“ကျွန်တော်တို့ကို တင်ပြပေး။ မီဒီယာကလည်း ရေးရမယ်။ တရားသူကြီးရဲ့ အားနည်းချက်ကြောင့် တချို့ကိစ္စတွေက မှန်တဲ့ဘက်က မှားနေရတယ်။ အဲဒါမျိုးဆိုရင် တရားသူကြီးချုပ်၊ ဥပဒေချုပ်၊ ရဲမင်းကြီးနဲ့ ကျွန်တော်တို့ အစည်းအဝေး ထိုင်မယ်။ အဲဒီအခါမှာ တရားသူကြီးချုပ်က သက်ဆိုင်ရာ တရားသူကြီးကိုခေါ်ပြီး ဒါတွေ ဒါတွေ လုပ်ရမယ် ဆိုတာ ညွှန်ကြားမယ်။ ဒါဆိုရင် အမှန်အတိုင်း ပြန်ဖြစ်သွားမယ်”
(15-11-2013, Hot News ဂျာနယ်)
ထိုသို့ ပြောဆိုလိုက်သူမှာ တိုင်းဒေသကြီး ဝန်ကြီးချုပ် ဖြစ်သဖြင့် သူနှင့် အစည်းအဝေး ထိုင်မည်ဆိုသော တရားသူကြီးချုပ်၊ ဥပဒေချုပ်၊ ရဲမင်းကြီး (စင်စစ် ထိုအသုံးအနှုန်း ခေတ်နှင့် မလျော်ညီတော့ပါ) စသူတို့ မှာလည်း တိုင်းဒေသကြီးအဆင့် သက်ဆိုင်ရာ ကဏ္ဍအလိုက် တာဝန်ရှိ သူများကို ဆိုလိုခြင်း ဖြစ်ကြောင်း အငြင်းပွားဖွယ်ရာ မရှိပါ။
ဝန်ကြီးချုပ်အနေဖြင့် ပြည်နယ်၊ သို့မဟုတ် တိုင်းဒေသကြီး ဟူသော အကန့်အသတ်ပြုထားသည့် နယ်မြေအတွင်း''စီမံခန့်ခွဲရေး''၊ တစ်နည်း အားဖြင့် အုပ်ချုပ်ရေးဆိုင်ရာ တာဝန်ကို''ဥပဒေဖြင့် အပ်နှင်းရရှိသည့် အာဏာအရ'' ထမ်းဆောင်ခွင့်ရသူ ဖြစ်ပါသည်။ ဘာမဆို လုပ်ပိုင်ခွင့် ရှိသည့် မွေးရာပါ အခွင့်အာဏာ မဟုတ်ပါ။
၎င်းစီမံအုပ်ချုပ်ခွင့် ရရှိသော နယ်မြေအတွင်း တရားစီရင်မှု ဆိုင်ရာအမှားအယွင်းများ မဖြစ်ပေါ်စေလိုသော စေတနာကို အသိအမှတ် ပြုနိုင် ပါသည်။ ထိုစေတနာဖြင့် ထိုသို့ပြောဆိုလိုက်ခြင်း ဖြစ်သည် ဖြစ်သည်ဟူ၍လည်း ယုံစားဖွယ်ရာ ရှိပါသည်။ သို့ရာတွင် ဥပဒေနှင့် အညီအညွတ် ရှိ၊ မရှိ ဝေဖန်စိစစ်ရပမည်။
တရားစီရင်မှု ဆိုသည်မှာ ဥပဒေနှင့်အညီ အပ်နှင်းထားသည့် စီရင်ပိုင်ခွင့်အာဏာ မရှိဘဲ ဆောင်ရွက်၍ မရနိုင်ကြောင်းကို သိမြင်နားလည်ရန် လိုအပ်ပါသည်။ ဤစကား ရင့်သီးကောင်း ရင့်သီးနိုင်ပါသည်။ သို့သော် မတတ်နိုင်ပါ။
