကောင်း လိုအပ်တဲ့ သက်သေကိုလည်း ရုံးတော်၏ခွင့်ပြုချက်နဲ့ ဆင့်ခေါ်စစ်ဆေးနိုင်ခွင့် ရှိတယ် ဆိုတာကတော့ ယင်း ပုဒ်မ ၁၃၄ အရ မြင်သာထင်ရှားပါတယ်။ သက်သေခံအက် ဥပဒေ ပုဒ်မ ၁၃၅ မှာလည်း သက်သေများအား တင်ပြစစ်ဆေးရန် အစီအစဉ်ကို တရားမကျင့်ထုံး၊ သို့မဟုတ် ပြစ်မှုကျင့်ထုံးအရ အခါအားလျော်စွာ တည်ရှိသည့် ဥပဒေနည်းလမ်း ရှိသည့်အတိုင်း သတ်မှတ်ရမည်။ ယင်းဥပဒေ နည်းလမ်း မရှိလျှင် တရားရုံးက ဆင်ခြင်တုံတရား လက်ကိုင်ထား၍ သတ်မှတ်ရမည် လို့ ပြဋ္ဌာန်းထားတာကို တွေ့နိုင်ပါတယ်။
"တရားမမှုများတွင် အမှု၌ သက်သေခံရန်ဖြစ်စေ၊ စာချုပ်စာတမ်းများကို တင်ပြစေရန် ဖြစ်စေ တရားရုံးသို့ လာရောက်ရန် လိုအပ်သူများထံ သမ္မန်စာများ ထုတ်ဆင့်ပေးရေး အတွက် အမှုသည်များက တရားရုံးသို့ အမှုစွဲဆိုပြီးနောက် မည်သည့်အဆင့် တွင်မဆို လျှောက်ထားနိုင်ခွင့် ရှိပေသည် ။ " (တရားမကျင့်ထုံး ဥပဒေ အမိန့် ၁၆၊ နည်းဥပဒေ ၁)။
"တရားရုံးသို့ လာရောက်ခြင်း၊ ရောက်ရှိခြင်းတို့နှင့် စပ်လျဉ်းသည့် တရားမကျင့်ထုံး ဥပဒေပါ ပြဋ္ဌာန်းချက်များနှင့် သော်လည်းကောင်း၊ တည်ဆဲဥပဒေ တစ်ရပ်ရပ်နှင့် သော်လည်းကောင်း မဆန့်ကျင်စေဘဲ တရားရုံးသည် အမှုတွင် အမှုသည် တစ်ဦးမဟုတ်သော၊ ထို့အပြင် အမှုသည်တစ်ဦးက သက်သေအဖြစ် ခေါ်ယူခြင်း မပြုသော သူတစ်ဦးဦးကို စစ်ဆေးရန် လိုအပ်သည်ဟု မည်သည့်အခါတွင်မဆို ထင်မြင်လျှင် ချိန်းဆိုသောရက်တွင် သက်သေခံရန် ဖြစ်စေ၊ ထိုသူ့လက်ဝယ်ရှိသော စာချုပ်စာတမ်း တစ်ခုခုကို တင်ပြစေရန် ဖြစ်စေ မိမိသဘောအလျောက် ထိုသူကို သက်သေအဖြစ် ဆင့်ခေါ်စစ်ဆေး နိုင်သည့်အပြင် ထိုသူကို သက်သေအဖြစ် စစ်မေးခြင်း သော်လည်းကောင်း၊ အဆိုပါ စာချုပ်စာတမ်းကို တင်ပြစေခြင်း သော်လည်းကောင်း ပြုနိုင်သည်။" (တရားမ ကျင့်ထုံး ဥပဒေ အမိန့် ၁၆၊ နည်းဥပဒေ ၁၄)။
တရားမမှုမှာ နောက်တိုးသက်သေ လျှောက်ထားမှုကို တရားရုံးက ဆင်ခြင်တုံတရားအရ ထည့်သွင်းခွင့် ပြုပေးနိုင်ပုံနဲ့ ပတ်သက်ပြီး အထင်ရှားဆုံးသော စီရင်ထုံးတစ်ခုဖြစ်တဲ့ - ဦးတင်မောင် နှင့် ဦးကြင်သိန်း ပါ(၅) (၁၉၈၂၊ မတစ၊ စာ-၂၆) စီရင်ထုံးကိုလည်း ဖတ်ရှုလေ့လာ မှတ်သားထား သင့်ပါတယ် __
