မင်းပြောင်းမင်းလဲ
"အမတ်တိန်ကို သတ်စေ''
သက္ကရာဇ် ၇၄၅ ခုနှစ် မွန်ဘုရင်ရာဇာဓိရာဇ် နန်းတက်သည်နှင့် ပေးသောအမိန့် ဖြစ်သည်။ အမတ်တိန်က ဘုရင်ကို အပြစ်ပြတော်မူရန် လျှောက်ထားသည့်အခါ ဘုရင်က “ငါ ဒဂုံမြို့စားဘဝက လာပြီးမခစားဘဲ ဘုရင်ဖြစ်မှ လာပြီးခစားတာ မောင်မင်းအပြစ်” ဟုဆိုသည်။ အမတ်တိန်က “ထီးဖြူဆောင်းမင်းကိုသာ ခစားသည်၊ ထီးဖြူမဆောင်းသောမင်းကို မခစားတတ်၊ အမျက်တော်ရှိ၍ ကွပ်ညှပ်တော်မူသော် ကျွန်ုပ်သေရမည်” ဟု နားတော်လျှောက်၏။ အလျှောက်ကောင်းပြီး အနီးမှ မင်းကံစီသာတို့က “အမတ်တိန်၏စကားသည် စင်စစ်မှန်၏” ဟု ထောက်ခံ လျှောက်ထားကြသောကြောင့်လည်း အသက်ချမ်းသာရာ ရခဲ့ပေသည်။
လက်ရှိအာဏာပိုင်သသော ဘုရင်ကိုသာ အခစားဝင်ရမည်မှာ မင်းမှုထမ်း၏ သစ္စာတရားပင် ဖြစ်သည်။ ထို့အတူ နောက်တစ်မင်း တက်လာသည့်အခါ အကူအညီနှင့် အကြံဉာဏ်ပေးရန် အဆင်သင့်ဖြစ်နေရ မည်မှာလည်း မင်းမှုထမ်း၏အလုပ်ပင် ဖြစ်သည်။ သို့သော် သက်ဆိုင်ရာ ဘုရင်မင်းတြားတို့က ‘သူ့လူ၊ ကိုယ့်လူ၊ အရင်လူ၏တပည့်၊ အရင်လူ၏ကျွန်ယုံ’ ဟု မင်းမှုထမ်းဝန်ထမ်းကို နှိပ်ကွပ်ခဲ့ကြသည်မှာ အစဉ်အလာကဲ့သို့ ဖြစ်နေပေသည်။ အစိုးရပြောင်းကာလကလည်း အရင်လူ ဖြောင့်ဖြောင့် အနားယူနိုင်ရန် တတ်စွမ်းသော ရုံးလုပ်ငန်းပညာနှင့် ကူညီဆောင်ရွက်ရသဖြင့် အစစအရာရာ ပင်ပန်းသည်မှာ ဝန်ထမ်းဖြစ်သကဲ့သို့ နောက်တက်လာမည့် အစိုးရအတွက် လိုအပ်သော စာရင်းဇယားများ၊ သိလိုသည်များကို ဆောင်ရွက်ပေးရသည် မှာလည်း ဝန်ထမ်းပင်ဖြစ်သည်။
ဥပမာပေးရလျှင် အရင်ယောက်ျားဟောင်းနှင့် ကွာရှင်းပြီး ယောက်ျားအသစ် လက်ထပ်ရမည့် အိမ်ထောင်သည်အမျိုးသမီး ကဲ့သို့ အရင်လူ ထွက်ကန် ကန်မည်ကိုလည်းကြောက်ရ၊ နောက်ပေါင်းရမည့်လူ၏ စိတ်ကိုလည်း ခန့်မှန်း ပြင်ဆင်ထားရသကဲ့သို့ ဖြစ်သည်။
