မောင်စာဂ
အာမခံပေးခြင်းဆိုရာတွင် ပြစ်မှုတစ်ရပ် ကျူးလွန်သူဟု စွပ်စွဲခံရသူတစ်ဦးအား ဖမ်းဆီးချုပ်နှောင်ခြင်းမပြုဘဲ လုံလောက်သော အာမခံသူများနှင့်ခံဝန်ချုပ် ချုပ်ဆို၍ဖြစ်စေ၊ အာမခံသူများမပါဘဲ ကိုယ်တိုင်ခံဝန်ချုပ် ချုပ်ဆို၍ဖြစ်စေ လွှတ်ပေးထားခြင်းကို ဆိုလိုသည်။
အာမခံပေးခြင်းကိစ္စ အပိုင်းနှစ်ပိုင်းရှိသည်။ စွပ်စွဲခံရသူကို ရဲတပ်ဖွဲ့စခန်းက ဖမ်းဆီးချုပ်နှောင်ပြီးနောက် အာမခံပေးခြင်းအပိုင်းနှင့်တရားရုံးသို့ စွဲဆိုတင်ပို့ပြီးနောက် တရားရုံးက အာမခံပေးခြင်းအပိုင်းတို့ဖြစ်သည်။ အပိုင်းနှစ်ပိုင်းစလုံးတွင် အာမခံပေးခြင်း၊ မပေးခြင်း ကိစ္စရပ်အပေါ် အဆုံးအဖြတ်ပေးကြရာ၌ လိုက်နာရမည့် ဥပဒေမှာ ရာဇဝတ်ကျင့်ထုံး ဥပဒေပင် ဖြစ်သည်။
ဤတွင် အာမခံပေးခြင်းကိစ္စ ဥပဒေက မည်သို့မည်ပုံ ပြဋ္ဌာန်းထားသနည်း။ လေ့လာတွေ့ရှိသမျှ ဖော်ပြပါရ စေ။
အာမခံပေးနိုင်သောပြစ်မှုနှင့် မပေးနိုင်သောပြစ်မှု
ရာဇသတ်ကြီးတွင် ပါရှိသောပြစ်မှုများအနက် မည်သည့်ပြစ်မှုက အာမခံပေးနိုင်သည်၊ မည်သည့်ပြစ်မှုက အာမခံမပေးနိုင်ဟူ၍ ရာဇဝတ်ကျင့်ထုံးဥပဒေ၌ သတ် မှတ်ထားသည်။
အာမခံပေးရမည့်ပြစ်မှုဆိုသည်မှာ ရာဇဝတ်ကျင့်ထုံး ဥပဒေ၏ နောက်ဆက်တွဲ ဇယား (၂) တွင် အာမခံပေးရ မည်ဟု ဖော်ပြထားသောပြစ်မှု သို့မဟုတ် တည်ဆဲအခြားဥပဒေတစ်ရပ်ရပ်အရ အာမခံပေးရမည့်ပြစ်မှုကို ဆိုသည်။ အာမခံမပေးနိုင်သောပြစ်မှုဆိုသည်မှာ အခြား ပြစ်မှုများကို ဆိုသည်။ [ပုဒ်မ ၄(၁)(က)]။
ရာဇသတ်ကြီးမဟုတ်ဘဲ ကျန်ရှိသည့် အထူးဥပဒေ များပါ ပြစ်မှုများကိုလည်း အာမခံ ပေးနိုင်သည့်ပြစ်မှုနှင့်အာမခံမပေးနိုင်သော ပြစ်မှုဟူ၍ သတ်မှတ်ထားသည်။ ရာဇဝတ်ကျင့်ထုံး ဥပဒေ နောက်ဆက်တွဲဇယား (၂) အဆုံးတွင် အောက်ပါအတိုင်း ပြဋ္ဌာန်းထားသည်။
