ပြန်လှန်စစ်မေးရာတွင် တားမြစ်ကန့်သတ်ထားသည့် အချက်များကို လေ့လာခြင်း (အပိုင်း-၂)
မနေ့က ပြန်လှန်စစ်မေးရာတွင် တားမြစ် ကန့်သတ်ထားသည့် အချက်များကို လေ့လာခြင်း (အပိုင်း-၁)ကို ဆွေးနွေးတင်ပြ ခဲ့ပြီးဖြစ်လို့ ယနေ့တော့ အပိုင်း(၂)အဖြစ် ဆက်လက်ဆွေးနွေး ပါရစေ။ မနေ့က သက်သေခံ ဥပဒေ ပုဒ်မ ၅၆၊ ၅၇ နဲ့ ပတ်သက်တဲ့ အချက်တွေကို ဆွေးနွေးခဲ့တာပါ။ ဒီနေ့ ဆွေးနွေး တင်ပြမယ့် အကြောင်းအရာ တွေကတော့ ပြန်လှန်စစ်မေးရာမှာ တားမြစ်ထားတဲ့ ကန့်သတ်ချက် များအကြောင်း ပြဋ္ဌာန်းပါရှိတဲ့ သက်သေခံ ဥပဒေ ပုဒ်မ ၁၂၂၊ ၁၂၃၊ ၁၂၄၊ ၁၂၅၊ ၁၂၆ တို့အကြောင်းကို ဆက်လက် ဆွေးနွေးသွားမှာပဲ ဖြစ်ပါတယ်။
* သက်သေခံဥပဒေ ပုဒ်မ ၁၂၂
---------------------------------------- သက်သေခံဥပဒေ ပုဒ်မ ၁၂၂ အရ အိမ်ထောင် လက်ရှိဖြစ်သူ (သို့မဟုတ်) အိမ်ထောင်ပြုခဲ့ဖူးသူ တစ်ဦးကို ၎င်းနဲ့ လက်ထပ်ပေါင်းသင်းနေသူ (သို့မဟုတ်) ပေါင်းသင်းခဲ့ဖူးသူက လက်ထပ်ပေါင်းသင်း နေစဉ် ကာလအတွင်း ဆက်သွယ်မှု (ပြောဆိုခဲ့သော စကား) တစ်ရပ်ရပ်ကို ထုတ်ဖော် ပြောဆိုစေရန် အတင်းအကျပ် ပြန်လှန် မေးမြန်းခြင်း ပြုလို့ မရပါဘူး။
- ဒါ့အပြင် အိမ်ထောင်ဖက် အချင်းချင်း ဖြစ်ပွားကြတဲ့ (လင်မယား ကွာရှင်းလိုမှု ကဲ့သို့သော) တရားမမှုများ နဲ့ အိမ်ထောင်ဖက် တစ်ဦးက တစ်ဦးအပေါ် ကျူးလွန်တဲ့ (ရိုက်နှက်မှု၊ နှိပ်စက်ညှဉ်းပန်းမှု၊ ချုပ်နှောင်ထားမှု ကဲ့သို့သော) ပြစ်မှုဆိုင်ရာ မှုခင်းများ မှတစ်ပါး ပြောဆိုသူက ဖြစ်စေ၊ သူ့အကျိုး ဆက်ခံသူကဖြစ်စေ သဘောမတူရင်လည်း အထက်ပါအတိုင်း ဆက်သွယ် ပြောဆိုခဲ့သော စကားတွေကို ထုတ်ဖော်ပြောဆိုခွင့် မရှိသလို၊ သက်သေခံ တင်ပြခွင့်လည်း ရှိမှာ မဟုတ်ပါဘူး။
ဒီပုဒ်မမှာ ခြွင်းချက်(၃)ရပ်ကို တွေ့နိုင်မှာ ဖြစ်ပါတယ်။ ပြောကြားသူ (သို့မဟုတ်) ၎င်းရဲ့ အကျိုးဆက်ခံသူက လင်မယား လက်ထပ် ပေါင်းသင်းနေဆဲ ပြောဆိုခဲ့ကြတဲ့ စကားတွေကို ဖြေဆိုသက်သေခံဖို့ရာ သဘောတူလျှင် ဖြစ်စေ၊ လင်မယားချင်း ဖြစ်ပွားတဲ့ တရားမမှုမှာ ဖြစ်စေ၊ အိမ်ထောင်ဖက် တစ်ဦးက တစ်ဦးအပေါ် စွဲဆိုတဲ့ ပြစ်မှုဆိုင်ရာမှုခင်းမှာ ဖြစ်စေ ၄င်းတို့ ပြောဆိုခဲ့ကြတဲ့ စကားတွေကို ထုတ်ဖော်ပြောဆိုစေရန် တစ်ဘက်အမှုသည်ရဲ့ သဘောတူချက် ရယူဖို့ မလိုဘဲ၊ သက်သေခံ တင်ပြခွင့် ရရှိမှာ ဖြစ်ပါတယ်။