အရင်လူက သစ္စာမရှိဟု စွပ်စွဲနိုင်သလို နောက်လူက အရင်လူကို လွမ်းနေသလားဟု အချိန်မရွေး စွပ်စွဲနိုင်သည်။ သည်ကြားထဲ အချို့က အစိုးရဝန်ထမ်းလား၊ ပြည်သူ့ဝန်ထမ်းလား၊ နိုင်ငံဝန်ထမ်းလား ဟူသော မေးခွန်းနှင့် မီဒီယာအချို့၏ ဗျူရိုကရေစီယန္တရား အရည်အချင်းမရှိဟု ဝေဖန်မှုလည်း ခံကြရပြန်သည်။ အရင်အစိုးရနှင့် လိုက်သွားပါဟု အမနာပ ပြောသူလည်းရှိသည်။ ဝန်ထမ်းဘက်မှ ရပ်တည်ဖြေရှင်းပေးမည့်သူ မရှိသလောက် နည်းပါသည်။ မှန်သင့်သလောက်လည်း မှန်ပေသည်။ သို့သော် ဝန်ထမ်းကို ထိုအခြေအနေ ဆိုက်အောင် မည်သူ လုပ်ခဲ့ပါသနည်း။
ကမ်းနားသစ်ပင်
သက်ဦးဆံပိုင် မြန်မာမင်းများ လက်ထက်ကပင် အနီးရှိ အမတ် မင်းမှုထမ်းတို့က ဘုရင်၏ ဆောင်ရွက်မှုကို ပိဋကတ်စာပေ၊ ထုံးတမ်း၊ ဓမ္မသတ်တို့ ကျွမ်းကျင်လိမ္မာသော ပညာရှိအမတ်၊ သက်တော်ရှည်အမတ် တို့က ထိန်းထိန်းသိမ်းသိမ်း ဖြစ်အောင် လုပ်ပေးရလေသည်။ ‘သက်တော် ရှည်အမတ်’ ဟူသော ဝေါဟာရကို ထောက်ရှုခြင်းဖြင့် ကျန်မင်းမှုထမ်းများမှာ အချိန်မရွေး ကွပ်မျက်ခံရနိုင်ကြောင်း သိနိုင်သည်။ မင်းအလိုလိုက် မင်းကြိုက်တင်သူများလည်း ရှိသကဲ့သို့ အသက်ကိုမငဲ့ကွက်ဘဲ အမှန်အတိုင်း တင်ဝံ့သော ရာဇသင်္ကြန်အမတ်ကြီးနှင့် ယောအတွင်းဝန် ဦးဘိုးလှိုင် တို့ကဲ့သို့ အမတ်များလည်း ရှိခဲ့ပါသည်။
ပုဂံခေတ်နှောင်းပိုင်း ဥဇနာမင်းနှင့် နရသီဟပတေ့မင်းတို့ လက်ထက်တွင် ရာဇသင်္ကြန် အမတ်ကြီးမှာ နားချိန်မရှိ နေ့ညအမှုထမ်းရင်း ဝမ်းသွေးသွန်၍ ကွယ်လွန်ရှာသည်။ ဦးဆွေးဆံမြည့် ဟူသော စကားကို ရာဇဝင်တွင်အောင် စစ်မှုထမ်းခဲ့သော အုတ်လှငယ်ကား အသက်စွန့် အလုပ်လုပ်သလောက် အသတ်ခံရလုနီးပါး ဖြစ်ခဲ့သည်။
ပညာရှိ မင်းမှုထမ်းများထဲတွင် အမတ်ကြီး ဘိုးရာဇာသည် အင်းဝမင်းသုံးဆက် အမှုထမ်းခဲ့ပြီး စည်းတပြစ်အမတ် (စန္ဒပဇ္ဇောတ ပါဠိသက် စကား၊ လရောင်ပမာ ထွန်းလင်းသော ပညာရှိ) အဖြစ် ထင်ရှားခဲ့သည်။ ယင်း၏ လျှောက်ထုံးများကို စုစည်းထားသောကျမ်းသည် မဏိရတနာပုံ ကျမ်းဟု အမည်တွင်သည်။ ထိုကျမ်းတွင် မင်းနှင့်အမတ်တို့ ပြည်သူ့အလို လိုက်ရမည့်အကြောင်းကို မိုးခါးရေသောက်ပုံပြင်နှင့် ဥပမာပေး လျှောက်ထားခြင်းလည်း ပါသည်။ နှောင်းလူတို့က တစ်မျိုး အဓိပ္ပာယ်ဖွင့်ဆိုကြသည်။ ထို့နောက် ထင်ရှားသူမှာ သက္ကရာဇ် ၈၇၉ တွင် နန်းတက်သော ရခိုင်မင်းဆက် မင်းဗာကြီးလက်ထက်မှ ခြောက်ဆက်အထိ အမှုထမ်းခဲ့သော မဟာပညာကျော်မှာလည်း မဟာပညာကျော် လျှောက်ထုံးဖြင့် ထင်ရှားခဲ့သည်။
ထိုသို့ပညာဖြင့်ထင်ရှားသည့် အမှုထမ်းများသာမက ကျေးဇူးတရားနှင့် သစ္စာကို စောင့်သိ၍ ငါသေမှ ငါ့အရှင် ထိပါးရမည်ဆိုကာ ရန်သူစစ်သည်တို့ကို ဆီး၍ဟန့်တားသော ပြည်ဘုရင်၏ အလုပ်အကျွေး ၁၃ နှစ်သား ငထင်ငယ်၊ နတ်တင်ထားသော ထမင်းတစ်နပ် ကျေးဇူးကြောင့် ဘုရင်စောယွမ်းကို မသတ်ခဲ့သော ကျွန်ယုံငခင်ညိုတို့လည်း သူ့ခေတ် သူ့အခါမှ ဝန်ထမ်းကောင်းများ ဖြစ်ခဲ့ကြသည်။
ကိုလိုနီခေတ်
ဝန်ထမ်းဆိုသည်မှာ မည်သည့်ခေတ် မည်သည့်ကာလတွင် မည်သူပင် အုပ်ချုပ်သည်ဖြစ်စေ ဝမ်းရေးအရ မိမိတတ်သိထားသော ပညာနှင့် ကျေပွန်စွာ အမှုထမ်းကြရသည်မှာ ထုံးစံပင်ဖြစ်သည်။
၁၈၈၅ ခုနှစ် နိုဝင်ဘာလ ၂၉ တွင် အင်္ဂလိပ်တို့ အထက်မြန်မာပြည်ကို သိမ်းပိုက်၍ ကိုလိုနီ ကျွန်ပြုခံရပြီးသည့်နောက် ၁၉၁၉ အိန္ဒိယအစိုးရ အက်ဥပဒေကို မြန်မာနိုင်ငံတွင် စတင်ကျင့်သုံးကာ ၁၉၂၃ တွင် ဒိုင်အာခီ အုပ်ချုပ်ရေး စတင်ခဲ့သည်။ ထိုသောအခါ ဗြိတိသျှလူမျိုး နိုင်ငံဝန်ထမ်း (BCS, British Civil Service) နှင့် ပဋိညာဉ်ခံဝန်ထမ်း (ICS, Indian Civil Service) စသည်ဖြင့် ပေါ်ပေါက်လာချိန်တွင် မြန်မာလူမျိုး ပညာတတ်များ ဝင်ရောက်အမှုထမ်းလာကြသည်။ ထုံးစံအတိုင်း အရေးပါသောဌာနများကို အင်္ဂလိပ်တို့ ချုပ်ကိုင်၍ အရေးမပါသော ဌာနများကို မြန်မာများက အုပ်ချုပ်ခဲ့ရသည်။ ၁၉၃၅ တွင် မြန်မာနိုင်ငံအစိုးရ အက်ဥပဒေအရ အိန္ဒိယနိုင်ငံမှ ခွဲထွက်ပြီး ၉၁ ဌာနအုပ်ချုပ်ရေး စတင်ခဲ့သည်။ ကိုလိုနီခေတ် သွေးခွဲအုပ်ချုပ်ရေးတွင် ငါးထောင်စားရာထူးဖြင့် မြန်မာမျိုးချစ် ပညာတတ်များကိုလည်း မျှားခေါ်ခဲ့ကြသည်။ ဤသို့ဖြင့် မြန်မာအမျိုးသား ဝန်ထမ်းများ အလိုတော်ရိ၊ အသားထဲကလောက်ထွက် စသည့်အမည်များကို ခံယူကာ အသက်မွေးခဲ့ကြသည်။ အယဉ်ကျေးဆုံး အမည်နာမမှာ ‘ဗျူရိုကရက်များ’ ပင်ဖြစ်ပါသည်။
ဂျပန်ခေတ် ၁၉၄၂ ဩဂုတ်လတွင် ဗမာနိုင်ငံ ဝန်ထမ်းပြန်လည် ပြုပြင်ရေးအဖွဲ့ဖွဲ့ကာ ယခင်အင်္ဂလိပ်လက်ထက်က ပုံစံချထားသည့် ဗျူရိုကရေစီပုံစံကို ပြုပြင်ရန် ဆောင်ရွက်ကြပြန်သည်။ ဂျပန်တို့ ဆုတ်ခွာ၍ ဗြိတိသျှတို့ ပြန်လည်ဝင်ရောက်လာပြီး ၁၉၄၅ မေ ၃ ရက်နေ့တွင် ဗြိတိသျှများ ရန်ကုန်သို့ ရောက်လာပြီး မြန်မာနိုင်ငံကို ‘ကက်စ်ဘီ’ C.A.S (B) ခေါ် မြို့ပြ စစ်အုပ်ချုပ်ရေးအဖွဲ့ဖြင့် အုပ်ချုပ်ခဲ့သည်။
လွတ်လပ်ရေးရပြီး ခေတ်တွင် ရာထူးဝန် အက်ဥပဒေကို ပြဋ္ဌာန်းရန် လေ့လာရေးကော်မရှင်ကို ဩစတြေးလျနိုင်ငံသို့ စေလွှတ်၍ ကော်မရှင်က အစီရင်ခံစာနှင့် ထောက်ခံချက်များကို ၁၉၄၈ ဧပြီလတွင် အစိုးရသို့ တင်ပြခဲ့သည်။ ၁၉၅၃ တွင် ပြည်ထောင်စုရာထူးဝန် အဖွဲ့ အက်ဥပဒေကို ပြဋ္ဌာန်းခဲ့သည်။ တစ်ဖန် ၁၉၅၈ တွင် တပ်မတော်က အိမ်စောင့်အစိုးရ တာဝန် ယူသည်ကို ကြုံရပြန်သည်။
ယင်းကိုထောက်၍ sခတ်အဆက်ဆက် အုပ်ချုပ်ရေးအပြောင်းအလဲ ကိုလိုက်၍ ဝန်ထမ်းတို့အပြောင်းအလဲ၏ လောကဓံတရားကြားတွင် ငုတ်ချည်ပေါ်ချည်နှင့် မည်သို့ အစိုးရအမှုတော်ထမ်းခဲ့ကြသည်ကို တွေးဆကြည့်နိုင်ပါသည်။
ဝန်ထမ်းနှင့်နိုင်ငံရေး
၁၉၆၀ မတ်လ ၁၆ ရက်နေ့တွင် ပြည်ထောင်စု (ပထစ) အစိုးရ တက်လာပြီး မေ ၃၀ ရက်နေ့တွင် သတိုးမဟာ သရေစည်သူဦးချန်ထွန်းအောင် ဦးဆောင်သော အဖွဲ့ဝင် ၉ ဦးပါဝင်သည့် ပြည်သူ့ဝန်ထမ်း စုံစမ်းရေးကော်မရှင်ကို ဩစတြေးလျ၊ အင်္ဂလန်၊ ဆွီဒင်၊ အနောက်ဂျာမနီ၊ နယ်သာလန် စသောနိုင်ငံပေါင်း ၇ နိုင်ငံကိုလေ့လာပြီး အစီရင်ခံစာ တင်သွင်းစေခဲ့သည်။ ယင်းအစီရင်ခံစာ ကောက်နုတ်ချက် အချို့မှာ –