သေဒဏ်၊ အနှစ် ၂ဝ ထောင်ဒဏ် သို့မဟုတ် ထောင် ဒဏ် ခုနစ်နှစ် သို့မဟုတ် ယင်းအထက်ပိုသော ပြစ်ဒဏ်ထိုက်သည့်ပြစ်မှုဖြစ်လျှင်သော်လည်းကောင်း၊ ထောင်ဒဏ် သုံးနှစ်နှင့်အထက် သို့သော်လည်း ခုနစ်နှစ် ထက်မပိုသော ပြစ်ဒဏ်ထိုက်သည့် ပြစ်မှုဖြစ်လျှင်သော်လည်းကောင်း အာမခံမပေးနိုင်ပါ။ ထောင်ဒဏ် သုံးနှစ်အောက် ပြစ်ဒဏ်ထိုက်သည့် ပြစ်မှုဖြစ်လျှင် အာမခံပေးရ ပါမည်။
အာမခံပေးခြင်းကိစ္စ၊ နည်းလမ်းသတ်မှတ် ပြဋ္ဌာန်းချက်
ရာဇဝတ်ကျင့်ထုံးဥပဒေပါ ပြဋ္ဌာန်းချက်များကို အနှစ် ချုပ်ကိုးကား၍ ရှင်းလင်းပါမည်။
အာမခံပေးနိုင်သော ပြစ်မှုဖြင့် စွပ်စွဲခြင်းခံရသူ တစ်ဦးကို သက်ဆိုင်ရာ ရဲစခန်း၏ ထိန်းသိမ်းမှု အောက် တွင်ရှိစဉ် မည်သည့်အချိန်အခါမဆို အာမခံပေးရန် အသင့်ဖြစ်လျှင် ထိုသူကိုအာမခံဖြင့် လွှတ်ထားရမည်။ ထိုနည်းတူ တရားရုံးရှေ့တွင် ဆောင်ရွက်သည့် မှုခင်းကိစ္စ၏ မည်သည့်အဆင့်၌မဆို အာမခံပေးရန်အသင့် ဖြစ်လျှင် ထိုသူကို အာမခံဖြင့်လွှတ်ထားရမည်။ (ပုဒ်မ ၄၉၆)
အာမခံမပေးနိုင်သော ပြစ်မှုဖြင့် စွပ်စွဲခံရသူတစ်ဦး သည် ရဲစခန်းက ဝရမ်းမပါဘဲ ဖမ်းဆီးခြင်းဖြစ်စေ၊ ချုပ် နှောင်ခြင်းဖြစ်စေ ခံရသည့်အခါ သို့မဟုတ် တရားရုံး ရှေ့သို့ ထိုသူ ရောက်ရှိသည့်အခါ သို့မဟုတ် တရားရုံး ရှေ့သို့ ခေါ်ဆောင်ခြင်းခံရသည့်အခါ ထိုသူကို အာမခံဖြင့် လွှတ်ထားနိုင်သည်။ [ပုဒ်မ ၄၉၇(၁)]
ဤပြဋ္ဌာန်းချက်ကို ကြည့်ခြင်းအားဖြင့် အာမခံမပေး နိုင်သော ပြစ်မှုဖြင့် စွပ်စွဲခြင်းခံရသူပင်ဖြစ်လင့်ကစား အာမခံဖြင့်လွှတ်ထားနိုင်ကြောင်းကို တွေ့မြင်ရသည်။
ယင်းပုဒ်မ ၄၉၇(၁) မှာပင် သို့သော်လည်း ထိုစွပ်စွဲခံရသူသည် သေဒဏ်ဖြစ်စေ၊ အနှစ် ၂ဝ ထောင်ဒဏ်ဖြစ်စေ စီရင်ထိုက်သော ပြစ်မှုတစ်စုံတစ်ရာကို ကျူး လွန်ခဲ့သည်ဟု ယုံကြည်ရန် သင့်လျော်သော အကြောင်း များရှိလျှင် ထိုကဲ့သို့ လွှတ်ထားခြင်းမပြုရပါ။ သို့ရာတွင် အဆိုပါပြစ်မှုဖြင့် စွပ်စွဲခံရသူသည် အမျိုးသမီးဖြစ်နေလျှင် သို့မဟုတ် မကျန်းမမာ ဖျားနာနေသူဖြစ် လျှင် သို့မဟုတ် ချည့်နဲ့နေသူဖြစ်လျှင် ထိုသူကိုအာမခံဖြင့် လွှတ်ထားနိုင်ကြောင်း ပြဋ္ဌာန်းထားသည်။