Law sense, judicial sense ဆိုသည်ကို တစ်ထောင့်တစ်ည ပြောရဦးမည့် မွေးရာပါ ပညာရှိတွေ ပေါများလှပါသည်။
ရှင်းအောင်ပြောမှ ဖြစ်မည် ထင်ပါသည်။ မှားယွင်းချွတ်ချော်ပါက တတ်မြောက်ကျွမ်းကျင်သူများက ပြင်ဆင်ဖြည့်စွက်စေလိုပါသည်။
အမှုအခင်း၊ အငြင်းပွားမှု တစ်ရပ်ရပ်ကို (ဒေသအလျောက်၊ တန်ဖိုး အလျောက်၊ အပ်နှင်းသည့် အခွင့်အာဏာအလျောက်) စီရင်ပိုင်ခွင့်ရှိသော တရားရုံးနှင့် စီရင်ပိုင်ခွင့်ရှိသော တရားသူကြီးကသာလျှင် စီရင်ဆုံးဖြတ် ပိုင်ခွင့် ရှိပါသည်။ မအူပင်ခရိုင် တရားရုံးက စီရင်ပိုင်ခွင့်ရှိသော အမှုကို မအူပင်မြို့နယ် တရားရုံးက စီရင်ပိုင်ခွင့် မရှိပါ။ ဖျာပုံခရိုင် တရားရုံးက စီရင်ပိုင်ခွင့်မရှိပါ။ ထို့အတူ အပ်နှင်းသည့် အခွင့်အာဏာ မရှိခဲ့ဘူးဆိုပါ လျှင် ဧရာဝတီတိုင်းဒေသကြီး တရားလွှတ်တော်က စီရင်ပိုင်ခွင့်ရှိမည် မဟုတ်ပါ။
ပြည်နယ်/တိုင်းဒေသကြီး တရားလွှတ်တော်သည် ၎င်းဒေသအတွင်း ရှိ ခရိုင်တရားရုံးများ၏ စီရင်ဆုံးဖြတ်ချက်အပေါ် ဥပဒေနှင့်အညီ ရေး ဖွင့်သည့် အယူခံမှု၊ ပြင်ဆင်မှုများတွင် ပြင်ဆင်ပယ်ဖျက်ခွင့်၊ အတည်ပြုခွင့် ရှိပါသည်။
သို့သော် ဝန်ကြီးချုပ်၊ လွှတ်တော်ဥက္ကဋ္ဌ စသူတို့က ပြောသည် ဆိုသော အကြောင်းကြောင့်တော့ဖြင့် ဟိုအမှု ဟိုလိုဆုံးဖြတ်၊ ဒီအမှုဒီလိုစီရင် ဟူ၍ အမှုစစ်တရားသူကြီးအား အမိန့်ပေး ညွှန်ကြားခွင့် မရှိပါ။ စွက်ဖက်ခွင့် မရှိပါ။ အာဏာအပ်မထားပါ။
တရားရုံးတစ်ရုံး၏ အခွင့်အာဏာအရ စီရင်ဆုံးဖြတ်ချက် တစ်ရပ် အပေါ် မှားသည်၊ မှန်သည်၊ မျှတသည်၊ မမျှတသည်ကို နားလည်ပါက (ယခုအခါ) ဝေဖန်နိုင်ခွင့်ရှိပါသည်။ သို့သော် မှားသည်၊ မှန်သည်၊ မျှတသည်၊ မမျှတသည်ကို ဆုံးဖြတ်ပိုင်ခွင့် မရှိပါ။ ဆုံးဖြတ်နိုင်သော အခွင့်အာဏာရှိသည်မှာ စီရင်ပိုင်ခွင့်အာဏာ ရရှိသော အထက်တရားရုံး တစ်ခုခုသာ ဖြစ်ပါသည်။