‘…တိုင်းပြည်အုပ်ချုပ်သော ခေါင်းဆောင်သစ်များသည် စိတ်အားထက်သန်သူများ၊ မိမိစွမ်းအင်ကို ယုံကြည်သူများ၊ တိုင်းပြည် ထွန်းကားစေလိုသော စေတနာဗလဝ ရှိသူများ ဖြစ်ကြပေသည်…’ ‘…သို့ဖြစ် လင့်ကစား နိုင်ငံဝန်ထမ်းအပေါ်တွင် ယခင်အုပ်ချုပ်သော အစိုးရနှင့် အဆက်အသွယ် ရှိခဲ့ဖူးသည် ဖြစ်သောကြောင့် မယုံသင်္ကာဖြစ်လျက် မိမိတို့ လုပ်ငန်းစဉ်များ ဆောင်ရွက်ရာတွင် နိုင်ငံဝန်ထမ်းကို တင်းပြည့်ကျပ်ပြည့် ယုံကြည်အားထားခြင်း မပြုလိုကြပေ…’ ‘….မိမိတို့ရည်မှန်း ထားသော စီမံကိန်းကြီးများ အောင်မြင်ရေးကိုသာ စိတ်အားထက်သန်နေ ကြသဖြင့် ထိုစီမံကိန်းကြီးများ အကောင်အထည်ဖော်ရန် အချိန်ကုန်မည်ကို သတိမမူကြပေ။ သာမန်အုပ်ချုပ်ရေး လုပ်ငန်းစဉ်များအရ ထုံးစံအတိုင်း အချိန်ကုန်ရသည်ကို သည်းမခံနိုင်ဘဲ နိုင်ငံ့ဝန်ထမ်းက ရိုင်းပင်းကူညီခြင်း မပြုသောကြောင့် အချိန်ကုန်ရသည်ဟု ယူဆလေ့ရှိကြသည်။ နိုင်ငံ့ဝန်ထမ်း ဆောင်ရွက်ရသော အလုပ်ဝတ္တရား များကိုလည်းကောင်း၊ အုပ်ချုပ်ရေးတွင် အစဉ်အလာအတိုင်း လုပ်ဆောင်ရသည့် လုပ်ငန်းစဉ်များကို လည်းကောင်း နားမလည်နိုင်ဘဲ ရှိကြလေသည်။ မလိုလားအပ်သော ကြိုးနီစနစ်ကို ပယ်ဖျက်ရန်ဟူ၍ ဆောင်ရွက်ခဲ့သော လုပ်ငန်းများမှာ၊ အမှန်စင်စစ် အားဖြင့် အုပ်ချုပ်ရေးဟူသမျှ၏ မူလအခြေခံအဖြစ်ဖြင့် နည်းလမ်းတကျ ချမှတ်ထားသော စည်းမျဉ်းများနှင့် လုပ်ငန်းစဉ်များကို ချိုးဖောက်လျက်သာ ရှိခြင်း ဖြစ်လေသည်။ ထိုအကြောင်းတို့ကြောင့် တာဝန်နှင့်အာဏာ တိကျပြတ်သားစွာ သတ်မှတ်ထားခြင်း မရှိသည့် အခြေအနေသို့ ဆိုက်ရောက်မြဲ ဆိုက်ရောက်နေရလေသည်…’ ‘…နိုင်ငံဝန်ထမ်းအဖွဲ့၏ စိတ်ဓာတ်ကြံ့ခိုင်မှုနှင့် အလုပ်ဝတ္တရား ကျေပွန်မှုမှ မည်မျှ ဆုတ်ယုတ်သွားသည်ကို ဖဆပလ နှစ်ခြမ်းကွဲသည့်အခါ ကွက်ကွက်ကွင်းကွင်း ပေါ်လွင်ထင်ရှား လာပေသည်။ ဖဆပလအဖွဲ့ကြီး