မောင်ရင့်မာ ၊ကျောင်းကုန်း၊
ကျွန်တော်သည် အမှားအယွင်းတစ်ခုပြုပြီးနောက် ခပ်တည်တည်နှင့်မုန်လာဥလုပ်နေခြင်းထက် ၀န်ချတောင်းပန်ခြင်း က ယဉ်ကျေးသောအမူအရာဖြစ်သည်ဟုယုံသူဖြစ်ပါသည်။ သို့သော်၊စဉ်းစားစရာများစွာရှိသည်ကို တွေ့လာရပါသည်။
နွေရက်များကကျွန်တော်မဖတ်ဖြစ်သေး၍တေးထားခဲ့သည့်စာအုပ်ကြွေးတွေကိုဖတ်ပစ်ခဲ့ရာ အမေရိကန်စာရေးဆရာ ကြီး နသန်နီယယ်ဟောသွန်း၏ “ကြက်သွေးရောင်အက္ခရာ”လည်း ပါခဲ့ပါသည်။
(The Scarlet Letter)ကို ဘာသာပြန်သည့်ဆရာမောင်ထွန်းသူသည် လွန်ခဲ့သောနှစ်-၁၅၀ ကျော်က ဟော်သွန်း၏ အဖွဲ့အနွဲ့ကို စိတ်မရှည်နိုင်တော့သဖြင့် ယူထားသည့်စာမူခကိုပြန်အမ်းဖို့ပင် အကြိမ်ကြိမ်စဉ်းစားမိကြောင်းဆိုလေရာ နွေကို အန်တု၍ ဖတ်ရသောကျွန်တော့်အဖို့ရာလည်း အဘယ်မျှသည်းခံခဲ့ရသည်ကို ပြောပြဖို့မလိုတော့ဟု ထင်ပါသည်။
ဆာလမ်-မည်သောအမေရိကန်တောင်ပိုင်း မြို့လေးတစ်မြို့တွင် ယောကျာ်းသနာ မရှိတုန်း ကိုယ်ဝန်ဆောင်၊ ကလေး မွေးသည့် ဟက်စတာပရိုင်းနီး ဆိုသောမိန်းမတစ်ယောက်၏လောကဓံနှင့်လူတို့သဘာဝကိုရေးဖွဲ့သည့်ဝတ္ထုတစ်ပုဒ်ဖြစ်သည်။
ဒေသထုံးဓလေ့အရ ဟက်စတာသည်အပြစ်ကျူးသူဖြစ်သည်။သူမ၏ပြစ်မှုအတွက်ထောင်ဒဏ်ကျခံရသည်။ထောင်မှ လွတ်သောအခါ မြို့ကလေး၏လူသူလေးပါးဆုံရာ “အရှက်မဲ့စင်မြင့်”၌ မိမိအပြစ်ကိုဝန်ခံရသည်။ ကြက်သွေးရောင်အက္ခရာ(A)့ ကို ရင်ဘတ်တွင်ချိတ်တွဲရသည်။ (A) ဆိုသည်က (Adultress) “လင်ငယ်နေသောမိန်းမ”ဟု အဓိပ္ပာယ်ရသည်။
ဟက်စတာသည် အရှက်မဲ့စင်မြင့်ပေါ်မှာရပ်လျက်၊ လူသူတကာတို့၏ ကဲ့ရဲ့ပြစ်တင်ရှုတ်ချမှုများကို နာခံသေ၀ပ်လျက်၊ ကြက်သွေးရောင်အက္ခရာကို ထာဝစဉ်ဆင်မြန်းခဲ့သော်လည်း သူမနှင့်မှောက်မှားသူကို ထုတ်ပြောဖို့ ငြင်းဆန်နေသည်။ ဘော် စတွန်၏နာမည်အကြီးဆုံးနှင့်အသက်အကြီးဆုံးဘုန်းတော်ကြီးဂျွန်ဝစ်(လ်)ဆန်က စစ်မေးသောအခါ၌လည်းကောင်း၊ ဘုရင်ခံ ဘယ်လင်ဟန်ကတောင်းဆို၍အသက်အငယ်ဆုံးနှင့်ဂုဏ်သိက္ခာအရှိဆုံး