ထို့ပြင် သက်ဆိုင်ရာ ရဲတပ်ဖွဲ့စခန်းက သို့မဟုတ် တရားရုံးက စုံစမ်းစစ်ဆေးမှု သို့မဟုတ် စီရင်မှုပြုလုပ် နေသည့် မည်သည့်အဆင့်တွင်မဆို စွပ်စွဲခံရသူသည် အာမခံမပေးနိုင်သည့် ပြစ်မှုတစ်ရပ်ကို ကျူးလွန်ခဲ့သည်ဟု ယုံကြည်ရန် အကြောင်းမရှိသော်လည်း ထိုသူ၏ပြစ်မှုကို ဆက်လက်စုံစမ်းစစ်ဆေးရန် လုံလောက်သော အကြောင်းများရှိသည်ဟု ထင်မြင်လျှင် အဆိုပါ
စုံစမ်းစစ်ဆေးမှု အတွင်း၌ ထိုသူကိုအာမခံဖြင့် လွှတ် ထားစေရမည်။ [ပုဒ်မ ၄၉၇(၂)]
ပုဒ်မ ၄၉၇ (၁) သို့မဟုတ် ပုဒ်မ ၄၉၇(၂) အရ စွပ်စွဲခံရသူတစ်ဦးကို အာမခံဖြင့် လွှတ်ပေးသည့် အရာရှိတစ်ဦး သို့မဟုတ် တရားရုံးတစ်ရုံးသည် မည်သည့်အကြောင်းကြောင့် ထိုကဲ့သို့ လွှတ် ထားရကြောင်း အကြောင်းပြချက်များကို စာဖြင့်ရေးမှတ်ထားရမည်။ [ပုဒ်မ ၄၉၇(၃)]
အာမခံမပေးနိုင်သော ပြစ်မှုတစ်ရပ်ဖြင့် စွပ်စွဲခံရသူတစ်ဦးကို စစ်ဆေးမှုပြီးဆုံးပြီးနောက် စီရင်ချက်မချမီ မည်သည့်အချိန်တွင်မဆို ထိုစွပ်စွဲခံရသူသည် အဆိုပါပြစ်မှုတစ်စုံတစ်ရာကို ကျူးလွန်ခဲ့ခြင်းမရှိကြောင်း တရားရုံးက ထင်မြင်လျှင် အကယ်၍ထိုစွပ်စွဲခံရသူသည် အချုပ်တွင် ရှိနေပါက စီရင်ချက်ချသည့်အခါ ထိုသူရောက်ရှိ နားထောင်ရန်အတွက် အာမခံသူများမပါဘဲ ခံဝန်ချုပ် ချုပ်ဆိုစေလျက် ထိုသူကိုလွှတ်ပေးရမည်။ [ပုဒ်မ ၄၉၇(၄)]
အထူးပြဋ္ဌာန်းချက်နှင့် ယေဘုယျပြဋ္ဌာန်းချက်
ရာဇဝတ်ကျင့်ထုံးဥပဒေ ပုဒ်မ ၄၉၆ နှင့်၄၉၇ ပါ ပြဋ္ဌာန်း ချက်များသည် အထူးပြဋ္ဌာန်းချက် (Special provision) ဖြစ်သည်။ ရာဇဝတ်ကျင့်ထုံးဥပဒေ၏ နောက်ဆက်တွဲ ဇယား (၂) တွင် အာမခံပေးနိုင်သည့်ပြစ်မှု၊ အာမခံမပေးနိုင်သည့် ပြစ်မှုဟု ဖော်ပြထားချက်များသည် ယေဘုယျ ပြဋ္ဌာန်းချက် (General provision) ဖြစ်သည်။
အာမခံပေးခြင်းသည် 'မူ'၊ မပေးခြင်းသည် ခြွင်း ချက်'