ကြာရှည်လေးမြင့်စွာ ပြိုင်ဘက်မရှိ အုပ်စိုးစဉ်အတွင်း နိုင်ငံဝန်ထမ်း အချို့သည် သိလျက်နှင့် လည်းကောင်း၊ မသိ၍ လည်းကောင်း နိုင်ငံအပေါ်ထက် ခေါင်းဆောင်များအပေါ်တွင် ပုဂ္ဂလ ဓိဋ္ဌာန်ဖြင့် သစ္စာစောင့်ထိန်းလာ ခဲ့ကြသည်။ ထိုသို့ဖြစ်ခြင်းကြောင့် တိုင်းပြည်ကိုသာ သစ္စာစောင့်သိရိုသေ၍ နိုင်ငံရေးမဖက်ဘဲ လွတ်လပ်သော ဝန်ထမ်းအဖွဲ့ ဖွဲ့စည်းရန် လိုအပ်ကြောင်းကို ပါတီကြီးနှစ်ဖွဲ့လုံးကပင် ကြေညာ၍ အသိအမှတ်ပြုခဲ့လေသည်’။
အစီရင်ခံစာ၏ ဆိုလိုရင်းမှာ အဓိပ္ပာယ်ပြည့်ဝပြီး ဖြစ်၍ ထပ်မံရှင်းပြရန် လိုအပ်မည်မထင်ပေ။ ထို့နောက် နှစ်နှစ်အကြာ ၁၉၆၂ မတ်လ ၂ ရက်နေ့တွင် တပ်မတော်က အာဏာသိမ်းပြီး တော်လှန်ရေးကောင်စီ ပေါ်ပေါက်လာချိန်တွင် အထက်ပါ အုပ်ချုပ်ရေးယန္တရားများ တစ်ခန်းရပ်ခဲ့ပါသည်။ နိုင်ငံဝန်ထမ်းများလည်း မြန်မာ့ဆိုရှယ်လစ် လမ်းစဉ်ပါတီခေတ်တွင် ပါတီမိတ်ဆွေ၊ အရန်ပါတီဝင်နှင့် တင်းပြည့်ပါတီဝင်များဖြစ်၍ ပါတီ၏ အမာခံကေဒါများ ဘဝသို့ မွေးမြူခြင်း ခံရပါတော့သည်။
၁၉၈၈ အရေးအခင်းအပြီး တပ်မတော်အာဏာသိမ်း၍ ပါဝင်ခဲ့သော ဝန်ထမ်းများ ဝန်ထမ်းအဖြစ်မှ ထုတ်ပစ်ခြင်းခံရပြီး နဝတခေတ်နှင့် နယက ခေတ်တွင် ပါတီနိုင်ငံရေးမှ ကင်းရှင်းအောင် ပုံစံပေး ခံရပြန်ပါသည်။
အစမ်းသပ်ခံအသည်းနှလုံး၊ သဘောထားအကြီးဆုံး
မည်သည့်အစိုးရ တက်တက် ယင်းတို့၏ နိုင်ငံရေးရည်ရွယ်ချက် အမျိုးမျိုးကို အကောင်အထည်ဖော်ရန် စိတ်ဓာတ်များပြုပြင်ကာ ဆောင်ရွက်ရ၊ ဖိအားပေးခံရသည်မှာ ဝန်ထမ်းပင်ဖြစ်သည်။ အရည်အချင်းကို သိ၍ ချီးမြှောက်လျှင် စံရသကဲ့သို့ သိလျက်နှင့် နင်းချေလျှင်လည်း ခံရပေသည်။ ပါမောက္ခပညာရှိ များမှာလည်း စစ်တန်းလျားမှ စစ်သားငယ်များကဲ့သို့ အမိန့်ပေး အုပ်ချုပ်သည်ကိုလည်း ခံခဲ့ရပါသည်။ ပညာတတ်ဆရာဝန်၊ အင်ဂျင်နီယာများလည်း အပါအဝင်ဖြစ်သည်။ ဝန်ထမ်းသည် အစိုးရတိုင်း၏ အစမ်းသပ်ခံ အနှိမ်ခံဖြစ်၍ ရင်ထဲမှခံစားမှုကို မျိုသိပ်၍ သဘောထား ကြီးခဲ့ကြပါသည်။