သင်းအုပ်ဘုန်းကြီးဒင်းမက်ဒေးက စစ်မေးသောအခါ ၌လည်းကောင်း၊ဟက်စတာသည်သူမနှင့်မှောက်မှားသူကိုထုတ်ပြောဖို့ရာအကျောက်အကန် ငြင်းဆန်ခဲ့သည်။သူမအပြစ်ကျူး ခဲ့ပါသည်ဟုပဲ လုံလောက်ရုံမျှ ၀န်ခံခဲ့သည်။ သမီးလေးပုလဲ ခုနစ်နှစ်အရွယ်သို့ ရောက်ခဲ့သည်အထိပဲ ဖြစ်သည်။
ဟက်စတာကဆာလမ်မြို့မှာပဲ အပ်ချုပ်သမအဖြစ်အသက်မွေးရသဖြင့် သူမ၏လောကဓံမှာ ကြမ်းတမ်းခက်ထန်လှပါ သည်။သို့သော်၊ရင်ဆိုင်ခဲ့သည်။အိနြေ္ဒရရလည်းနေခဲ့သဖြင့် သူမကိုချစ်ခင်သူ၊နားလည်သူတို့ပင် မြို့ကလေးမှာ ရှိလာခဲ့သည်။
စိတ်ဝင်စားစရာက သူမနှင့်မှောက်မှားခဲ့သူဖြစ်သည်။မြို့ကလေး၏ “အရှက်မဲ့စင်မြင့်” ၌ ဟက်စတာပရိုင်းနီးကသူမ၏ အပြစ်ကိုဝန်ခံနေရချိန်တွင် သူမနှင့်မှောက်မှားသူသည်ဝန်ခံခြင်းမပြုခဲ့ပေ။ဟက်စတာက မြို့ကလေး၌တစ်ဝမ်းတစ်ခါး လှုပ်ရှား သွားလာချိန်တွင်လည်း မှောက်မှားသူသည် လျစ်လျူပြုနေခဲ့သည်။သို့သော်၊ လိပ်ပြာမလုံဖြစ်နေခဲ့သည်။တုန်လှုပ်ခြောက်ခြား နေခဲ့သည်။
ကြက်သွေးရောင်အက္ခရာ၊အရှက်မဲ့စင်မြင့်၊လူသူတကာ၏ကဲ့ရဲ့ပြစ်တင်မှု၊ရှုတ်ချမှုတို့ကို သူမခံစားဝံ့။မခံစားနိုင်။ စိုးရွံ့ ထိတ်လန့်ရခြင်းနှင့်နောင်တပူပန်ရခြင်းက သူ့ကို အစဉ်အမြဲခြောက်လှန့်နေခဲ့သည်။
အရှက်မဲ့စင်မြင့်၌် သူ့အပြစ်ကိုဝန်ချဖို့ အကြိမ်ကြိမ်စဉ်းစားခဲ့သည်။သို့စေကာမူ မြို့ကလေး၏အထင်ကြီးမှု၊ လေးစားမှု့၊ ချစ်ခင်ကြည်ညိုမှုကို စွန့်လွှတ်ပစ်ဖို့ရာ သတ္တိမဲ့ နေသည်။သို့ဖြင့် သူ၏နှလုံးအိမ်မှာ တရိရိကွဲအက်၍ရူးလုမတတ်ခံစားနာကျင် နေရသည်။ စိတ်ထောင်းကိုယ်ကြေဖြစ်လာသည်။ကျန်းမာရေးထိခိုက်လာသည်။
နာကျင်ခါးသီးမှုများကို မခံရပ်နိုင်တော့သည့်အဆုံးမှာတော့ဖြင့် သူသည် အရှက်မဲ့စင်မြင့်ပေါ်သို့တက်သွားသည်။
“ကျွန်တော့်ကိုချစ်ခင်ကြည်ညိုနေတဲ့ခင်ဗျားတို့ကိုအမှန်အတိုင်းပြောပါရစေ။ခင်ဗျားတို့မြင်တဲ့အတိုင်းပဲ။ကျွန်တော်ဟာ ဒီနေရာမှာရောက်နေပါတယ်။ကမ္ဘာကြီးထဲက ဒုစရိုက်သားကောင်တစ်ယောက်လို့ ကျွန်တော့်ကိုယ်ကျွန်တော်ပြောရပါလိမ့်မယ်။