ရာဇဝတ်ကျင့်ထုံးဥပဒေ ပုဒ်မ ၄၉၆ နှင့်ပုဒ်မ ၄၉၇ ပါ ပြဋ္ဌာန်းချက်များကို ကြည့်ခြင်းအားဖြင့် အာမခံပေး ရမည့် ပြစ်မှုများကို အာမခံပေးရန်ဖြစ်သည်။ အာမခံ မပေးနိုင်သော ပြစ်မှုကို ကျူးလွန်သည်ဟု စွပ်စွဲခံရစေ ကာမူ အာမခံပေးရမည့်ဘက်ကို အလေးထား၍ ပြဋ္ဌာန်းထားသည်ကို တွေ့မြင်ရမည်။ သို့ပါ၍ အာမခံ ပေးခြင်းသည် 'မူ'၊ အာမခံမပေးခြင်းသည် 'ခြွင်းချက်' မျှသာဟူ၍ ဆိုရခြင်းဖြစ်သည်။
စီရင်ထုံးပါ လမ်းညွှန်ဆုံးဖြတ်ချက်များ
အာမခံပေးခြင်း မပေးခြင်းကိစ္စနှင့်စပ်လျဉ်း၍ 'ဟူစိန်ဘခန်နှင့်နိုင်ငံတော်အမှု' တွင် မူတစ်ရပ်ကို လမ်းညွှန် ချမှတ်ခဲ့သည်။ ထိုမူမှာ ပြစ်မှုဆိုင်ရာကျင့်ထုံးဥပဒေ ပုဒ်မ ၄၉၆ နှင့်၄၉၇ ပါ ပြဋ္ဌာန်းချက်များအရ အာမခံပေးခြင်းသည် အခြေခံမူဖြစ်သည်။ အာမခံမပေး ငြင်းပယ် ခြင်းသည် ခြွင်းချက်ဖြစ်သည်ဟူ၍ ဆုံးဖြတ်ထားသည်။ (၁၉၆ဝ ခုနှစ်၊ မတစ၊ ၁၉၂)
တခြားတစ်မှုတွင်လည်း အစွပ်စွဲခံရသူတစ်ဦးအား ရာဇဝတ်ရုံးက အာမခံပေးခြင်းနှင့်ပတ်သက်၍ စဉ်းစား ဆုံးဖြတ်ရမည့်မူများကို ဤရုံးက ချမှတ်ပြီးဖြစ်သည်။ သာမန်အားဖြင့်ဆိုလျှင် အစွပ်စွဲခံနေရသူတစ်ဦးဦးအား အမှုကို ရုံးသို့တင်၍ စစ်ဆေးခြင်းမပြုသေးမီ သို့မဟုတ် အမှုကို စစ်ဆေးနေစဉ်အတွင်း၌ ကြာမြင့်စွာ ချုပ်နှောင်ထားအပ်သည်မဟုတ်။ ထိုသို့ချုပ်နှောင်ခြင်း
ဖြင့်၎င်းအပေါ်တွင် ပြစ်မှုထင်ရှားမတွေ့ရှိသေးဘဲ ကြိုတင်၍ ပြစ်ဒဏ်ပေးခြင်းမျိုး မဖြစ်အပ်ပေ။ (၁၉၆၅ ခုနှစ်၊ မတစ၊ ၆၆၆)
တခြားတစ်မှုတွင်လည်း ထောင်ဒဏ်တစ်သက်တစ်ကျွန်း သို့မဟုတ် သေဒဏ်ပေးနိုင်သော အမှုများမှအပ အာမခံမပေးနိုင်သောအမှုများတွင် တရားရုံးများက အာမခံပေးပိုင်ခွင့်ကို ကျင့်ထုံးပုဒ်မ ၄၉၇ က ကန့်သတ်ထားခြင်းမရှိကြောင်း ဆုံးဖြတ်ထားသည်။ (ရန်ကုန်၊ အတွဲ ၅၊ ၂၇၆)
ပြစ်ဒဏ်စီရင်ခြင်း မပြုသေးသမျှ အပြစ်ကျူးလွန်သူဟု မမှတ်ယူရ