ဒီပုဒ်မ ၁၂၂ ဟာ အိမ်ထောင်စု သာယာရေးကို ပျက်ပြားထိခိုက်မှု မရှိစေဖို့ ရည်ရွယ်ကာ တားမြစ် ကန့်သတ်ထားတဲ့ ပုဒ်မ ဖြစ်တယ်လို့ လေ့လာမှတ်သား ရပါတယ်။ ဒီလို လင်မယားချင်း ပြောဆိုတဲ့စကားကို အတင်းအကျပ် ဖြေဆိုစေခွင့် မရှိဘူးဆိုရင် အခြားနည်း သက်သေခံ တင်ပြခွင့်မျိုး ရှိနိုင်ပါသေးသလားလို့ မေးစရာ ရှိပါတယ်။ သက်သေခံ တင်ပြခွင့် ရှိနိုင်ပါသေးတယ်။ ဘယ်လို တင်ပြနိုင်သလဲဆိုရင် ထိုလင်မယားတို့ ပြောဆိုခဲ့ကြတဲ့ စကားကို ဘေးကနေ အမှန်တကယ် ကြားသိခဲ့ရတဲ့ အခြားသူတစ်ဦးဦး အနေနဲ့ ရုံးမှာ သက်သေအဖြစ် အစစ်ဆေးခံပြီး ထိုလင်မယားရဲ့ ပြောစကားတွေကို ထင်ရှားအောင် တင်ပြထွက်ဆို နိုင်ခွင့်ရှိမှာ ဖြစ်ပါတယ်။
* သက်သေခံဥပဒေ ပုဒ်မ ၁၂၃
---------------------------------------သက်သေခံဥပဒေ ပုဒ်မ ၁၂၃ မှာတော့ နိုင်ငံတော်ရေးရာ ကိစ္စရပ်တွေနဲ့ စပ်လျဉ်းလို့ ထုတ်ပြန် ကြေညာခြင်း မပြုတဲ့ ရုံးမှတ်တမ်းများပါ အချက်တွေကို သက်ဆိုင်ရာ ဌာနအကြီးအကဲရဲ့ ခွင့်ပြုချက် မရဘဲ မည်သူကမျှ သက်သေခံ တင်ပြခွင့် မရှိကြောင်း၊ ဌာနအကြီးအကဲက သင့်လျော်တယ် ထင်မြင်တဲ့အတိုင်း ထိုခွင့်ပြုချက်ကို ပေးနိုင်သလို၊ မပေးဘဲလည်း နေနိုင်ကြောင်း ပြဋ္ဌာန်းပါရှိ ပါတယ်။ ဒီပုဒ်မဟာ ပုဂ္ဂလိက အခွင့်အရေးထက် နိုင်ငံတော်ရဲ့ အခွင့်အရေးက ပိုမို အရေးကြီးတာဖြစ်လို့ ဒီလိုမျိုး နိုင်ငံတော်ရေးရာ မှတ်တမ်းမှတ်ရာတွေကို ထုတ်ဖော်ခြင်းအားဖြင့် အများပြည်သူ အကျိုးကို ထိခိုက်နစ်နာခြင်းမှ ကာကွယ်ရန် ရည်ရွယ်ခြင်းလည်း ဖြစ်ပါတယ်။ ထုတ်ပြန်ကြေညာပြီး ဖြစ်တဲ့ မှတ်တမ်းမှတ်ရာ ကိစ္စဖြစ်မယ် ဆိုရင်တော့ ဒီပုဒ်မနဲ့ အကျုံးဝင်မှာ မဟုတ်ပါဘူး။
- ဦးလောရုံ နှင့် နိုင်ငံတော် (၁၉၅၄၊ မတစ (လွှတ်တော်)၊ စာ-၁၁၆)မှာ__ "တိုင်းရေးပြည်မှုနှင့် စပ်ဆိုင်သော စာရွက်စာတမ်းများကို သက်သေခံ တင်ပြရန် ခွင့်ပြုမည်၊ မပြုမည်မှာ ဌာနဆိုင်ရာ အကြီးအကဲ၏ ဆင်ခြင်တုံသဘောအရ ဆုံးဖြတ်ရမည့် အခွင့်အရေး ဖြစ်သည်။ အဆိုပါ အခွင့်အရေးကို ရရှိရန် တရားရုံးသို့ ကျမ်းကျိန်ချက် တင်သွင်းရန် လိုအပ်သည်ဟု သက်သေခံဥပဒေ ပုဒ်မ ၁၂၃၊ ၁၂၄၊ ၁၆၂ တွင် ပြဋ္ဌာန်းထားခြင်း မရှိပေ" လို့ စီရင်ထုံးဖွဲ့ထားပါတယ်။