“အခု ကျွန်တော် ရပ်နေတဲ့နေရာဟာ လွန်ခဲ့တဲ့ ခုနစ်နှစ်လောက်ကတည်းက ရပ်သင့်တဲ့နေရာ၊ ရပ်ရမယ့်နေရာပါ”
နှစ်ပေါင်းများစွာရာသီဥတုဒဏ် ခံထားရသဖြင့် မည်းနက်ဟောင်းနွမ်းနေသော၊ အပြစ်ကျူးလွန်သူတို့အား ပရိသတ်
ဗိုလ်ပုံအလယ်တွင် အရှက်ခွဲရာဖြစ်သော ဈေးလယ်ခေါင်၊လင့်စင်ကြီးပေါ်၌ သူသည်ကျူးလွန်ခဲ့သောအပြစ်များကို ခြွင်းချက်
မရှိဝန်ခံဖြောင့်ဆိုလေတော့သည်။သူ့ကိုချစ်ခင်ကြည်ညိုသောဆာလမ်မြို့သားတို့က အလွန်အမင်းတုန်လှုပ်အံ့သြနေသည်။
“ဟက်စတာလို့ခေါ်တဲ့ ဒီအမျိုးသမီးရဲ့ရင်ဘတ်ကကြက်သွေးရောင်အက္ခရာကို ခင်ဗျားတို့မြင်တယ်မဟုတ်လား။ ခင်ဗျား
တို့ဟာ ဒီစာလုံးကိုကြည့်ပြီးထိတ်လန့်ခဲ့ကြတယ်။တုန်လှုပ်ခဲ့ကြတယ်။ ရင်ဆိုင်တွေ့ပြီဆိုရင် ဝေးဝေးက ကွင်းရှောင်သွားခဲ့တယ်။
သူ့ကိုကြောက်စရာ ရွံစရာလူတစ်ယောက်လို့မြင်ခဲ့ကြတယ်။ ဒါပေမဲ့ အခု ခင်ဗျားတို့ကြားမှာ ရပ်နေတဲ့လူတစ်ယောက်ရဲ့ဒုစရိုက်
မှုကျတော့ ခင်ဗျားတို့မသိခဲ့ကြဘူး၊မမြင်ခဲ့ကြဘူး။မတုန်လှုပ်ခဲ့ကြဘူး”
မိမိအပြစ်ကိုဝန်ခံပြီး အရှက်မဲ့စင်မြင့်တွင် လဲကျသေဆုံးသွားခဲ့သည့် သင်းအုပ်ဘုန်းကြီးဒင်းမက်ဒေး၏ ရင်ဘတ်ပေါ် ၌ ကြက်သွေးရောင်အက္ခရာ(A)ကို သူတို့တွေ့သွားခဲ့ကြသည်။ဟက်စတာကဲ့သို့ အ၀တ်ပေါ်မှာနှိပ်ထားခြင်းမဟုတ်။ရင်ဘတ် အသားပေါ်၌ ထွင်းထားသောအက္ခရာဖြစ်သည်။ဒင်းမက်ဒေးသည် လွန်ခဲ့သောခုနစ်နှစ်ကတည်းကသူ့ကိုယ်သူ ပြစ်ဒဏ်ခတ် သည့်အနေဖြင့် ရင်ဘတ်အသားပေါ်တွင် ဓားနှင့်ထွင်းထားခဲ့ခြင်းဖြစ်လေသည်။
ဓလေ့ထုံးစံ၊အချစ်၊ဂုဏ်သိက္ခာ၊ရိုးဖြောင့်မှုနှင့်လူ့သဘာဝကိုဖွဲ့ဆိုသည့် ၀တ္ထုတစ်ပုဒ်ပဲဖြစ်သည်။
အပြစ်တစ်စုံတစ်ရာကျူးလွန်ကြောင်းဝန်ခံ၍ လောကဓံ၏ရိုက်ခတ်မှု၊နာကျင်ခါးသည်းမှုကို ခါးစည်း၍ရင်ဆိုင်သူနှင့် မိမိအပြစ်ကိုသိုဝှက်ဖုံးဖိ၍ သူတော်ကောင်းယောင်ဆောင်နေသူတို့၏ လိပ်ပြာစင်မှု၊မစင်မှုကို ထိုဝတ္ထုက ပြောပြထားသည်။