ပြစ်မှုတစ်ရပ်ကျူးလွန်သည်ဟူ၍ စွပ်စွဲခံရသူတစ်ဦး ကို တရားရုံးက ''ပြစ်ဒဏ်စီရင်ခြင်း မပြုသေးသမျှအပြစ်ကျူးလွန်သူဟူ၍ မမှတ်ယူရ''ဆိုရိုးစကားသည် တည်တံ့ခိုင်မာလျက်ရှိသည်။ တရားရုံးရှေ့သို့ ရောက်ရှိ လာသော ပြစ်မှုတစ်ရပ်ကို ကျူးလွန်သည်ဟု စွပ်စွဲခံရသူကို အပြစ်ကျူးလွန်သူဟူ၍ ကြိုတင်မှတ်ယူခြင်း မပြုနိုင်ပါ။ ရာဇဝတ်ကျင့်ထုံးဥပဒေပုဒ်မ ၄၉၆ နှင့်၄၉၇ ပါ ပြဋ္ဌာန်းချက်များနှင့်အညီ အာမခံပေးခြင်းကိစ္စ ဆောင်ရွက်သင့်ကြပါသည်။
မှတ်မှတ်သားသား ဆောင်ရွက်ခဲ့သည်များ
လွန်ခဲ့သော ၁၉၇၄ ခုနှစ်မှ ၁၉၈၃ ခုနှစ်ထိ ကာလ များအတွင်းကဖြစ်သည်။ လမ်းစဉ်ပါတီခေတ် ပြည်သူ့ တရားသူကြီး သုံးဦး ရုံးထိုင်စစ်ဆေးသည့်အချိန်ဖြစ်သည်။ စာရေးသူသည် မြို့နယ် ဥပဒေရုံးတွင် ဥပဒေ ဝန်ထမ်းအဖြစ် တာဝန်ထမ်းဆောင်ခဲ့ရသည်။ ပြစ်မှု တော်တော်များကို တရားရုံးတွင် အစိုးရရှေ့နေအဖြစ် လိုက်ပါဆောင်ရွက်ပေးခဲ့ရသည်။ အာမခံပေးခြင်းကိစ္စ တရားရုံးတွင် အကြိမ်ကြိမ်တင်ပြခြင်း၊ လျှောက်လဲ ချက်ပေးခြင်းတို့ ဆောင်ရွက်ခဲ့ရသည်။
အာမခံပေးရမည့်အမှုဖြစ်လျှင် အာမခံပေးဖို့ တင်ပြ ခြင်း၊ လျှောက်လဲခြင်းပြုသည်။ သေဒဏ်၊ တစ်သက် တစ်ကျွန်းဒဏ် ချမှတ်ထိုက်သော ပြစ်မှုမျိုးဖြင့် စွပ်စွဲခံရသူကို အာမခံမပေးဖို့ ကန့်ကွက်ကြောင်း ဥပဒေ နှင့်အညီတင်ပြခြင်း၊ လျှောက်လဲချက်ပေးခြင်းပြုသည်။ သေဒဏ်၊ တစ်သက်တစ်ကျွန်းဒဏ် ချမှတ်ထိုက်သည့် ပြစ်မှုကို ကျူးလွန်ကြောင်းဖြင့် စွပ်စွဲခံရသူမဟုတ်ပါက၊ အာမခံပေးလိုက်လျှင် စွပ်စွဲခံရသူသည် ထွက်ပြေး တိမ်းရှောင်သွားရန် အကြောင်း ရှိ၊ မရှိ၊ နောက်ထပ် ရာဇဝတ်ပြစ်မှုတစ်စုံတစ်ရာ ထပ်မံကျူးလွန်ရန် အကြောင်း ရှိ၊ မရှိ၊ တင်ပြထားသည့် တရားလိုပြ သက် သေများကို ဖျက်လိုဖျက်ဆီးပြုရန် အကြောင်း ရှိ-မရှိ သက်ဆိုင်ရာ ရဲအရာရှိ [မှုခင်းမှတ်တမ်း အရာရှိ (CRO) ] ထံသို့ သဘောထားမှတ်ချက်များ တောင်းခံရယူသည်။