"တရားမမှုများတွင် အမှုစွဲဆိုပြီး နောက်ပိုင်း အမှုသည်များသည် သူတို့ တင်ပြလိုသည့် သက်သေများ အားလုံးသို့ လာရောက်အစစ်ခံရန် အတွက် သမ္မန်စာချ၍ ဆင့်ခေါ်ပေးရန် လျှောက်ထားနိုင် သည်ဟု တရားမကျင့်ထုံး ဥပဒေ အမိန့် ၁၆၊ နည်းဥပဒေ ၁ တွင် ပြဋ္ဌာန်းထားသည်။ ယင်းပြဋ္ဌာန်းချက်တွင် မည်သူတို့ကို သက်သေအဖြစ် ခေါ်နိုင်ကြောင်း သတ်မှတ်ချက် သော်လည်းကောင်း၊ မည်သူတို့ကို သက်သေအဖြစ် မခေါ်နိုင်ဟု ကန့်သတ် ပိတ်ပင်ချက် သော်လည်းကောင်း မရှိပေ။ တရားလိုတစ်ဦးသည် ထိုအမှုမှ တရားပြိုင် တစ်ဦးအား မိမိတင်ပြသော သက်သေအဖြစ်ဖြင့် ခေါ်၍ မစစ်ဆေးနိုင် ဟူ၍လည်း ပိတ်ပင် ကန့်သတ်ထားခြင်း မရှိပေ။"
တရားမ ကျင့်ထုံး ဥပဒေ ပုဒ်မ ၃၀(ခ)အရ သက်သေခံ လာရောက်ရန် လိုအပ်တဲ့ နောက်တိုးသက်သေထံသို့ သမ္မာန်စာများ ထုတ်ဆင့်ခြင်းနဲ့ ပတ်သက်လို့ တရားရုံးသည် သတ်မှတ်ထားတဲ့ စည်းကမ်းချက်၊ ကန့်သတ်ချက်များနှင့် မဆန့်ကျင်စေဘဲ မိမိသဘောအလျောက် ဖြစ်စေ၊ အမှုသည် တစ်ဦးဦးရဲ့ လျှောက်ထားချက် အရဖြစ်စေ ဆောင်ရွက်ခွင့် ရှိကြောင်းလည်း လေ့လာတွေ့နိုင်မှာ ဖြစ်ပါတယ်။
နောက်တိုးသက်သေ လျှောက်ထားခွင့် ဆိုင်ရာ ယခင် တရားရုံးချုပ်ရဲ့ စီရင်ချက်အချို့ကိုလည်း မှတ်သားလေ့လာ နိုင်ကြရန် အလို့ငှာ ပြန်လည်မျှဝေ ပေးလိုက်ပါတယ် __
* အမိန့် ၁၆၊ နည်းဥပဒေ ၁ အရ အမှုသည်တို့ အနေဖြင့် တရားစွဲဆိုပြီးနောက် မည်သည့်အချိန်တွင် မဆို သက်သေခံစေရန် လာရောက်စေသူ တို့ကို ဆင့်ခေါ်ပေးရန် တရားရုံးသို့ တင်ပြ တောင်းဆိုခွင့် ရှိသည်။ ( ဦးနီကြာ နှင့် ဒေါ်တင်လှ၊ တရားမ ပြင်ဆင်မှု အမှတ်- ၈၈/၁၉၉၅၊ (၂-၆-၁၉၉၅) )။
* အမှုတစ်လျှောက်လုံး နောက်တိုးသက်သေ အဖြစ် စစ်ဆေးပေးရန် မတင်ပြခဲ့ဘဲ အမှုပြီးဆုံးခါနီးမှ နောက်တိုးသက်သေ (၃)ဦးကို ခေါ်ယူစစ်ဆေးပေးရန် တင်ပြခြင်းမှာ အမှုကို ကြန့်ကြာအောင် ပြုလုပ်ရာ ရောက်သဖြင့် ခွင့်မပြုသင့်။ ( ဒေါ်တင်မြ နှင့် ဦးသန်းရွှေ၊ တရားမ ပြင်ဆင်မှု အမှတ်- ၃၆၉/၁၉၉၄၊ (၃၀-၃-၁၉၉၅) )။