အမှားအယွင်းပြုသူ၊အပြစ်ကျူးလွန်သူတို့က စိတ်ရင်းဖြင့်ဝန်ချတောင်းပန်ခြင်းကို ယဉ်ကျေးဖွယ်ရာမှုဟုကျွန်တော်က လက်ခံသူဖြစ်ပါသည်။သို့သော်၊အပြစ်ကျူးသည်လည်းမဟုတ်ပါဘဲလျက်အပြစ်ကျူးမိသကဲ့သို့၊အမှားပြုသည်လည်းမဟုတ်ပါ ဘဲလျက် အမှားပြုသကဲ့သို့ဝန်ချတောင်းပန်သည်ကိုမူ စဉ်းစားရပါမည်။ယုတ္တိတန်ဖို့လိုပါသည်။သဘာဝကျဖို့လိုပါသည်။
မကြာသေးမီက လွတ်လပ်စွာပြောခွင့်ရသည့်ဝေသာလီဂဏသဘင်အတွင်း“မိမိပြောမိဆိုမိခဲ့သည်တို့ကို ခွင့်လွှတ်နား လည်ပေးပါရန်နှင့်ထိုပြောဆိုမှုများအတွက် မိမိမှာပဲတာဝန်ရှိပါသည်”ဟု ၀န်ချတောင်းပန်သည့် အံ့အားသင့်စရာဖြစ်စဉ်တစ်ခု အုတ်အော်သောင်းတင်း ပေါ်ပေါက်ခဲ့ပါသည်။
ဟက်စတာပရိုင်းနီးက သူမ၏အပြစ်ဝန်ခံသော်လည်း အပြစ်မှခွင့်လွှတ်ဖို့ဒူးထောက်တောင်းပန်ခြင်းမပြုခဲ့ပါ။သို့သော် “ကျွန်မတစ်ဦးတည်းမှာပဲ တာဝန်ရှိပါသည်”ဟုလည်း မပြောခဲ့သည်ကိုသတိပြုနိုင်စရာရှိပါသည်။ ဒင်းမက်ဒေးအတွက် “အနစ် နာခံသူကြီး”လုပ်မပြခဲ့ပါ။ နှစ်ဦး မှောက်မှားပါမှကိုယ်ဝန်ရနိုင်သည့်ကိစ္စတွင် သူမတစ်ဦးတည်း တာဝန်ယူ၍လည်း မဖြစ်နိုင်ပါ။ ယုတ္တိယုတ္တာမရှိပါ။သူမ ဖွင့်မပြောသည်က ဒင်းမက်ဒေးကိုအကာအကွယ်ပေးလိုသောကြောင့်ဖြစ်သည်ဟုကျွန်တော်မထင်ပါ။
“မိမိကိစ္စမိမိ တာဝန်ယူမည်၊ကျန်တာ သူ့ကိစ္စ”ဆိုသည့်သဘော ဖြစ်တန်ရာပါသည်။
အပြစ်ကျူးခြင်း၊အမှားပြုခြင်းတို့မရှိခဲ့ပါဘဲလျက် ဒူးထောက်တောင်းပန်ခဲ့ရသူတစ်ဦး ဥရောပသမိုင်းမှာ အထင်အရှား ရှိခဲ့ပါသည်။အီတလီနက္ခတ်နှင့်သိပ္ပံပညာ ရှင်ကြီး ဂယ်လီလီယိုဖြစ်ပါသည်။
ဒူးထောက်တောင်းပန်ခဲ့ရခြင်းမှာ သူ၏ကျော်ကြားသော“ကြယ်တာရာဆက်သား”(Star Messenger)စာအုပ်ကြောင့် ဖြစ်သည်။ဂယ်လီလီယိုက နေ၊လ၊ကြယ်တာရာတို့သည် ကမ္ဘာကိုဗဟိုပြု၍လည်ပတ်နေခြင်းမဟုတ်ဘဲ ကမ္ဘာသည်နေကို ဗဟို ပြု၍လည်ပတ်နေခြင်းသာဖြစ်ကြောင်း ကိုပါးနီးကပ်စ်၏အဆိုကိုထောက်ခံရေးသားခဲ့သည်။ထိုကျမ်းမှာထိုစဉ်ကအလွန်တန်ခိုး သြဇာကြီးနေသည့် ကျောင်းတော်ဝါဒ၊ ဘာသာရေးသင်ကြားပို့ချချက်များနှင့် ဖြောင့်ဖြောင့်ကြီးဆန့်ကျင်နေသည်။