တရားသူကြီး အများစုသည် တက္ကသိုလ် ဥပဒေပညာ ဌာနများ တွင် ပညာသင်ကြားခဲ့ကြရပါသည်။ ဥပဒေ ကထိကတစ်ဦးသည် မကြာ သေးခင်ကမှ ဥပဒေဘွဲ့ ရရှိ၍ သူ့တပည့် ဖြစ်ခဲ့ဖူးသော ဒုတိယမြို့နယ် တရားသူကြီး တစ်ဦး၏ စီရင်ဆုံးဖြတ်ချက်တစ်ခုကို မှားကြောင်း၊ မှန် ကြောင်း ထင်မြင်ချက် ပေးနိုင်ပါမည်။ သို့သော် ဆုံးဖြတ်ပိုင်ခွင့် မရှိပါ။ ဥပဒေကထိကကို လည်းကောင်း၊ ဥပဒေ ပါမောက္ခကို လည်းကောင်း စီရင်ပိုင်ခွင့် အာဏာ အပ်နှင်းခြင်း မရှိခဲ့သောကြောင့် ဖြစ်ပါသည်။
ထို့အတူ ပြည်နယ်တိုင်းဒေသကြီး လွှတ်တော်၊ ဝန်ကြီးချုပ် အစရှိ သော အခွင့်အာဏာပိုင်တို့သည် ဥပဒေအရ တရားစီရင်မှု အာဏာ အပ် နှင်းခြင်းခံရသူများ မဟုတ်သဖြင့်၊ တစ်နည်းဆိုသော် စီရင်ပိုင်ခွင့် အာဏာ ရရှိသူများ မဟုတ်သဖြင့် ဒုတိယ မြို့နယ်တရားသူကြီးက ချမှတ်သော ထောင်ဒဏ် ၇ ရက်မျှကိုပင် ပယ်ဖျက်ခွင့် မရှိပါ။ ဒဏ်ငွေ ၅ဝ ကျပ် မျှကိုပင် ပယ်ဖျက်ခွင့် မရှိပါ။
ဥပဒေချုပ်၊ ရဲမင်းကြီးတို့ကို ထည့်ပြောရန်ပင် အကြောင်းမရှိပါ။
မှားလျှင် ပြင်ဆင်၊ ပယ်ဖျက်ရပါသည်။ မှန်လျှင် အတည်ပြုရပါ သည်။ သို့သော် ဥပဒေနှင့်အညီ စိစစ်ဆင်ခြင်၍ ပြင်ဆင်ရန်၊ ပယ်ဖျက် ရန်၊ အတည်ပြုရန် အလို့ငှာမူ စီရင်ပိုင်ခွင့် အာဏာရှိဖို့ လိုပါသည်။ စီရင်ပိုင်ခွင့် မရှိလျှင် ဆုံးဖြတ်ပိုင်ခွင့် မရှိပါ။
ကြိုက်သည်ဖြစ်စေ၊ မကြိုက်သည်ဖြစ်စေ အတည်ဖြစ်လျက် ရှိသော ဥပဒေကို (အတိအလင်း ပြဌာန်း၍ ကင်းလွတ်ခွင့် ပြုမထားပါက) တစ်ယောက်မကျန် လိုက်နာရန် တာဝန်ရှိပါသည်။ ယခု အတည်ဖြစ်လျက်ရှိသော ဖွဲ့စည်းပုံအခြေခံဥပဒေတွင် မည်သည့် ဝန်ကြီးချုပ်၊ အုပ်ချုပ်ရေးမှူးကိုမျှ တရားစီရင်မှု အာဏာ အပ်နှင်းထားခြင်း မရှိပါ။ မည်သည့် လွှတ်တော်ကိုမျှ တရားစီရင်မှု အာဏာ အပ်နှင်းထားခြင်း မရှိပါ။ လွှတ်တော် အဆင့်ဆင့်အား ဥပဒေပြုအာဏာကို လည်းကောင်း၊ အုပ်ချုပ်ရေးအဖွဲ့ အဆင့်ဆင့်အား စီမံခန့်ခွဲရေး အာဏာကို လည်းကောင်း အပ်နှင်းထားပါသည်။ ဥပဒေပြုအာဏာ၊ အုပ်ချုပ်မှုအာဏာ၊ တရားစီရင်မှုအာဏာတို့ကို တတ်နိုင်သမျှ ပိုင်းခြားသုံးစွဲကြရန် (power are separated, to the extent possible) ပင်လျှင် နိုင်ငံတော်၏ အခြေခံမူတစ်ရပ်အဖြစ် (စိုးရိမ်တကြီး) ပြဌာန်းလိုက်ပါသေးသည်။ ထိန်းကျောင်းမှုနှင့် စွက်ဖက်မှုအကြား ခြားနားမှု ရှိရပါမည်။
အပြန်အလှန် ထိန်းကျောင်းမှု ဆိုသည်မှာ (မိမိဆန္ဒအလျောက်) လိုရာသုံးနိုင်သည့် ၀ရဇိန်လက်နက် ဖြစ်မည် မထင်ပါ။
ပြည်နယ်တိုင်းဒေသကြီး လွှတ်တော်နှင့် ဝန်ကြီးချုပ်ကို ဖြစ်စေ၊ ပြည်သူ့လွှတ်တော်၊ အမျိုးသားလွှတ်တော်၊ ပြည်ထောင်စု လွှတ်တော် တို့ကို ဖြစ်စေ အခြေခံဥပဒေတွင် တရားစီရင်မှုအာဏာ အပ်နှင်းထား ကြောင်း မတွေ့ရပါ။ ထို့ကြောင့် တရားရုံးတစ်ရုံး၏ စီရင်ဆုံးဖြတ်ချက် တစ်ရပ်အပေါ် ဝေဖန်တိက ပြုရုံမျှသာမက မှားကြောင်း၊ မှန်ကြောင်း ဝင်ရောက်ဆုံးဖြတ်စီရင်မည် ဆိုပါက အခွင့်အာဏာမရှိသော ဆောင်ရွက် မှုသာ ဖြစ်စရာ ရှိပါသည်။ ဥပဒေက အပ်နှင်းသည့် အခွင့်အာဏာမရှိဘဲ ကျင့်သုံးဆောင်ရွက်မှုသည် ဥပဒေကို မလိုက်နာ၊ ဖောက်ဖျက် ကျူးလွန်ရာ ရောက်သည်အထိ စဉ်းစားကြရပါမည်။
အခြေခံဥပဒေကို မလိုက်နာဘဲ နေခွင့်ရှိသည်ဟု မည်သူ့ကို ခြွင်းချက်ဖြင့် ခွင့်ပြုထားခြင်း မရှိပါ။
လွှတ်တော် ကိုယ်စားလှယ်များသည်ပင်လျှင် လွှတ်တော်နှင့် ပေါင်း ကော်မတီတို့၌ လွတ်လပ်စွာ ပြောဆိုခွင့်၊ ဆန္ဒမဲပေးခွင့်ကို အ ဥပဒေကို မဆန့်ကျင်သမျှသာလျှင်) ပြုလုပ်ခွင့်ရှိကြောင်း အခြေခံဥပဒေ ပုဒ်မ-၉၂ (က)၊ ၁၃၃ (က)၊ ၁၅၅ တို့တွင် ပြဋ္ဌာန်းပါသည်။ ဖောက် ဖျက်ကျူးလွန်သူကို တာဝန်မှ ပြန်လည် ရုပ်သိမ်းနိုင်ကြောင်း ပုဒ်မ ၃၉၆ (က)(၂)တွင် ပြဋ္ဌာန်းပါသည်။
ဝန်ကြီးချုပ်က ဥပဒေကို ဖောက်ဖျက်ကျူးလွန်ခြင်း ဖြစ်ပါက ပုဒ်မ ၂၆၃(က)(၂) အရ စွပ်စွဲပြစ်တင်မှုကို ခံရနိုင်ပါသည်။