* နောက်တိုးသက်သေ စာရင်းကို မည်သည့်အကြောင်းကြောင့် တင်သွင်းရကြောင်း ကျိုးကြောင်း ခိုင်လုံစွာ ဖော်ပြခြင်း မရှိလျှင် နောက်တိုးသက်သေ စာရင်းကို ပယ်ခွင့် ရှိသည်။ ( ဦးကိုကိုကြီး နှင့် ဦးတင်ဖေ၊ တရားမ ပြင်ဆင်မှု အမှတ်- ၇၂/၁၉၉၃ )။
* အမှုစွဲဆိုစဉ် အတွင်းရေးမှူးက တရားလိုအဖြစ် အများကိုယ်စားပြု၍ စွဲဆိုခဲ့ပြီးနောက် အမှု အတောအတွင်း၌ အတွင်းရေးမှူး ပြောင်းလဲသွား သောအခါ ထိုမူလ တရားလိုသည် တရားလိုအဖြစ် အစစ်ခံခွင့် မရှိတော့သဖြင့် ၄င်းအား နောက်တိုးသက်သေ အဖြစ် အစစ်ခံနိုင်ခွင့် ရှိသည်။ ( ဒေါက်တာ အိုမ်ပရပ်ကာရ် (ဥက္ကဋ္ဌ) ပါ(၂) နှင့် ရှရီဒီရင် ကူမာရ်ဘီးပ်ပါစ် (ခ) ဦးမြသိန်း (၄င်း၏ တရားဝင် ကိုယ်စားလှယ် ဒေါ်လှရီ)၊ တရားမ ပြင်ဆင်မှု အမှတ်- ၅၃၆/၁၉၉၂၊ (၁၁-၈-၁၉၉၃) )။
* တရားလိုပြ သက်သေစာရင်းတွင် မပါဝင်သူကို နောက်တိုးသက်သေ အဖြစ် စစ်ဆေးရန် တရားပြိုင်ဘက် စစ်ဆေးသည့် အဆင့်တွင် တရားပြိုင်ကို မစစ်ဆေးမီ တင်ပြခြင်းကို အမိန့် ၁၆၊ နည်းဥပဒေ ၁ အရ ခွင့်ပြုနိုင်သည်။ တရားစီရင်ရေး ဥပဒေ ပုဒ်မ ၂(ဓ) တွင်လည်း အမှုတွင် ခုခံချေပခွင့် ပေးရမည့် မူလည်း ရှိသည်။ ( ဒေါ်ရင်ရင်မေ နှင့် ဒေါ်ခင်လှမော်၊ တရားမ ပြင်ဆင်မှု အမှတ်- ၂၄၄/၁၉၉၃၊ (၂၀-၁၀-၁၉၉၃) )။
ဘယ်လိုအမှု အခင်းမျိုးမှာမဆို နောက်တိုးသက်သေ ထပ်မံတင်ပြခြင်းကို ပုံသေကားချပ် သတ်မှတ် လက်ခံလို့ မရနိုင်ပါဘူး။ အမှုမှာ ပေါ်ပေါက်နေတဲ့ အခြေအနေနဲ့ အမှန်တရား ပေါ်ပေါက်ရေး အတွက် အထောက်အကူ ဖြစ်စေမယ့် သက်သေခံချက်အရ ပေါ်ပေါက်နေတဲ့ အချက်တွေကို ရုံးတော်က ဆင်ခြင်တုံတရားနဲ့ စိစစ်သုံးသပ်ပြီးမှသာ ဥပဒေနှင့်အညီ အဆုံးအဖြတ် ပြုပေးကြရမှာပဲ ဖြစ်ပါတယ်။
နှ လုံး စိတ် ၀မ်း အေး ချမ်း ကြ ပါ စေ ။
လွှမ်းမိုးအောင် (တရားရေး)
15-1-2015 1:15 am.