အလယ်ခေတ်ကျောင်းတော်က ဒေါသချောင်းချောင်းထွက်ခဲ့သည်။ရောမသာသနာ့ခုံရုံးသို့ ဂယ်လီလီယိုကိုဆင့်ခေါ်ခဲ့ သည်။မိစ္ဆာဒိဌိအယူဟုစွပ်စွဲလျက် ထိုအယူကိုစွန့်ခိုင်းသည်။ဂယ်လီလီယိုသည် “မီးရှို့အသတ်ခံမည်လား၊ မိမိ၏အယူကိုစွန့်၍ ဒူးထောက်အညံ့ခံမည်လား”ဟု ရွေးချယ်ခဲ့ရသည်။ ဂယ်လီလီယိုက သူ၏အယူအဆ မမှားဟု ယုံကြည်သည်။ သို့သော်၊
“ကျွန်ုပ်၏မံသမျက်စိသည် ဘုရားသခင်ဖန်ဆင်းသည်ဆိုသည့် စကြ၀ဠာကို မြင်နိုင်စွမ်းမရှိပါ ”ဟုအညံ့ခံခဲ့လေသည်။
သူ့ကို သတ္တိနည်းသူ၊ သူရဲဘောကြောင်သူဟု ယူဆသူများရှိခဲ့သည်။မှားယွင်းသည်ဟုမယုံကြည်ပါဘဲလျက် မှားယွင်း
ပါသည်-ဟု အာဏာပိုင်များရှေ့တွင်ဒူးထောက်အညံ့ခံခြင်းကို ပြစ်တင်ရှုတ်ချသူများ ရှိခဲ့သည်။
သို့သော် သူသည်နလပိန်းတုံးမဟုတ်ပါ။ ရောမသာသနာ့ခုံရုံးတွင် ဒူးထောက်၍တောင်းပန်ခဲ့သော်လည်း သူယုံကြည်
သည့်အယူအဆကို အမှန်ုတကယ်စွန့်လွှတ်ခြင်းမပြုခဲ့ပါ။နလပိန်းတုံးတို့သည် အမှန်တရားနှင့်ယုံကြည်မှုကိုအခွင့်အာဏာဖြင့်
တည်ဆောက်လေ့ရှိပြီး ပညာရှင်ကမူ သူ၏အမှန်တရားနှင့်ယုံကြည်မှုကို စစ်ဆေးတွေ့ရှိချက်၊ အထောက်အထားတို့ဖြင့်သာ
တည်ဆောက်လေ့ရှိပါသည်။
ဂယ်လီလီယိုသည် ဒူးထောက်ခဲ့ခြင်းကြောင့် မီးရှို့သတ်ဖြတ်သည့်ပြစ်ဒဏ်မှလွတ်ခဲ့သည်။ နေအိမ် အကျယ်ချုပ်ဖြင့် နေခဲ့ရစဉ်အတွင်း ပညာရှင်အဖိုးအို သည် နေစကြာဝဠာကိုဆက်၍သုတေသနပြုသည်။ ပိုမိုသစ်လွင်သည့် တင်ပြချက်တို့်ဖြင့် “သိပ္ပံပညာသစ်နှစ်ရပ်အပေါ်သုံးသပ်ခြင်း”(Discourse concerning two new sciences)ကျမ်းကိုပြုစုပြီး ဟော်လန်နိုင်ငံ၌ ထုတ်ဝေခဲ့သည်။ထိုကျမ်းသည် အနာဂတ်သိပ္ပံပညာအတွက် အရေးပါသည့်သဘောတရားများကို မျိုးစေ့ချပေးခဲ့သည်။