တရားရုံးတစ်ရုံး၏ စီရင်ဆုံးဖြတ်ချက် တစ်ရပ်အပေါ် တရားစီရင် မှု အာဏာ အပ်နှင်းထားခြင်း မခံရသော ဝန်ကြီးချုပ်က တရားစီရင်မှု အာဏာ အပ်နှင်းခြင်း မခံရသော ရဲမင်းကြီး၊ ဥပဒေချုပ် စသူတို့နှင့် မှားကြောင်း၊ မှန်ကြောင်းကို အစည်းအဝေးထိုင်၍ ဆုံးဖြတ်ချက် ချမှတ်ခွင့် ရှိကြောင်း အခြေခံဥပဒေ ပြဋ္ဌာန်းချက်တွင် မတွေ့ပါ။ ထိုသို့ ပြုလုပ်ပါက ဖွဲ့စည်းပုံအခြေခံဥပဒေနှင့် ဆန့်ကျင်ပါသည်။ ဖောက်ဖျက်ကျူးလွန်ရာ ရောက်ပါမည်။ အခွင့်အာဏာမရှိသည့် ဆောင်ရွက်မှု ဖြစ်ပါမည်။ Independent of judiciary နှင့် rule of law ကို အလွန်အမင်း ဟန့်တား နှောင့်ယှက်ရာ ရောက်ပါသည်။
အခွင့်အာဏာများ ရောထွေးကျင့်သုံးခဲ့သော နည်းစနစ် အမှား ကြောင့် တရားစီရင်မှုသည် အကြီးအကျယ် ဂုဏ်သတင်း ပျက်ယွင်းခဲ့ သည်ကို သတိသံဝေဂ ယူနိုင်ကောင်းပါသည်။
ဝန်ကြီးချုပ်နှင့် စည်းဝေးညှိနှိုင်း၍ ချမှတ်သော စီရင်ဆုံးဖြတ်ချက် အပေါ် (နစ်နာသူက) တရားလွှတ်တော်ချုပ်သို့ မတက်ရောက်ရတော့ဘူး လားဟု မေးခွန်းထုတ်စရာ ရှိပါမည်။ မည်သူမဆို ကျေနပ်လက်ခံသည့် အကြွင်းမဲ့တရားမျှတမှုကို ဝန်ကြီးချုပ်က ဆုံးဖြတ်နိုင်မည်လားဟု မေးခွန်း ထုတ်စရာ ရှိပါမည်။ ဝန်ကြီးချုပ်နှင့် အစည်းအဝေးပြု၍ ညွှန်ကြားသည့် အတိုင်း ဆုံးဖြတ်ခဲ့ခြင်းအပေါ် ပြည်ထောင်စု တရားလွှတ်တော်ချုပ်က ပြင်ဆင်ခြင်း မပြုဘဲ ဘာမဆို အတည်ပြုရမည်လားဟု မေးခွန်းထုတ်စရာ ရှိပါမည်။
တိုင်းဒေသကြီး တရားသူကြီးချုပ်မှာ စီရင်ပိုင်ခွင့် အာဏာ ရှိတာပဲ ဟူ၍ စောဒက တက်ကောင်း တက်နိုင်ပါသည်။ မှန်ပါသည်။ သူ့ကို အပ်နှင်းသည်မှာ စီရင်ပိုင်ခွင့်အာဏာ ဖြစ်ပါသည်။ သူ၏တရားခွင်ပေါ်သို့ ဥပဒေနှင့်အညီ နည်းလမ်းတကျ ရောက်ရှိလာခဲ့သော (အယူခံ/ပြင်ဆင်)မှုများကို နှစ်ဖက်ကြားနာ၍ စီရင်ဆုံးဖြတ်ပိုင်သော စီရင်ပိုင်ခွင့်အာဏာ ရှိပါသည်။ ဝန်ကြီးချုပ်က ခေါ်ယူကျင်းပသော အစည်းအဝေး ခန်းမထဲ၌ အစည်းအဝေး တက်ရောက်သူများ၏ အလိုကျ စီရင်ဆုံးဖြတ်နိုင်ရန် ၎င်းအား အပ်နှင်းသည့် အခွင့်အာဏာ မဟုတ်ပါ။ ဂေါက်ရိုက်ရင်း ရင်း၊ ကားစီးရင်း၊ သူဆုံးဖြတ်ချင်သည့် အချိန်တွင် သူဆုံးဖြတ်ချင်သလို (လိုသလို) ဆုံးဖြတ်ပိုင်သည့် စီရင်ပိုင်ခွင့်အာဏာ မဟုတ်ပါ။
