သက်သေကို ကော်မရှင်ဖြင့် စစ်ဆေးခြင်း အကြောင်း
တရားရုံး ရှေ့မှောက်မှာ ပြုလုပ်တဲ့ စုံစမ်းစစ်ဆေးမှု (သို့မဟုတ်) စစ်ဆေးစီရင်မှု တစ်ရပ်ရပ်မှာ အမှုသည် တစ်ဘက်ဘက်က ပြသတဲ့ သက်သေတစ်ဦး တစ်ယောက်ဟာ တစ်ခုခုသော အကြောင်းကြောင့် အမှုစစ်တရားရုံးသို့ လာရောက်နိုင်ခြင်းငှာ မစွမ်းသာတဲ့အခါမှာ အမှန်တရား ပေါ်ပေါက်စေရေး အတွက် ဒီသက်သေကို စစ်ဆေးမှ ဖြစ်မယ့် အခြေအနေ ပေါ်ပေါက်နေခဲ့ရင် ၎င်းသက်သေကို အခြားသော အာဏာရှိသည့် တရားသူကြီးတစ်ဦးက ကော်မရှင်နဲ့ စစ်ဆေးပေးနိုင်ဖို့ အမှုစစ်တရားသူကြီးက ကော်မရှင်စာ ထုတ်ဆင့်ပေးပြီး စစ်ဆေးစေခြင်း နည်းနဲ့ သက်သေခံချက်များ ရယူစေနိုင်ပါတယ်။
သက်သေကို ကော်မရှင်ဖြင့် စစ်ဆေးရန် ကျင့်ထုံးနည်းလမ်းများကို ပြစ်မှုဆိုင်ရာ ကျင့်ထုံးဥပဒေ ပုဒ်မ ၅၀၃ မှ ၅၀၈ အထိ (ပယ်ဖျက်ထားသော ပုဒ်မ ၅၀၄ မပါ) နဲ့ တရားရုံးများလက်စွဲ အပိုဒ် ၆၂၂၊ ၆၂၄ တို့မှာ လေ့လာနိုင်မှာ ဖြစ်ပါတယ်။ အကျယ်တ၀ံ့ လေ့လာကြည့်ပါမယ်။
ပြစ်မှုဆိုင်ရာ ကျင့်ထုံးဥပဒေအရ ပြုလုပ်တဲ့ စုံစမ်းစစ်ဆေးမှု၊ စစ်ဆေးစီရင်မှု (သို့မဟုတ်) အခြား မှုခင်း ဆောင်ရွက်မှု တစ်စုံတစ်ရာ အတောအတွင်းမှာ ဘယ်အချိန်အခါမဆို တရားဖြောင့်မှန်ရေးအတွက် သက်သေတစ်ဦးကို စစ်မေးဖို့ လိုအပ်တယ်၊ အမှုအခြေအနေအရ မလျော်ကန်သော ကြန့်ကြာမှု၊ စရိတ်ကုန်ကျမှု၊ အဆင်မပြေမှု မရှိဘဲနဲ့ ထိုသက်သေ လာရောက်ဖို့ မဖြစ်နိုင်ဘူးလို့ တရားရုံးက ထင်မြင်ယူဆရင် ထိုသက်သေ လာရောက်ခြင်းမှ ခွင့်လွှတ်ပေးနိုင်ပြီး၊ ထိုသက်သေရဲ့ ထွက်ဆိုချက်ကို ရယူရန်အတွက် သက်သေ နေထိုင်ရာအရပ်တွင် စီရင်ပိုင်ခွင့် အာဏာရှိတဲ့ တရားရုံးသို့ ကော်မရှင်စာ ထုတ်ဆင့်နိုင်ကြောင်း ပြစ်မှုဆိုင်ရာ ကျင့်ထုံးဥပဒေ ပုဒ်မ ၅၀၃ (၁)မှာ ပြဋ္ဌာန်းပါရှိပါတယ်။ ပုဒ်မ ၅၀၆ အရ ကော်မရှင်စာ ထုတ်ဆင့်ပိုင်ခွင့် မရှိတဲ့ လက်အောက်တရားသူကြီးများ (ဥပမာ- တွဲဘက် နှင့် ဒု-မြို့နယ် တရားသူကြီးများ) သည် ကော်မရှင်စာ ထုတ်ဆင့်ပိုင်ခွင့်ရှိသော အထက် တရားသူကြီး ထံမှတဆင့် အခြားရုံးသို့ ကော်မရှင်စာ ထုတ်ဆင့်နိုင်ပါတယ်။