သမိုင်းကိုပြန်ကြည့်ပါ။
ဗိုလ်ချုပ်အောင်ဆန်းကဲ့သို့ ပုဂ္ဂိုလ်ကြီးက “ဦးကြီး၊ တော်ဝင်ပုဂ္ဂိုလ် လော့ဒ်မောင့်ဘတ်တန်နဲ့ တွေ့ရင် ဘယ်လိုကစပြီး ဘယ်လို သုံးနှုန်းရမယ်ဆိုတာ ကျွန်တော့ကိုသင်ပေးပါ” ဟု နိုင်ငံခြား ဆက်ဆံရေးကျင့်ဝတ်တွင် မျက်နှာမငယ်အောင် ဆရာတင်ရသည့် အိုင်စီအက်စ် ဦးတင်ထွဋ်မှာ ဝန်ထမ်းဖြစ်သည်။ ဗိုလ်ချုပ်နှင့်အတူ အာဇာနည်စာရင်းဝင် ခဲ့သည့် ဒုတိယအတွင်းဝန် ဦးအုံးမောင်မှာလည်း ဝန်ထမ်းဖြစ်သည်။ ခေတ်စမ်းစာပေ ပညာရှင်ကြီးများ ဖြစ်သည့် ဆရာဇော်ဂျီ၊ ဆရာမင်းသုဝဏ်နှင့် ဆရာသိပ္ပံမောင်ဝ တို့သည်လည်း ဝန်ထမ်းများဖြစ်ကြသည်။ ပထမဆုံး ရန်ကုန်တက္ကသိုလ် စာကြည့်တိုက်မှူးဖြစ်ပြီး မြန်မာ့အသံမှ အယ်ဒီတာ့ အာဘော်ခန်းတွင် အင်္ဂလိပ်သတင်းစာ ဖတ်၍ မြန်မာလို ပြေပြေပြစ်ပြစ် ချောချောမွေ့မွေ့ သောတရှင်များခင်ဗျား အစချီကာ တိုက်ရိုက် ထုတ်လွှင့်နိုင်သော ဆရာကြီးဦးခင်ဇော်(k) မှာလည်း ဝန်ထမ်းဖြစ်ခဲ့သည်။ ထိုသို့ ပညာရှင်များစွာ ဝန်ထမ်းအဖွဲ့အစည်းတွင် ရှိခဲ့သည်။ ထိုသို့ပုဂ္ဂိုလ်များ ဝန်ထမ်းအဖွဲ့အစည်းတွင် ရှားပါးလာခြင်း၊ မလုပ်လိုကြ တော့ခြင်းမှာ ဝန်ထမ်း၏ အပြစ်လော၊ မည်သူ့တွင် တာဝန်ရှိသနည်း။ တကယ်တော့ အစိုးရအဆက်ဆက်တွင်သာ တာဝန်ရှိခဲ့ပါသည်။
ထားရှိရမည့် ပဋိညာဉ်သစ်
အစိုးရထိပ်ပိုင်းတွင် မသမာမှုများဖြစ်လျှင် ဝန်ထမ်းလည်း အဂတိ လိုက်စားမည်မှာ သဘာဝပင်ဖြစ်သည်။ ယခင် ဆိုဗီယက်ပြည်ထောင်စုခေတ်က ‘အစိုးရက ပေးချင်ယောင်ဆောင်တော့ တို့ကလည်း လုပ်ချင်ယောင် ဆောင်တယ်’ ဆိုသောစကားကဲ့သို့ မလောက်မငလစာ တိုးပေးပြီး တိုင်း ပေးထားတာနှင့် တန်အောင်လုပ်ကြ ဆိုပြီး ပြည်သူ့ဘဏ္ဍာကို မိမိ အိတ်ကပ်ထဲက ပေးရသည့်နှယ် ခပ်တည်တည် ကြိမ်းမောင်းသည်ကို နာခံရသည်မှာလည်း ဝန်ထမ်းဖြစ်သည်။ ခြောက်တတ်သောအစိုးရက ကြောက်တတ်သော