အခြေခံဥပဒေက မည်သူ့ကိုမျှ စေတစ်လုံး အာဏာမအပ်ပါ။
မကြိုက်လျှင် ပြင်ဆင်ရန်ဖြစ်ပြီး ပြင်ဆင်ပယ်ဖျက်ခြင်း မပြုသေးသမျှ ဥပဒေကို (မည်သူမဆို) လိုက်နာရမည် ဆိုခြင်းမှာ rule of law ၏ အခြေခံအကျဆုံး အချက်တစ်ရပ် ဖြစ်သည်ကို အငြင်းပွားဖွယ် မရှိဟု ယူဆပါသည်။ ထို့ကြောင့် ဝန်ကြီးချုပ်က တရားရုံး၏ ဆုံးဖြတ်ချက် တစ်ရပ်ရပ် ကို မီဒီယာအား တင်ပြစေ၍ တရားသူကြီးချုပ်၊ ဥပဒေချုပ်၊ ရဲမင်းကြီးတို့နှင့် အစည်းအဝေးထိုင်ကာ (မှားကြောင်း၊ မှန်ကြောင်း သုံးသပ်လျက်) တရားသူကြီးချုပ်မှတစ်ဆင့် သက်ဆိုင်ရာ တရားသူကြီးကို''ဒါတွေ ဒါတွေ လုပ်ရမယ်ဟု ညွှန်ကြားမည်'' ဆိုခြင်းမှာ အခြေခံဥပဒေပါ တရားစီရင်ရေးမူနှင့် ဆန့်ကျင်ကြောင်း၊ အခွင့်အာဏာ မရှိသော ဆောင်ရွက်မှု ဖြစ် ကြောင်း၊ ဝန်ကြီးချုပ်ကို အခြေခံဥပဒေက ထိုသို့ အာဏာအပ်နှင်းထားခြင်း မရှိကြောင်း၊ လွတ်လပ်စွာ တရားစီရင်မှုကို ချိုးဖောက်ရန် ဥပဒေက မည်သူ့ကိုမျှ အာဏာအပ်နှင်းထားခြင်း မရှိကြောင်း ဖော်ပြလိုသည်။
ဥပဒေပြုရေး၊ အုပ်ချုပ်ရေး၊ တရားစီရင်ရေး၊ အခွင့်အာဏာတို့ကို အရောရော အထွေးထွေး ကျင့်သုံးခဲ့သဖြင့် မတော်မတရားမှုများ ဖြစ် ခဲ့ကာ ခေါင်းမဖော်ဝံ့အောင် မျက်နှာငယ်ခဲ့ရလျက် တရားဝင် အပ်နှင်းသည့် အခွင့်အာဏာမရှိဘဲ မိမိကိုယ်ကိုယ် ဘ၀ရှင်မင်းတရားကြီးများသဖွယ် စိတ်ကြီးဝင် ပြုလုပ်မှုများကြောင့် ကြမ္မာငင်ခဲ့သော တိုင်းပြည်တစ်ပြည် ယ် တစ်ခြမ်းပဲ့လ မှုန်ပျပျနှင့် ကျွဲခြေရာခွက်ထဲသို့ ပြန်လည်၍ ငုပ်လျှိုးဝင်ရောက်သွားမည်ကို စိုးရိမ်မကင်း ဖြစ်မိကြောင်း ဖော်ပြလိုသည်။ ။
ပဲ့တင်သံဂျာနယ်၊ အမှတ် (၁၀)၊ ၀၅၊ ၀၉၊ ၂၀၁၃
