ငြင်းချက်ထုတ်သည့်နေ့ရက်တွင် စာရွက်စာတမ်းများမတင်ပြပဲ စာရွက်စာတမ်းစာရင်းသာ တင်သွင်းနိုင်ခြင်းရှိမရှိ နှင့် နှစ်ဖက်သက်သေစာရင်းတင်သွင်းရန် လိုမလို နှင့် ပတ်သက်၍။
xxxxxxxxxxxxxxxxxxxxxxxxxxxxxxxxxxxxxx
Shwe Yati
ငြင်းချက်ထုတ်တဲ့နေ့
ဒီရုံးချိန်မှာ နှစ်ဖက်သက်သေစာရင်းနဲ့ စာရွက်စာတမ်းစာရင်းပါ တင်ရတယ်နော်
----------------------------
Tun Myo Htay
ငြင်းချက်ထုတ်သည့်နေ့တွင် အမိန့် - ၁၃၊ နည်း - ၁(၁) အရ အမှုတွင်တင်ပြမည့် လက်ဝယ်ရှိ စာရွက်စာတမ်း နှင့် တရားရုံးကတင်ပြရန် အမိန့်ချမှတ်ထားသည့် စာရွက်စာတမ်း အားလုံးကိုတင်ပြရန်ဖြစ်ပါတယ်။
ထိုသို့တင်ပြရာတွင် နည်း - ၁(၂) အရ သတ်မှတ်ပုံစံဖြင့် စာရွက်စာတမ်းများစာရင်း ကိုလည်း တင်ပြရမည်ဖြစ်ပါသည်။
ထို့ကြောင့် ငြင်းချက်ထုတ်သည့်နေ့မှာ စာရွက်စာတမ်းစာရင်းသာမက စာရွက်စာတမ်းများကို ပါ တင်ပြရန်ဖြစ်ပါသည်။
------------
ငြင်းချက်ထုတ်သည့်နေ့တွင် နှစ်ဖက်သက်သေစာရင်းတင်ရန်လိုအပ်ခြင်းမရှိသေးပါ။
နှစ်ဖက်သက်သေစာရင်းတင်သွင်းရန်နေ့ရက် နှင့်စပ်လျဉ်း၍ တရားရေးဂျာနယ်၊ အတွဲ(၃)၊ အမှတ် (၃) ပါ ဆရာ ဦးတင်ဟုန်(တရားရေး)၏ မတူကွဲပြား အမြင်များ ဆောင်းပါးမှ ဆရာ့၏ အမြင်ကို တင်ပြအပ်ပါသည်။
------
ငြင်းချက်ထုတ်သည့်နေ့မှာ နှစ်ဖက်သက်သေစာရင်းတင်သွင်းရမယ်လို့ပြောပါတယ်။ တရားရုံးများ လက်စွဲအပိုဒ် ၁၅၄ပါ ပြဌာန်းချက်နဲ့ကွဲလွဲနေတယ်လို့ထင်ပါတယ်။
တရားရုံးများလက်စွဲအပိုဒ် ၁၅၄(၁)မှာ အမှုမစစ်ဆေးမီ ဦးစွာပေါ်ပေါက်တဲ့ကိစ္စအရပ်ရပ်တို့ကို စစ်ဆေးရန် နေ့ရက်ချိန်းဆိုခြင်းမပြုမီ ဖြေရှင်းပြီးဖြစ်စေရမည်လို့ ဖော်ပြထားပါတယ်။
ဦးစွာပေါ်ပေါက်သည့်ကိစ္စများမှာ ငြင်းချက်များထုတ်ခြင်း နှင့် ပဏာမငြင်းချက်များရှိရင် ထိုငြင်းချက်ကိုဆုံးဖြတ်ခြင်းလည်း ပါဝင်ပါတယ်။
အပိုဒ် ၁၅၄(၃) အရ ငြင်းချက်ထုတ်ပြီးသည့်အခါမှ သက်သေစာရင်းတင်သွင်းရန် နဲ့ အမိန့်ဆင့်စာ၊ သမ္မာန်စာ စသည်တို့အတွက် လိုအပ်တဲ့ အခငွေနဲ့ စရိတ်ငွေတို့ကို ပေးသွင်းရန် နေ့ရက်တစ်ရက် ကို ချိန်းဆိုရန်ဖြစ်ပါတယ်။
တရားမ တရားစီရင်ရေးစာစောင် ၊ ၁၉၇၃ ၊ အခန်း ၂ အပိုဒ် ၁၄(က) မှာလည်း အမှုကို ကြားနာ စစ်ဆေးရန် ရက်သတ်မှတ်သည့်အခါဖြစ်စေ၊ ထို့နောက်ကြားရက်တစ်ရက်တွင်ဖြစ်စေ တရားလို နှင့် တရားပြိုင်တို့သည် သက်သေစာရင်း တင်သွင်းရန်ဖြစ်ကြောင်း ဖောြ်ပထားပါတယ်။
တရားမကျင့်ထုံးဥပဒေ အမိန့် ၁၈ ၊ နည်း ၂ အရ နှစ်ဖက်အမှုသည်များဟာ မိမိတို့သက်သေ ထင်ရှားပြသရန်တာဝန်ရှိတဲ့ ငြင်းချက်များကို ထောက်ခံသည့် သက်သေခံအထောက်အထား ကိုတင်ပြရန် ဖြစ်ပါတယ်။
ငြင်းချက်ထုတ်ပြီးမှသာ မိမိက သက်သေထင်ရှားပြသရမယ့် ငြင်းချက်များကို သိရှိနိုင်မှာဖြစ်လို့ မည်သူ့ကို သက်သေအဖြစ် တင်ပြရမယ်ဆိုတာ ငြင်းချက်ထုတ်ပြီးမှသာ ဆုံးဖြတ်နိုင်မှာဖြစ်ကြောင်းမြင်သာပါတယ်။
---
ထို့ကြောင့် ငြင်းချက်ထုတ်သည့်နေ့တွင် နှစ်ဖက်သက်သေစာရင်းများတင်သွင်းရန် မလိုအပ်သေး ပါကြောင်း နှင့်
ငြင်းချက်ထုတ်ပြီးနောက် ကြားရက်တစ်ရက်ရက်တွင်ဖြစ်စေ၊ အမှုစတင်စစ်ဆေးရန် ချိန်းဆိုသည့်နေ့ရက်တွင်ဖြစ်စေ တင်သွင်းရန်ဖြစ်ပါကြောင်း လေ့လာတင်ပြအပ်ပါသည်။
Tun Myo Htay