နောင်၊နှစ်-၅၀ တွင် “မြေဆွဲအားဥပဒေသ”ကို တွေ့ဖို့ရာ အိုက်ဇက်နယူတန်အား ထိုကျမ်းကကူညီပေးနိုင်ခဲ့သည်။ဂယ် လီလီယို၏“ချိန်သီးဥပဒေသ” ဖြင့် ပို၍တိကျကောင်းမွန်သည့်နာရီကို တီထွင်နိုင်ခဲ့သည်။သူမျက်စိကွယ်ပြီးနောက် ဆက်လက် ရှင်သန်ခွင့်ရသည့်-၈နှစ်ကာလအတွင်း စွမ်းဆောင်ခဲ့မှုများသည် သိပ္ပံပညာအတွက် သက်ရောက်မှုကြီးမားသဖြင့် အဲလ်ဘတ် အိုင်စတိုင်းက “ခေတ်သစ်သိပ္ပံပညာနှင့်ရူပဗေဒပညာရပ် နှစ်မျိုးလုံး၏ဖခင်ကြီး”ဟု ဂယ်လီလီယိုကို ကောင်းချီးပေးခဲ့သည်။
“သူရဲဘောကြောင်တဲ့သူ၊ဟုတ်လား။သူရဲဘောကြောင်တဲ့သူဟာ သူလုပ်ရမယ့်အလုပ်ကိုဆက်လုပ်ဖို့ဘ၀လမ်းကို ရွေး ကြသလား။ သူရဲဘောကြောင်တဲ့သူလို့အပြောခံရမယ့်လမ်းကို တမင်ရွေးကြသလား”
ဒါက ဂယ်လီလီယိုဘက်မှ ချေပချက်ဖြစ်သည်။
ရောမသာသနာ့ခုံရုံးရှေ့၌ ဒူးထောက်တောင်းပန် အညံ့ခံခဲ့ရစဉ်က သူသည် အသက်-၇၀အရွယ် အဖိုးအိုတစ်ဦး ဖြစ် နေပါပြီ။သူ့၌ ရာထူးရာခံ၊အခွင့်အရေးမျှော်ကိုးချက်နှင့် လောကစည်းစိမ်တစ်စုံတစ်ရာ ခံစားဖို့ရာမဟုတ်တော့သည်မှာ သေချာ ပါသည်။သူ၏တစ်ခုတည်းသောဆန္ဒကအသက်ရှင်သန်လိုမှုဖြစ်ပါသည်။သူ၏မပြီးသေးသောပန်းချီကားအတွက်ပဲဖြစ်ပါသည်။
အသက်ဆက်ရှင်သန်ခွင့်ရသည့်ကာလအတွင်း ဘ၀၏အဖိုးတန်ဆုံး၊နောက်ဆုံးနေ့ရက်များ၌သူ၏သုတေသနဆောင် ရွက်ခဲ့မှုများကို ဆန်းစစ်ကြည့်ပါက သူသည်ရာထူး၊စည်းစိမ်ခံစားလိုခြင်းကြောင့်မဟုတ်ဘဲ၊အခွင့်အရေး၊မျှော်ကိုးချက် တစ်ခုခု ကြောင့်လည်းမဟုတ်ဘဲ လောကအကျိုးကိုပညာဖြင့်သယ်ပိုးလိုသောကြောင့်ဖြစ်သည်ဟုကောက်ချက်ချရပါလိမ့်သည်။
သူရဲဘောကြောင်သူ-ဟု အပြစ်ပြောခံရမည့်ဘ၀ကို ရဲရဲရွေးချယ်ခဲ့ပါသည်။ ထို့ကြောင့်သာပဲ သိပ္ပံပညာနယ်အတွက် အကျိုးများခဲ့သည်ဟုဆိုရပါမည်။ သူ၏ဂုဏ်သ်ိက္ခာကို သူကိုယ်တိုင် ချနင်းခဲ့ခြင်းမှာအချည်းနှီးမဖြစ်ခဲ့ဟုဆိုရပါမည်။