* သက်သေခံဥပဒေ ပုဒ်မ ၁၂၄
----------------------------------ပြည်သူ့ဝန်ထမ်းတစ်ဦးက မိမိအား ရာထူး အလုပ်ဝတ္တရားအလျောက် ယုံကြည်စိတ်ချလို့ အသိပေး ထားတဲ့ အချက်အလက်တွေကို ထုတ်ဖော်ပြောဆိုခြင်းအားဖြင့် အများပြည်သူ့အကျိုး ထိခိုက်နစ်နာမယ်လို့ ထင်မြင်ယူဆလျှင် ထိုပြည်သူ့ဝန်ထမ်းအနေနဲ့ အဆိုပါအချက်တွေကို အတင်းအကျပ် ထုတ်ဖော်ပြောဆို စေခြင်း မပြုရကြောင်း သက်သေခံဥပဒေ ပုဒ်မ ၁၂၄ မှာ ပြဋ္ဌာန်းထားပါတယ်။ ဒီလို ကန့်သတ်တားမြစ် ထားတဲ့အတွက် (ပြန်လှန်မေးခွန်း မေးမြန်းလင့်ကစား) ထိုပြည်သူ့ဝန်ထမ်းက အများပြည်သူ့အကျိုးကို ချင့်ချိန်ပြီး ဖြေလိုမှ ဖြေပေးမှာဖြစ်ပြီး၊ မဖြေလိုလျှင် အတင်းအကျပ် ဖြေဆိုဖို့ တောင်းဆိုလို့ မရဘူး ဆိုတာကို သိထားရမှာ ဖြစ်ပါတယ်။
* သက်သေခံဥပဒေ ပုဒ်မ ၁၂၅
----------------------------------ပြစ်မှုတစ်ခုခု ကျူးလွန်ခြင်းနဲ့ စပ်လျဉ်းတဲ့ သတင်းကို မည်သူ့ထံက ရရှိကြောင်း ပြောဆိုစေရန် မည်သည့် တရားသူကြီး (သို့မဟုတ်) ရဲအရာရှိကိုမျှ အတင်းအကျပ်ပြုကာ ပြန်လှန်မေးခွန်း မေးမြန်းခြင်း မပြုရပါ။ ပြည်သူ့အခွန်ငွေ ယုတ်လျော့စေရန် ပြစ်မှုတစ်ခုခု ကျူးလွန်ခြင်းနဲ့ စပ်လျဉ်းတဲ့ သတင်းကို မည်သူ့ထံမှ ရရှိကြောင်းကို ပြောဆိုစေရန်လည်း မည်သည့် အခွန်အရာရှိကိုမျှ အတင်းအကျပ် မပြုရကြောင်း သက်သေခံဥပဒေ ပုဒ်မ ၁၂၅ မှာ ပြဋ္ဌာန်းပါရှိပါတယ်။
အတင်းအကျပ် မပြုရ ဆိုတာက ပြန်လှန်မေးမြန်းခွင့် မရှိဘူးလို့ ဆိုလိုတာ မဟုတ်ပါဘူး။ မေးလိုလို့ ပြန်လှန်မေးမြန်းခဲ့ရင် တရားရုံးက ထိုမေးခွန်းအပေါ် ဖြေဆိုလိုမှ ဖြေဆိုနိုင်ကြောင်း၊ မဖြေဘဲလည်း နေနိုင်ကြောင်းကို ၀င်ရောက်ရှင်းပြပေးလို့ အမှုသည် (သို့မဟုတ်) သက်သေက မဖြေဆိုနိုင်ကြောင်း တင်ပြလျှင် ထိုအတိုင်းသာ ရုံးက မှတ်တမ်းတင်ပေးထားမှာ ဖြစ်ပါတယ်။ တကယ်လို့ ရုံးက ရှင်းပြ ပေးပါလျက်နဲ့မှ ထိုသူက ပြစ်မှုကျူးလွန်ခြင်းနဲ့ စပ်လျဉ်းတဲ့ သတင်းကို မည်သူ့ထံက ရရှိကြောင်းကို ထုတ်ဖော် ပြောဆိုခဲ့မယ် ဆိုရင်တော့လည်း ရုံးက ထိုသူဟာ ပုဒ်မ ၁၂၅ ပါ အခွင့်အရေးကို စွန့်ပယ်ခြင်းသာ ဖြစ်တယ်လို့ ယူဆမှာ ဖြစ်ပြီး၊ ၄င်း၏ထွက်ဆိုချက်အတိုင်း မှတ်တမ်းတင်ပေး မှာပဲ ဖြစ်ပါတယ်။
