ဒီကရီတစ်ရပ်အပေါ် အယူခံတင်သွင်းရာတွင် ထမ်းဆောင်ရန် ရုံးခွန်
ရုံးခွန်အက်ဥပဒေ ပထမဇယား အမှတ်စဉ် ၁ တွင် အယူခံလွှာတွင် ထမ်း ဆောင်ရန် ရုံးခွန်တန်ဖိုးကို သတ်မှတ်ရာတွင် အငြင်းပွားသည့် အချင်းဖြစ် အကြောင်း ခြင်းရာ တန်ဖိုးပေါ်တွင် ထမ်းဆောင်ရန်ဖြစ်ကြောင်းပြဋ္ဌာန်း ထား ပါသည်။ အချင်းဖြစ်အကြောင်းခြင်းရာတန်ဖိုးအပေါ် ၀.၅% ဖြင့် ထမ်းဆောင်ရန်ဖြစ်ပြီး အများဆုံးရုံးခွန်မှာ ကျပ် ၅ သိန်းဖြစ်ပါသည်။
အယူခံလွှာတွင်ထမ်းဆောင်ရမည့်ရုံးခွန်ကိစ္စသည် အယူခံမှု၏ အချင်းဖြစ် အကြောင်းခြင်းရာတန်ဖိုး မည်မျှဖြစ်သလဲဆိုသည့်အပေါ်တွင် မူတည်ပါ သည်။
အယူခံမှုတွင် အငြင်းပွားသည့်အချင်းဖြစ်အကြောင်းခြင်းရာ(subject matter in dispute in appeal)သည် မူလမှုတွင် အငြင်းပွားသည့် အချင်းဖြစ်အကြောင်းခြင်းရာ (subject matter in dispute in the suit)နှင့် တူညီလျှင် အဆိုလွှာတွင် ထမ်းဆောင် ခဲ့သည့်အတိုင်း တူညီသော ရုံးခွန်ကိုပင် အယူခံမှုတွင် ထမ်းဆောင်ရပါမည်။
ဥပမာ - တရားလိုသည် ငွေသိန်း ၁၀၀ ရလိုမှု စွဲဆိုရာ စွဲဆိုသောအမှုကို ပလပ်ခံရသဖြင့် အယူခံတက်ရောက်ရာတွင် အယူခံမှု၏ အငြင်းပွားသည့် အချင်းဖြစ် အကြောင်းခြင်းရာ တန်ဖိုးသည် ကျပ် သိန်း ၁၀၀ ပင်ဖြစ်ရာ မူလမှုတွင် ထမ်းဆောင် ခဲ့သည့် ရုံးခွန်အတိုင်း အယူခံမှုတွင် ထမ်းဆောင် ရန်ဖြစ်ပါသည်။
အပြန်အလှန်အားဖြင့် တရားလိုသည် ငွေ သိန်း ၁၀၀ ရလိုမှုစွဲဆိုရာ စွဲဆို သည့်အတိုင်းဒီကရီရရှိသည်။ ထိုဒီကရီအပေါ် တရားပြိုင်သည် အယူခံတက်ရောက်ရာတွင် အယူခံမှု၏ အငြင်းပွားသည့် အချင်းဖြစ် အကြောင်းခြင်းရာ တန်ဖိုးသည် ကျပ် သိန်း ၁၀၀ ပင်ဖြစ်ရာ မူလမှုတွင် ထမ်းဆောင်ခဲ့သည့် ရုံးခွန်အတိုင်း အယူခံမှုတွင် ထမ်းဆောင် ရန်ဖြစ်ပါသည်။
အယူခံမှုတွင် အငြင်းပွားသည့်အချင်းဖြစ်အကြောင်းခြင်းရာ (subject matter in dispute in appeal) သည် မူလမှုတွင် အချင်းဖြစ် အကြောင်းခြင်းရာ (subject matter in the suit) နှင့်မတူညီလျှင် ထမ်းဆောင်ရမည့်ရုံးခွန်သည် အယူခံမှုတွင် အငြင်းပွား သည့်အချင်းဖြစ်အကြောင်းခြင်းရာ (subject matter in dispute in appeal)တန်ဖိုးမည်မျှဖြစ်သလဲဆိုသည့်အပေါ်တွင်မူတည်ပါသည်။