ဒီလို မူလ အမှုစစ်တရားရုံးက ပုဒ်မ ၅၀၃ (၁)အရ ကော်မရှင်နဲ့ စစ်ဆေးစေဖို့ စီစဉ်ဆောင်ရွက်ရာ ပြင်ဆင်ဆောင်ရွက်ရမယ့် လုပ်ငန်းစဉ်လေးတွေ ရှိပါတယ်။ ပြင်ဆင်ဆောင်ရွက်ပုံ များကတော့ သက်သေကို စစ်မေးလိုတဲ့ အမှုသည်ဘက်က မေးမြန်းလိုတဲ့ မေးခွန်းများကို အဓိကစစ်မေးချက် အဖြစ် ပထမဦးစွာ တရားရုံးကို ရေးသားတင်သွင်း စေရပါတယ်။ အဲဒီနောက်မှ တစ်ဘက်အမှုသည်ဘက်က ဒီလို ရေးတင်လာတဲ့ အဓိကစစ်မေးချက်တွေကို လေ့လာဖတ်ရှုပြီး မေးစရာရှိရင် ပြန်လှန်စစ်မေးချက်အဖြစ်နဲ့ မေးခွန်းများကို ရေးသားတင်သွင်း စေရပါတယ်။ သက်သေပြသတဲ့ အမှုသည်ဘက်က တစ်ဘက်မှ ပြန်လှန်မေးခွန်းတွေကို လေ့လာကြည့်ရှုပြီး သူ့အနေနဲ့ ထပ်မံစစ်မေးလိုခဲ့ရင် ပြန်ရှင်းစစ်မေးချက် မေးခွန်းတွေကို ထပ်မံ ရေးသားတင်သွင်းခွင့် ရရှိပါတယ်။ နောက်ဆုံးမှာ တရားရုံးက မေးမြန်းလိုတာတွေ ရှိခဲ့ရင်လည်း "ရုံးမေး"အဖြစ် မေးခွန်းများကို ရေးသားရမှာ ဖြစ်ပါတယ်။ ဒါတွေလုပ်ဆောင်ပြီးပြီ ဆိုကာမှ အမှုစစ်တရားရုံးဟာ ကော်မရှင်နည်းနဲ့ စစ်ဆေးစေမယ့် သက်သေရှိရာ အရပ်မှ တရားရုံးသို့ ကော်မရှင်စာနဲ့ အတူ အထက်ပါ အရပ်ရပ်သော မေးခွန်းများကို စဉ်တွဲပြီး ပေးပို့ရမှာ ဖြစ်ပါတယ်။
အဲဒီလို သက်သေကို ကော်မရှင်နဲ့ စစ်ဆေးပေးဖို့ ပေးပို့လာတဲ့ ကော်မရှင်စာနဲ့ မေးခွန်းများ လက်ခံ ရရှိတဲ့ တရားရုံးမှ မြို့နယ်တရားသူကြီးဟာ ပုဒ်မ ၅၀၃ (၃)အရ မိမိကိုယ်တိုင်ဖြစ်စေ၊ မိမိလက်အောက်မှာ ရှိတဲ့ ပထမတန်း အာဏာထက် မနိမ့်တဲ့ တရားသူကြီး တစ်ဦးဦးကို စေခိုင်းခြင်းဖြင့် ဖြစ်စေ သက်သေကို ဆင့်ခေါ်၍ သော်လည်းကောင်း၊ သက်သေရှိရာ အရပ်သို့ သွားရောက်၍ သော်လည်းကောင်း ၀ရမ်းမှု စစ်ဆေးတဲ့ နည်းလမ်းနဲ့ အာဏာများကို သုံးစွဲလျက် စစ်ဆေးမေးမြန်းရမှာ ဖြစ်ပါတယ်။
တစ်ခုသိထားရမှာက တရားရုံးချုပ်ရဲ့ (၁၀-၈-၁၉၉၀) ရက်စွဲပါ အမှာစာအမှတ်၊ ၂၄၂/၂၆၄/၉၀ (လထန)အရ သက်သေကို စစ်မေးရန် ကော်မရှင်စာ ထုတ်ပေးနိုင်ခွင့်အာဏာကို မြို့နယ်တရားသူကြီး များကို အပ်နှင်းကြောင်း၊ အမှုသည်တစ်ဦးဦးဟာ ကော်မရှင်နည်းနဲ့ စစ်ဆေးမယ့် တရားသူကြီး ရှေ့မှောက်ကို ရှေ့နေနဲ့ လာရောက်နိုင်သကဲ့သို့ ၎င်းဟာ ချုပ်နှောင်ခံရခြင်း မရှိဘူးဆိုရင်လည်း မိမိကိုယ်တိုင် လာရောက်နိုင်ခွင့် ရှိကြောင်း၊ အဆိုပါအမှုသည် (သို့မဟုတ်) ၎င်းရဲ့ရှေ့နေဟာ သက်သေကို စစ်မေးနိုင်ခြင်း၊ ပြန်လည် စစ်မေး နိုင်ခြင်း၊ ပြန်လှန်စစ်မေးနိုင်ခြင်းနဲ့ လိုအပ်လျှင် ထပ်မံစစ်မေးနိုင်ခြင်းတို့ ပြုလုပ်နိုင်ခွင့် ရှိကြောင်း၊ ရယူခဲ့တဲ့ သက်သေအစစ်ခံချက်ဟာ သက်သေခံဥပဒေ ပုဒ်မ ၃၃ ပါ ပြဋ္ဌာန်းချက်နဲ့ ညီညွတ်ရင် သက်သေခံချက် အဖြစ် လက်ခံနိုင်ခွင့်ရှိကြောင်း ညွှန်ပြထား တာတွေကို သိရှိမှတ်သား ထားသင့်ပါတယ်။ (အမှာစာပါ အဆိုပါ ညွှန်ပြချက်ဟာ ပြစ်မှုဆိုင်ရာ ကျင့်ထုံးဥပဒေ ပုဒ်မ ၅၀၅ (၁)၊(၂)ပါ ပြဋ္ဌာန်းချက်များအတိုင်းပဲ ဖြစ်ပါတယ်။)