* သက်သေခံဥပဒေ ပုဒ်မ ၁၂၆
----------------------------------သက်သေခံဥပဒေ ပုဒ်မ ၁၂၆ အရ ရှေ့နေတစ်ဦးဟာ မိမိရဲ့အမှုသည်က သဘောတူညီခြင်း မရှိဘူးဆိုရင် ထိုအမှုသည်ရဲ့ ရှေ့နေအဖြစ် ဆောင်ရွက်နေစဉ် အတွင်း မိမိအား အမှုသည်က ပြောဆို၊ ရေးသားပေးလို့ သိရှိရတဲ့ အချက်တွေ၊ မိမိအား ပေးခဲ့တဲ့ ၎င်းရဲ့ အကြံဥာဏ်တွေကို မည်သည့်အခါတွင်မျှ ထုတ်ဖော်ပြောဆိုခွင့် မရှိပါဘူး။ ဒါပေမယ့်လို့ ခြွင်းချက်အနေနဲ့ - ဥပဒေနဲ့ မညီတဲ့ အကြံအစည် ဖြစ်မြောက် စေရန် အလို့ငှာ ပြောဆို၊ ရေးသားချက်၊ ရှေ့နေက တွေ့ရှိခဲ့ရတဲ့ အချက်တစ်ခုခုအရ မိမိအမှုသည်ဟာ ပြစ်မှု (သို့မဟုတ်) လိမ်လည်မှု တစ်ခုခုကို ထိုအမှုသည်ရဲ့ ရှေ့နေအဖြစ်သို့ ဆောင်ရွက်ခြင်း စတင်ပြီး နောက်ပိုင်းမှာ ကျူးလွန်ထားကြောင်း ပေါ်လွင်ရင်တော့ အဲဒီလို တွေ့ရှိရတဲ့ အချက်တွေကိုတော့ ထုတ်ဖော်ပြောဆိုခြင်း မပြုဘဲ နေခွင့်ရှိမှာ မဟုတ်ပါဘူး။ ပြန်လှန်မေးမြန်းလာခဲ့ရင် ထုတ်ဖော်ပြောဆို ရမည်သာ ဖြစ်ပါတယ်။
ဥပမာ ဆိုရရင်__ အမှုသည် A က ရှေ့နေ B အား "ကျွန်တော် လိမ်လည်အတုပြုမှုကို ကျူးလွန်ခဲ့လို့ ကျွန်တော့်အတွက် ခုခံချေပပေးပါ" လို့ ပြောရင် ပြစ်မှုကျူးလွန်ကြောင်း ထင်ရှားသူအတွက် ခုခံချေပပေးခြင်းဟာ ပြစ်မှုမကင်းတဲ့ အကြံအစည် မဟုတ်တဲ့အတွက် ထိုပြောဆိုချက်ကို ရှေ့နေက ထုတ်ဖော် ပြောဆိုခွင့် ရှိမှာ မဟုတ်ပါဘူး။
ဒါပေမယ့်လို့ အမှုသည် A က ရှေ့နေ B အား "ကျွန်တော်ရဲ့ လိမ်လည် အတုပြုလုပ်ထားတဲ့ စာချုပ်နဲ့ တစ်ဘက် အမှုသည်ဆီက ပစ္စည်းကို ရယူချင်ပါတယ်။ ဒီစာချုပ်နဲ့ တရားစွဲဆိုပေးပါ" လို့ ပြောဆိုခဲ့ရင်တော့ အဲဒီ ပြောဆိုချက်ဟာ ပြစ်မှုမကင်းတဲ့ အကြံအစည် ဖြစ်မြောက်ရေး အတွက် ပြောဆိုချက် ဖြစ်တာမို့ ရှေ့နေက မထုတ်ဖော်၊ မပြောဆိုဘဲ နေခွင့်ရှိမှာ မဟုတ်ပါဘူး။ ထုတ်ဖော် ပြောဆိုရမည်သာ ဖြစ်ပါတယ်။