အယူခံတွင် အငြင်းပွားသည့် အချင်းဖြစ်အကြောင်းခြင်းရာတန်ဖိုးသည် မူလမှု တွင် အချင်းဖြစ်အကြောင်းခြင်းရာတန်ဖိုးထက်နည်းသည့်အခါ အယူခံလွှာအပေါ်တွင် ထမ်းဆောင်ရမည့် ရုံးခွန်သည် အဆိုလွှာတွင် ထမ်းဆောင်သည့် ရုံးခွန်ထက် လျော့နည်းပါမည်။
ဥပမာ - တရားလိုသည် ငွေကျပ် သိန်း ၁၀၀ ရလိုမှု စွဲဆိုရာ ကျပ်သိန်း ၅၀ သာ ဒီကရီရရှိသည်။ ထို့ကြောင့် တရားလိုသည် ကျန် သိန်း ၅၀ အတွက် အယူခံတက် ရောက်ရာ အယူခံမှု၏ အငြင်းပွားသည့် အချင်းဖြစ် အကြောင်းခြင်းရာ တန်ဖိုးသည် ကျပ် သိန်း ၅၀ ဖြစ်သည်။ တရားလိုသည် မူလမှုတွင် ထမ်းဆောင်သည့် ရုံးခွန် အတိုင်းထမ်းဆောင်ရန်မလိုအပ်ပါ။ အယူခံတက်ရောက်သည့် ကျပ် သိန်း ၅၀ အပေါ် တွင်သာ ရုံးခွန်ထမ်းဆောင်ရန်ဖြစ်ပါသည်။
အပြန်အလှန်အားဖြင့် တရားပြိုင်သည် တရားလိုအနိုင်ဒီကရီရရှိသော ကျပ် သိန်း ၅၀ အပေါ် အယူခံတက်ရောက်မည်ဆိုပါကလည်း အယူခံမှု၏ အငြင်းပွားသည့် အချင်းဖြစ် အကြောင်းခြင်းရာ တန်ဖိုးသည် ကျပ် သိန်း ၅၀ ဖြစ်ရာ တရားပြိုင်သည် ထို ကျပ် သိန်း ၅၀ အပေါ်တွင်သာ ရုံးခွန်ထမ်းဆောင်ရန်ဖြစ်ပါသည်။
သို့ဖြစ်ရာ အယူခံမှုများ၏ ရုံးခွန်သည် အယူခံတွင် အငြင်းပွားသည့် အချင်းဖြစ် အကြောင်းခြင်းရာ တန်ဖိုးအပေါ်တွင်သာ ထမ်းဆောင်ရန် ဖြစ်ပါသည်။
-----
တရားမ အထွေထွေအယူခံမှုတွင် ထမ်းဆောင်ရန်ရုံးခွန်
(သို့မဟုတ်)
ဒီကရီ သို့မဟုတ် ဒီကရီကဲ့သို့ အာဏာရှိသော အမိန့်တိုိ့ကို အယူခံခြင်းမဟုတ်သော အယူခံလွှာတွင် ထမ်းဆောင်ရန်ရုံးခွန်
ရုံးခွန်အက်ဥပဒေ၊ ဒုတိယဇယား အမှတ်စဉ် ၁၁ အရ ခရိုင်တရားရုံး၊ ပြည်နယ် သို့မဟုတ် တိုင်းဒေသကြီး တရားလွှတ်တော်သို့ တင်သွင်းသော တရားမအထွေထွေအယူခံမှုအတွက် ရုံးခွန် "၂၀၀" ကျပ် ဖြစ်ပြီး ပြည်ထောင်စုတရားလွှတ်တော်ချုပ်သို့ တင်သွင်းသည့် တရားမအထွေထွေ အယူခံမှုအတွက် ရုံးခွန် "၅၀၀" ကျပ်ဖြစ်ပါသည်။
ဦးထွန်းမျိုးဋ္ဌေး