ဝန်ထမ်းကိုရမည်။ မမေးမစမ်းဘဲ ဖြုတ်ပစ်လိုက် ဆိုသောခေတ် တွင်လည်း ဘဝပျက်ကြပြန်သည်။ အမြှောက်ကြိုက်သော အစိုးရက အနားပြာဝန်ထမ်းကို ရမည်။ မိမိလူကိုသာ နေရာပေးတတ်သော အစိုးရက စိတ်ဓာတ်ကျ၍ စည်းလုံးမှု ပျက်ပြားနေသော ဝန်ထမ်းအများစုကို ရမည်။ အကျင့်ပျက်ဝန်ထမ်းကို ကျောသား၊ ရင်သားမခွဲခြားဘဲ အပြစ်ပေး၍၊ အရည်အချင်းအလိုက် မြှောက်စားသောစနစ် (Meritocracy) နှင့် လေ့ကျင့် ပျိုးထောင်မှုကို ဦးစားပေးသော အစိုးရကသာ ဝန်ထမ်းကောင်းကို ရမည်။
မြန်မာ့ဝန်ထမ်းများမှာ အရိုအသေမပေး၍လည်း အကြိမ်းမောင်းခံရ၊ အရိုအသေ ပေးတော့လည်း အကြိမ်းမောင်းခံရ၊ ဘယ်ခေတ်မှာမှ စားသာခြင်းမရှိဘဲ အစိုးရကြား၊ ပြည်သူကြားတွင် အခြေအနေအမျိုးမျိုးကြောင့် ဝန်ထမ်းဖြစ်ရသည်ကို ဂုဏ်ယူရမှန်းမသိအောင် ဖြစ်လျက်ရှိသည်။ ဝါရင့်အများစု မေးကြည့်လျှင် အဆင်ပြေသူအချို့ မှအပ အသက် ၆၀ ပြည့်လျှင် တစ်ရက်မှမနေချင်အောင် ဖိအားများကြသည်ကို တွေ့ရသည်။ မလုပ်နိုင်ရင်ထွက် ဆိုတော့လည်း မထွက်နိုင်၍ လုပ်နေကြခြင်းဖြစ်သည်။ ရှင်ကြီးဝမ်းလည်း ဝင်ခဲ့ပြီ၊ ရှင်ငယ်ဝမ်းလည်း ဝင်ခဲ့ပြီ၊ ချေးစော်နံ၍ မပြန်နိုင်ခြင်းမှာ ပရိယေသနဝမ်းစာကြောင့် ဖြစ်ကြသည်။ ပင်စင်ယူချိန် နေစရာမရှိ သည်မှာလည်း ဝန်ထမ်းအများစုပင် ဖြစ်သည်။
ထို့ကြောင့် ဝန်ထမ်းနှင့်အစိုးရကြား ပုဂ္ဂိုလ်ရေးအကျိုးစီးပွား၊ ပါတီနိုင်ငံရေး အကျိုးစီးပွား ရှင်းလင်းစွာထားပြီး အာဏာနှင့်တာဝန် စည်းခြား၍ လောက်အောင်လည်းပေး၊ တန်အောင်လည်း ခိုင်းသော အစိုးရနှင့်ဝန်ထမ်း အပြန်အလှန်လေးစားသည့် ပဋိညာဉ်အသစ် လိုအပ် လျက်ရှိသည်ဟု မြင်ပါသည်။
ထင်အောင်အောင်
(၉၊၅၊၂၀၁၆)
ကျမ်းကိုး – မှန်နန်းရာဇဝင်၊ ရှေးမြန်မာပြည်သူ့ဝန်ထမ်းများ၊ ဦးမြိုင်သန့်၊ မြန်မာပါမောက္ခ(အငြိမ်းစား)၊ ၁၉၆၁ ခုနှစ်မေလ ၁၈ ရက် ‘ပြည်သူ့ဝန်ထမ်း စုံစမ်းရေးကော်မရှင် အစီရင်ခံစာ’။
The Voice Weekly