နောက်ဥပမာတစ်ခုက A ဟာ အလွဲသုံးစားမှုနဲ့ တရားစွဲဆိုခံရလို့ ရှေ့နေ B ကို မိမိအား ခုခံပေးရန် ငှားရမ်းတယ်။ B ဟာ အမှု လိုက်ပါဆောင်ရွက် နေစဉ်အတွင်းမှာ A ရဲ့ စာရင်းစာအုပ်မှာ အလွဲသုံးစား ပြုထားတယ် ဆိုတဲ့ ငွေနဲ့စပ်လျဉ်းသော (မိမိအား ရှေ့နေငှားရမ်းစက မတွေ့ခဲ့ရတဲ့) ရေးသွင်းချက်ကို ထိုစာရင်းစာအုပ်မှာ တွေ့မြင်ရတယ်။ အဲဒီလို တွေ့မြင်ရတဲ့ အကြောင်းခြင်းရာဟာ မိမိ ရှေ့နေလိုက်ပါ ဆောင်ရွက်နေစဉ်အတွင်း သိရှိရတဲ့ အကြောင်းခြင်းရာ ဖြစ်ပြီး အမှုစတင် ဆောင်ရွက်သည့် နောက်ပိုင်းမှ လိမ်လည်လှည့်ဖြားမှု ကျူးလွန်ထားကြောင်း ပေါ်လွင်တဲ့အခါမှာ ထိုအကြောင်းခြင်းရာကို မထုတ်ဖော် မပြောဆိုဘဲ နေခွင့်မရှိပါဘူး။
ယခုတင်ပြခဲ့တဲ့ ဥပဒေ ပုဒ်မများကတော့ ပြန်လှန်မေးမြန်းခွင့် လုံးဝ မရှိကြောင်း တားမြစ်ပိတ်ပင် ထားတဲ့ ပုဒ်မမျိုး မဟုတ်ဘဲ၊ မေးလိုက မေးမြန်းနိုင်ခွင့် ရှိပြီး မိမိမေးတဲ့ မေးခွန်းကို ဖြေဆိုရမည့်သူက ဖြေဆို သက်သေခံစေဖို့ရာ မိမိက အတင်းအကျပ် ပြုလို့ မရနိုင်ဘူး ဆိုတာကိုပဲ မှတ်သားထားရမှာ ဖြစ်ပါတယ်။ ဥပဒေ ပညာ လေ့လာလိုက်စားသူတို့ သိရှိမှတ်သား လိုက်နာသင့်တဲ့ အချက်များကို တူရာ စုစည်းပြီး ဖော်ပြပေးထားခြင်း ဖြစ်လို့ ဖတ်ရှုသူ မှတ်သားသူတို့အဖို့ အကျိုးရှိစေမယ်လို့ ယုံကြည်ပါတယ်။
ပြန်လှန်စစ်မေးခြင်း ဆိုတာ လူတစ်ယောက်ရဲ့ ထွက်ဆိုချက် မှန်၊မမှန် စမ်းသပ်ရာမှာ အထိရောက် ဆုံးသော လက်နက် ဖြစ်သလို၊ တိုက်ခိုက်တဲ့ ဓါး၊ ခုခံတဲ့ ဒိုင်း လည်း ဖြစ်တယ်လို့ ရှေးပညာရှင်တို့က ဆိုခဲ့ကြပါတယ်။ ဒီလို လက်နက်၊ ဓါး၊ ဒိုင်းတွေ သုံးပြီး စစ်တလင်း တရားခွင်မှာ အမှန်တရား အတွက် တိုက်ပွဲဝင် ကြတဲ့နေရာမှာ ပရိယာယ် သေနင်္ဂဟ နည်းနာတွေ အသုံးချကာ တိုက်ပွဲဝင်မယ်ဆိုရင် အောင်မြင်တဲ့ ပန်းတိုင်ကို ရရှိနိုင်မှာ ဖြစ်ပါတယ်။ နာမည်ကျော် အမေရိကန် ရှေ့နေကြီး Wellman က "ရှေ့နေကောင်း တစ်ယောက်သည် ဇာတ်ဆောင်ကောင်း တစ်ယောက်ပင် ဖြစ်သည်" လို့ မွှမ်းဆိုခဲ့ဖူးကြောင်း မှတ်သားခဲ့ ရပါတယ်။ ဇာတ်ဆောင်ကောင်းနှင့်တူသော ရှေ့နေကောင်း မြောက်များစွာ ပေါ်ထွန်းလာ ပါစေကြောင်း ဆန္ဒပြုလိုက်ပါတယ်။ (အပိုင်း(၃)ကို ဆက်လက် ဖော်ပြပေးပါအုံးမယ်။)
လွှမ်းမိုးအောင် (တရားရေး)