သာမန်အားဖြင့် အမှန်ကိုအမှား၊တရားကိုမတရား၊ပြုမူပြောဆိုခြင်းသည် အမှန်တရားကိုသစ္စာစောင့်သိရန်ပျက်ကွက် မှု ဖြစ်ပါသည်။ သူ ရှင်သန်နေထိုင်သည့် လောကနယ်၊သို့မဟုတ်-ပညာရပ်နယ်ကို သစ္စာပျက်ယွင်းမှုလည်း ဖြစ်နိုင်ပါသည်။
ဝန်ချတောင်းပန်မှုတိုင်းသည် လူ့ယဉ်ကျေးမှု၏မီးရှူးတိုင်ကို သယ်ဆောင်ခြင်းဟုတ်မဟုတ် သံသယဖြစ်စရာများစွာရှိ ပါသည်။“ငါးပါးပဉ္စသီ”ကိုစောင့်ထိန်းမိသည်မှာ မှားယွင်းပါကြောင်းဝန်ချတောင်းပန်ခြင်းကို စဉ်းစားကြည့်စေလိုပါသည်။အမှန် တကယ်မှားယွင်းခြင်းမရှိပါဘဲလျက် မှားယွင်းကြောင်းဝန်ချတောင်းပန်ခြင်း၌ စဉ်းစားစရာများစွာရှိနိုင်ပါသည်။ ခြေသုတ်ပုဆိုး၊ မြွေစွယ်ကျိုးမျှ ဒူးထောက်အညံ့ခံ၊တောင်းပန်ဝန်ချသည်ဆိုလေတိုင်းဖြင့် ယဉ်ကျေးသောလူ့အဖွဲ့အစည်း၏ ကောင်းမြတ်သော အမူအရာအဖြစ် မျက်စိမှိတ်၍ ဂုဏ်ပြုချီးကျူးထိုက်သည် မဟုတ်ပါချေ။ ဘာကြောင့်လဲ၊ဘာအတွက်လဲ၊ စဉ်းစားရပါမည်။
ဘာကြောင့်လဲ၊ဘာအတွက်လဲ ဆိုသည်မှာ တော်တော်အရေးကြီးပါသည်။
အချို့သူတို့သည် မိမိယုံကြည်ချက်အတွက် အသက်ပေးခဲ့သည်။အသက်ပေးဖို့အထိ အသင့်ရှိနေတတ်သည်။
အချို့သူတို့သည် ပျော့ညံ့တွေဝေ၍ဘာမဆို လွှတ်ချပစ်လိုက်ဖို့ အသင့်ရှိနေတတ်သည်။အခွင့်အရေး၊ရာထူးအာဏာ အလို့ငှာ မိမိ၏ဂုဏ်သိက္ခာကိုပစ်ချ၍ ဒူးထောက်တောင်းပန်ဖို့အသင့်ဖြစ်နေတတ်သည်။ဆိုးသော၊ညံ့သော၊လောက၏ အမှိုက် သဖွယ်ဖြစ်သော ပုလင်းတူဗူးဆို့များအတွက် “အနစ်နာခံသူကြီး” လုပ်ပြတတ်သည်။ သေးနုတ်သော၊သိမ်ဖျင်းသော၊ရည်သန် မျှော်မှန်းချက်တစ်ခုခုအလို့ငှာ အခွင့်အာဏာရှိသူတို့ရှေ့မှောက်၌ ဒူးထောက်အညံ့ခံဖို့ ၀န်မလေးသူ များစွာရှိတတ်ပါသည်။
ဒူးထောက်တောင်းပန်ခြင်း၏ အခြားတစ်ဖက်မှာ မေးခွန်းများရှိနိုင်ပါသည်။
ကိုယ်ကျိုး၊အစီးအပွားအတွက်မဟုတ်သော၊ မြတ်သော၊ရည်သန်ချက်အလို့ငှာ လိုအပ်သဖြင့် ဒူးထောက်တောင်းပန် ခြင်းမှတစ်ပါး မည်သို့သောဒူးထောက်တောင်းပန်ခြင်းကမျှ ဂုဏ်ရောင်ပြောင်သောကိစ္စမဟုတ် ဟု ကျွန်တော်ထင်ပါသည်။ ။