ဖော်ပြပါ အချက်သုံးချက်တွင် တစ်ချက်ချက်နှင့်ငြိစွန်းနေကြောင်းတွေ့ရလျှင် အာမခံမပေးခြင်းသည် ခြွင်းချက်ဆိုသောမူအရ အာမခံမပေးသင့်ကြောင်း ခိုင်လုံသော အထောက်အထားများဖြင့် တင်ပြခြင်း၊ လျှောက်လဲချက်ပေးခြင်းပြုသည်။ တရားရုံးများက အာမခံမပေး။ ဖော်ပြပါ အချက်သုံးချက်စလုံးနှင့်ငြိစွန်းခြင်းမရှိခဲ့သော်၊ ထို့ပြင်စွပ်စွဲခံရသူသည် အမျိုးသမီးဖြစ်နေခဲ့သော်၊ အသက်အရွယ်ကြီးရင့်၍ အိုမင်းမစွမ်း၊ ချည့်နဲ့သူဖြစ်ခဲ့သော်၊ ကျန်းမာရေးချို့တဲ့သူဖြစ်ကြောင်း သက်ဆိုင်ရာ ဆရာဝန်၏ ခိုင်မာသောဆေးစာကို တင်ပြနိုင်ခဲ့သော် အာမခံပေးခြင်းသည် အခြေခံမူ ဖြစ်သည်ဆိုသော 'မူ' အရ လုံလောက်သောခံဝန်သူများဖြင့် အာမခံပေးမည် ဆိုလျှင် ကန့်ကွက်ရန် မရှိပါကြောင်းတင်ပြခြင်း၊ လျှောက် လဲချက်ပေးခြင်းပြုသည်။ တရားရုံးများကလည်း အာမခံ ပေးသည်။
တရားစီရင်ရေးလမ်းကြောင်း တိမ်းစောင်းစေရာ ရောက်ခြင်း
မှုခင်းတစ်ရပ်ကို ရဲတပ်ဖွဲ့စခန်းက စုံစမ်းထောက် လှမ်းခြင်း၊ တရားရုံးက စစ်ဆေးကြားနာခြင်း ပြုရသည့် ဖြစ်စဉ်တွင် စွပ်စွဲခံရသူကို အာမခံပေးခြင်း၊ မပေးခြင်း ကိစ္စသည် အရေးကြီးသော ဖြစ်စဉ်တစ်ရပ်အဖြစ် ပါရှိနေသည်။ စွပ်စွဲခံရသူက အာမခံလိုချင်သည်၊ အချုပ်လွှတ် ထုချေရှင်းလင်းခွင့် ရရှိလိုသည်။ စွပ်စွဲသူတရား လိုဘက်က စွပ်စွဲခံရသူ အာမခံရရှိသွားမည်ကို မလို
လား။ အချုပ်နှင့်ရှိနေစေချင်သည်။ ရဲစခန်းနှင့် တရား ရုံးတို့က ဆုံးဖြတ်ချက်တစ်ခုကို မလွဲမသွေ ချမှတ်ကြ ရသည်။ တရားစီရင်ရေးလမ်းကြောင်း တိမ်းစောင်း သည်ဆိုရာတွင် အာမခံပေးခြင်း၊ မပေးခြင်းကို ဥပဒေ နှင့်အညီ ဆောင်ရွက်ခြင်းမရှိသည်ကလည်း အချက် တစ်ချက်ပင်ဖြစ်သည်။ အာမခံပေးခြင်း၊ မပေးခြင်း ကိစ္စသည် တရားသူကြီးများတွင်သာ တာဝန်ရှိသည် မဟုတ် အမှုကိုစတင်စစ်ဆေးရသည့် ရဲအရာရှိများ၊ တရားရုံးသို့ သဘောထားမှတ်ချက်၊ ဥပဒေအကြံပြု ချက်များ တင်ပြပေးရသည့် ဥပဒေအရာရှိများတွင်လည်း တာဝန်ရှိကြသည်။
