စာချုပ်စာတမ်းတစ်ရပ်ကို မှတ်ပုံတင်ရာတွင် မှတ်ပုံတင် အရာရှိက ငြင်းဆိုလျှင် ဆက်လက် ဆောင်ရွက်ရန်နည်းလမ်း။
စာချုပ်စာတမ်းတစ်ရပ်ကို မှတ်ပုံတင်ရန် တင်ပြလာပါက မှတ်ပုံတင်အရာရှိက စိစစ်ရမည့် အချက်များ ။
စာချုပ်စာတမ်းမှတ်ပုံတင်ဥပဒေ ပုဒ်မ - ၃၅ နှင့် နည်းဥပဒေ - - ၄၃ တွင်ပြဌာန်းထားပါသည်။ စိစစ်ရမည့်အချက်များမှာ
(၁) စာချုပ်စာတမ်းကို ဆိုင်ရာရုံးတွင် တင်သွင်းကြောင်း (ပုဒ်မ - ၂၈၊၂၉၊၃၀)
(၂) မူရင်းအနေနှင့်ဖြစ်စေ၊ မိတ္တူဖြတ်ပိုင်း အနေနှင့်ဖြစ်စေ၊ မူရင်းခွဲအနေနှင့်ဖြစ်စေ၊ ထိုက်သင့်သော တံဆိပ်ခေါင်း ပါကြောင်း၊ မပါကြောင်း၊ သို့မဟုတ် တံဆိပ်ခေါင်း လွတ်ငြိမ်းကြောင်း၊
(၃) ၄င်းစာချုပ်စာတမ်းမှာ ရုံးသုံးဘာသာစကား နှင့်ရေးမရေး၊ မရေးလျှင် ဘာသာပြန်ချက် နှင့် လက်ခံအမှန် ပူးတွဲ ပါ၊ မပါ ( ပုဒ်မ - ၆၂)
(၄) စာကြောင်းကြားများတွင် ရေးသွင်းချက်များပါလျှင် ပုဒ်မ - ၂၀ အတိုင်းလိုက်နာဆောင် ရွက်ခြင်း ရှိ မရှိ။
(၅) မရွှေ့မပြောင်းနိုင်သောပစ္စည်း နှင့် သက်ဆိုင်လျှင် ၄င်းပစ္စည်းမျိုးမည်များကိုဖော်ပြသည့် အကြောင်းအရာမှာ လုံလောက်ကြောင်း၊ မလုံလောက်ကြောင်း၊ (ပုဒ်မ - ၂၁)
(၆) ၄င်းစာချုပ်စာတမ်းကို တင်သွင်းခွင့်ရသည့်နေ့ရက်အတွင်း တင်သွင်းကြောင်း ၊ မတင်သွင်းကြောင်း (ပုဒ်မ - ၂၃၊ ၂၄၊၂၆)
(၇) ၄င်းစာချုပ်စာတမ်းကို တင်သွင်းပိုင်သူက တင်သွင်းကြောင်း ၊ မတင်သွင်းကြောင်း (ပုဒ်မ ၃၂)
(၈) စာချုပ်ချုပ်ဆိုသူတို့အနက် တစ်စုံတစ်ရောက်က ငြင်းဆိုခြင်း ရှိမရှိ၊ (ပုဒ်မ ၃၅)
(၉) ချုပ်ဆိုသူသည် အရွယ် မရောက်သေးသူ၊ စိတ်မနှံသူ ၊ ရူးသွပ်သူ ဟုတ်မဟုတ်၊ (ပုဒ်မ ၃၅)
(၁၀) စာချုပ်ချုပ်သူသေဆုံး၍ ၄င်း၏ ကိုယ်စား (သို့) လွှဲအပ်ခံရသူက မချုပ်ဆိုရကြောင်း ငြင်းဆိုခြင်း ရှိမရှိ (ပုဒ်မ -၃၅)
-------
အထက်ပါ အချက်အလက်များပြည့်စုံပြီး စာချုပ်ကိုချုပ်ဆိုကြောင်း ၀န်ခံသည့်အချက်တွင် မှတ်ပုံတင် အရာရှိသည် ပုဒ်မ - ၃၅ အရ ယင်းစာချုပ်စာတမ်းကို မှတ်ပုံတင်ရမည် (shall register) ဖြစ်ပါသည်။