တရားသူကြီးဟာ ကော်မရှင်နည်းနဲ့ စစ်ဆေးဆောင်ရွက် ပြီးသွားခဲ့ပြီဆိုရင်တော့ ပုဒ်မ ၅၀၇(၁) အရ ဆောင်ရွက်ပြီးစီးကြောင်း ပြန်ကြားစာနှင့်အတူ မူလပေးပို့ခဲ့တဲ့ ရုံးမှ မေးခွန်းလွှာများ အပါအ၀င် ကော်မရှင် စာရွက်စာတမ်းများ အားလုံး၊ သက်သေထွက်ချက်တို့ကို ကော်မရှင်စာထုတ်တဲ့ အမှုစစ်ရုံးသို့ တိုက်ရိုက် ပြန်လည်ပို့ပေးရမှာပဲ ဖြစ်ပါတယ်။ ပုဒ်မ ၅၀၇ (၂)အရ ယင်းစာရွက်စာတမ်းတွေ လက်ခံရရှိတဲ့ အမှုစစ်ရုံးကလည်း သက်သေ ထွက်ချက်ကို အမှုသည်များရှေ့မှာ ဖတ်ကြားပြီးနောက် (အမှာစာမှာ ပါရှိသလိုပါပဲ) သက်သေခံဥပဒေ ပုဒ်မ ၃၃ နဲ့ ညီညွတ်ရင် အမှုတွဲမှာ သက်သေခံ စာရွက်စာတမ်း အဖြစ် လက်ခံရပါမယ်။ (ကော်မရှင်နှင့် ပတ်သက်တဲ့ သက်သေထွက်ချက် အပါအ၀င် စာရွက်စာတမ်း တွေဟာ အမှုမှတ်တမ်း (အမှုတွဲ)ရဲ့ အစိတ်အပိုင်း ဖြစ်စေရပါမယ်။) ဒါ့အပြင် ပုဒ်မ ၅၀၈ အရ ကော်မရှင်နည်းနဲ့ စစ်ဆေးနေတဲ့ကာလ အတွင်း အမှုကို သင့်တော်တဲ့ အချိန်ကာလအထိ ရွှေ့ဆိုင်းထားနိုင်တယ် ဆိုတာကိုလည်း မှတ်သားကြရပါမယ်။
ပုဒ်မ ၅၀၃ (၄) အရ အကယ်၍သာ သက်သေဟာ ပြည်ပနိုင်ငံ တစ်နိုင်ငံ (သို့မဟုတ်) အရပ်ဒေသတစ်ခုခုမှာ ရှိနေခဲ့တယ် ဆိုရင် ၎င်းသက်သေကို စစ်မေးဖို့ အတွက် ကော်မရှင် အမိန့်စာများ ထုတ်ပေးခြင်း လုပ်ထုံးလုပ်နည်းတွေကို တရားရေးဝန်ကြီးဋ္ဌာနရဲ့ (၁၁-၈-၁၉၅၅) ရက်စွဲပါ အမိန့်ကြော်ငြာစာတွေနဲ့ ထုတ်ပြန်ထားပါတယ်။ ယင်းအမိန့် ကြော်ငြာစာများကို တရားရုံးများလက်စွဲမှာ ဖော်ပြထားတာဖြစ်လို့ အကျယ်တ၀ံ့ လေ့လာမှတ်သားမှသာ အဆင်ပြေပါလိမ့်မယ်။ အဲဒီလို ကော်မရှင်နာ ထုတ်ဆင့်ရန် လိုအပ်လာတဲ့အခါမှာ ပြည်ထောင်စု တရားလွှတ်တော်ချုပ်ရုံးသို့ တင်ပြပြီးမှသာ ထုတ်ဆင့်ကြရမှာ ဖြစ်ပါကြောင်း တင်ပြလိုက်ရပါတယ်။
အထက်တွင် တင်ပြခဲ့တဲ့ သက်သေကို ကော်မရှင်နဲ့ စစ်ဆေးခြင်း ဆိုင်ရာ သိကောင်းစရာများကို လေ့လာ ဖတ်ရှုခြင်းဖြင့် ဥပဒေ ဗဟုသုတများ တိုးပွားလာကြလိမ့်မယ်လို့ ယုံကြည် မျှော်လင့်မိပါတယ်။ ပညာပြည့်ဝ နှလုံးလှနိုင်ကြပါစေ။
လွှမ်းမိုးအောင် (တရားရေး)