တာဝန်ကိုယ်စီရှိကြသည့် တရားသူကြီး၊ ဥပဒေ အရာရှိ၊ အမှုစစ်ရဲအရာရှိတို့သည် အာမခံပေးခြင်း ကိစ္စနှင့်စပ်လျဉ်းပြီး ယေဘုယျပြဋ္ဌာန်းချက်ဖြစ်သည့် ကျင့်ထုံးဥပဒေ နောက်ဆက်တွဲဇယား ၂ တွင် ဖော်ပြချက်များ သက်သက်ကိုသာ အပေါ်ယံကြည့်၍ ဆောင်ရွက်ခြင်းများကို ရှောင်ရှားသင့်သည်။ အထူးပြဋ္ဌာန်း ချက်ဖြစ်သည့် ကျင့်ထုံးဥပဒေပုဒ်မ ၄၉၆ နှင့်၄၉၇ တို့ပါ ပြဋ္ဌာန်းချက်များနှင့်အညီ လိုက်နာဆောင်ရွက် ဆုံးဖြတ်သင့်သည်။ တိုင်ကြားသူကဘယ်သူလဲ၊ တိုင် ကြားခံရသူက ဘယ်ဝါလဲဆိုသည့် ပုဂ္ဂိုလ်မျက်နှာကို မကြည့်မမြင်ဘဲ ဥပဒေပြဋ္ဌာန်းချက်ကို မျက်နှာမူပြီး ဆင်ခြင်တုံတရားဖြင့် ရဲရဲဝံ့ဝံ့သတ္တိရှိရှိ ဆောင်ရွက် နိုင်ရမည်။
ကျူးလွန်သည့်ပြစ်မှုခြင်းတူသော်လည်း ကျူးလွန်ပုံကျူးလွန်နည်း မတူခြင်း၊ ပြစ်မှုကျူးလွန်သူ၏ အသက်၊ လိင်စသည့် ကွဲပြားမှုတို့ကြောင့် တစ်မှုနှင့်တစ်မှု အာမခံ ပေးခြင်း မပေးခြင်းကိစ္စ ကွဲပြားခြားနားမှုရှိမည်ကို ပြည်သူတွေ နားလည်သိရှိပါသည်။ အာမခံမပေးခြင်း သည် ခြွင်းချက်သာ ဖြစ်သည်။ ခြွင်းချက်အရ အာမခံ မပေးခြင်းကို မပြောလိုပါ။ အာမခံမပေးခြင်းသည် 'မူ'
တစ်ရပ် ဖြစ်နေပြီး အာမခံပေးခြင်းက 'ခြွင်းချက်' သဖွယ် ဖြစ်သွားမည်ကိုတော့ လိုလားကြမည် မဟုတ်ပါ။
အခြေခံမူကို ထိန်းသိမ်းကြပါစို့
အာမခံပေးခြင်းကိစ္စ လိုက်နာရမည့်မူများကို ဥပဒေက ရှင်းလင်းတိကျစွာ ပြဋ္ဌာန်းထားရှိပြီး ဖြစ်သည်။ စီရင်ထုံးများက တိကျပြတ်သားစွာ လမ်းညွှန်ဆုံးဖြတ် ထားပြီးဖြစ်သည်။ ခံယူချက်၊ အတွေးအမြင်၊ စိတ်သဘော ထားများ တူညီစွာထားရှိလျက် ဥပဒေပြဋ္ဌာန်းချက်၊ စီရင်ထုံးပါ လမ်းညွှန်ဆုံးဖြတ်ချက်များနှင့်အညီ ဆောင်ရွက်သွားကြမည်ဆိုပါက၊ 'အာမခံပေးခြင်းသည် အခြေခံမူ၊ အာမခံမပေးငြင်းဆိုခြင်းသည် ခြွင်းချက်သာဖြစ် သည်' ဆိုသော မူသည်၊ ထာဝရရှင်သန် ကြီးထွားနေ မည်ဖြစ်ကြောင်းပါ။
နိုင်ငံတော်အပေါ် သစ္စာထား၊ ပြည်သူအပေါ်မေတ္တာ ပွား၍ တရားနှင့်အညီ ဆောင်ရွက်နိုင်ကြပါစေ။
တရားရေးမဏ္ဍိုင် အစဉ်ထာဝရကြံ့ခိုင် တည့်မတ်နေစေရေး ဆောင်ရွက်ပေးနိုင်ကြပါစေ။
ဥပဒေနှင့်အညီ တရားသဖြင့် ဖြောင့်မတ်မှန်ကန်စွာ ရှုမြင်ဆင်ခြင် ဆောင်ရွက်နိုင်ကြပါစေ။