သို့ဖြစ်ရာ စာချုပ်စာတမ်းမှတ်ပုံတင်အရာရှိက စာချုပ်စာတမ်းတစ်ရပ်ကို မှတ်ပုံတင်ပေးရန် ငြင်းပယ်နိုင်သည့်အကြောင်းများသည် အထက်ပါ အချက် (၁၀)ချက်သာ ရှိကြောင်း လေ့လာတွေ့ရှိရပါသည်။
-----
မှတ်ပုံတင်အရာရှိက မှတ်ပုံတင်ပေးရန် ငြင်းပယ်လျှင် ဆောင်ရွက်ရန်နည်းလမ်း
ငြင်းဆိုသည့် မှတ်ပုံတင်အရာရှိ၏ အထက်အရာရှိထံ ပုဒ်မ - ၇၂(၁) အရ ရက်ပေါင်း ၃၀ အတွင်း အယူခံဝင်ရန်ဖြစ်ပြီး ယင်းအယူခံတွင် ထပ်မံငြင်းပယ်ခြင်းခံရပါက
ပုဒ်မ - ၇၇(၁) အရ ဆိုင်ရာ တရားရုံးတွင် တရားစွဲဆိုနိုင်သည်
(သို့မဟုတ်)
အာဏာပေးစာချွန်တော် အမိန့် လျှောက်ထားရယူနိုင်ပါသည်။
-----
ပုဒ်မ -၇၇(၁) အရ အမှုတွင် ရုံးခွန်
ပုဒ်မ - ၇၇(၁) အရ တရားတစ်ထုံးဆိုသည်မှာ "မှတ်ပုံတင်ပေးစေလိုမှု" ဖြစ်ပါသည်။ ရုံးခွန် အက်ဥပဒေ ဇယား ၂ အမှတ်စဉ် - ၁၇(၄) အရ ရုံးခွန်ထမ်းဆောင်ရန်ဖြစ်သည်လို့ ဆရာ ဦးမြက သောင်းပြောင်းထွေလာ အမှတ် - ၃ မှာဆိုပါတယ်။
ပုဒ်မ ၇၇(၁) အရ အမှုတွင်စိစစ်ရမည့်အချက်
ထို့ပြင် ထိုအမှုများမှာ တရားရုံးက စိစစ်ရမည့်ကိစ္စကို ဆရာဦးမြက အောက်ပါအတိုင်းဆိုပါတယ်-"အချင်းဖြစ်စာချုပ်ကို တရားပြိုင်က ချုပ်ဆိုတဲ့အကြောင်း၊ မှတ်ပုံတင်ပေးဖို့ ဥပဒေနှင့်အညီ တင်ပြခဲ့တဲ့ အကြောင်းကိုသာ တရားလိုဘက်က သက်သေပြရမှာဖြစ်ပါတယ်။ ဒီအမှုမျိုးမှာ စာချုပ်တရားဝင်မ၀င်ကို စိစစ်ဖို့မလိုပါဘူး။ ကာယကံရှင်များ ချုပ်ဆိုခြင်း ဟုတ်မဟုတ်သာ စိစစ်ဖို့ဖြစ်ပါတယ်"
မည်သူ့ကို တရားဘက်ထားမည်နည်း။
မှတ်ပုံတင်အက်ဥပဒေပုဒ်မ (၇၇)အရ မှတ်ပုံတင်အရာရှိကိုစွဲရမှာဖြစ်တယ်။ အဲဒါက ပဋိညာဉ်အတိုင်းဆောင်ရွက်ပေးစေလိုမှု စွဲရမှာမဟုတ်ဘူး မှတ်ပုံတင်ပေးရန်စွဲရမှာဖြစ်တယ်။ ( ဦးမြ၊ တရ၀ အရည်အသွေးမြင့်သင်တန်းပို့ချချက် စာ ၁၂၆)
---------
ပုဒ်မ - ၇၇(၁) နှင့် အာဏာပေးစာချွန်တော် မည်သည်က ပိုမိုထိရောက်မည်နည်း။
ကျနော့်အမြင့်တော့ မှတ်ပုံတင်အရာရှိအပေါ် အာဏာပေးစာချွန်တော်အမိန့် တက်ရောက်ခြင်းက ထိရောက်မြန်ဆန်မည်ဟု ယူဆမိပါသည်။လေးစားစွာဖြင့် ။
Tun Myo Htay
