မြန်ဆန်သော တရားစီရင်ရေး
မေး ။ ။ ဆရာခင်မျာ။ အမှုတွေမြန်မြန်ဆန်ဆန်ပြီးအောင် အဖြစ်နိုင်ဆုံးနည်းလမ်းပြောပေးပါလား။
ဖြေ။ ။ သက်ဆိုင်ရာ တရားစီရင်ရေးမှာ ပါဝင်သူများ၏ ဥပဒေပိုင်းဆိုင်ရာ အရည်အချင်း ကိစ္စများက ကျယ်ပြန့်လွန်းတော့ အဲဒီအပိုင်းတော့ ကျနော့်အရည်အချင်းလောက် နဲ့ မဆွေးနွေးရဲပါဘူး။ ဆိုလိုတာက ပြသနာတစ်ရပ်ကို ကြန့်ကြာမှုမရှိဘဲ လျှောက်လဲချက် လက်တန်းပေးတာတွေ၊ အမိန့် လက်တန်းချပေးတာတွေ၊ မြန်မြန်ဆန်ဆန် အမိန့်ချမှတ်ပေးနိုင်တာတွေကလည်း သက်ဆိုင်ရာဥပဒေပညာရပ်အပေါ်နှံစပ်ကျွမ်းကျင်မှု အရည်အချင်းနှင့်ဆိုင်လို့ပါ။
ဥပဒေပညာရပ်ပိုင်းနဲ့မဆိုင်ပဲ court practise နဲ့ဆိုင်တာလေးတွေ ချက်ချင်း စဉ်းစားမိတာလေးတော့ဖြေပါ့မယ်။ မူလရုံးအမှုစစ်ဆေးခြင်း နှင့်ဆိုင်တာလေးတွေပါ။ လက်တွေ့လည်း ချက်ချင်းလုပ်လို့ရမည့်အရာလေးတွေထင်ပါတယ်။
(၁) တရားခွင်တစ်ခုမှာ တရားသူကြီးကို Laptop တစ်လုံး ၊ တရားခွင်စာရေးကို desktop computer တစ်လုံး၊ printer တစ်လုံး ဆင်ပေးကြည့်ပါ။
(၂) တစ်ရုံးလုံးအတွက် မီးစက်တစ်လုံးဆင်ပေးပါ။
(၃) ဦးတိုက်လျှောက်လွှာတွေတင်ကတည်းက တရားလိုပြသက်သေစာရင်းကို အမည်၊ အဖအမည်၊ အသက်၊ မှတ်ပုံတင်အမှတ်၊ နေရပ်လိပ်စာ၊ ယင်သက်သေသည် ဖော်ပြပါလိပ်စာတွင် အမှန်တကယ်နေထိုင်ကြောင်း သက်ဆိုင်ရာ ရပ်/ကျေး အုပ်ချုပ်ရေးမှူး၏ ထောက်ခံချက် ပါရှိအောင် တောင်းရန်။ မပါရင် ဦးတိုက်လျှောက်လွှာကို လက်မခံနဲ့။ ရဲအရေးမပိုင်မှုတွေမှာ ဆင့်စာခ၊ သက်သေစရိတ် တစ်ပါတည်းကပ်ခိုင်း။
(၄) ရဲစွဲအမှုတွေမှာ ကျင့်ထုံးပုဒ်မ- ၁၇၀ အရ၊ တိုင်တန်းသူ နှင့် သက်သေခံဝန်ချုပ်မပါရင် ရဲစွဲတင်တဲ့ အမှုတွေလက်မခံရန်။
(၅) ရဲပုံစံ - ၁၀၄ ကို မြို့နယ်ဥပဒေရုံးကတစ်ဆင့်ချအပ်။ မချအပ်ခင် သက်ဆိုင်ရာ အမှုလိုက်ဥပဒေအရာရှိကို မည်သည့်ရုံးချိန်းတွင် မည်သည့်သက်သေကို တင်ပို့ နိုင်မည်ကို ကြိုတင်ညှိနှိုင်းရန်။
(၆) တရားခံဘက် သက်သေစာရင်းတင်ပြလာရင်လည်း သီးခြားတင်သွင်းနိုင်ရန် အချိန်ခွင့်ပြုပေးရန်။ တင်ပြလာသည့် သက်သေစာရင်းတွင် သက်သေ၏ အမည်၊ အဖအမည်၊ အသက်၊ မှတ်ပုံတင်အမှတ်၊ နေရပ်လိပ်စာ၊ ယင်သက်သေသည် ဖော်ပြပါလိပ်စာတွင် အမှန်တကယ်နေထိုင်ကြောင်း သက်ဆိုင်ရာ ရပ်/ကျေး အုပ်ချုပ်ရေးမှူး၏ ထောက်ခံချက် ပါရှိအောင် တောင်းရန်။ ဆင့်စာခ၊ သက်သေစရိတ် တစ်ပါတည်း ထမ်းဆောင်ခိုင်းရန်။
(၇) တရားမမှုတွေမှာ ရုံးလက်စွဲ အပိုဒ် - ၁၅၄( ၃ ) နှင့် အညီ သက်သေစာရင်း တင်ဖို့ ရက်ချိန်းတစ်ခုပေးပြီး ထိုနေ့မှာ သက်သေစာရင်း ၊ ဆင့်စာခ၊ သက်သေစရိတ်။ တစ်ပါတည်း ထမ်းဆောင်တင်သွင်းရန်။သက်သေစာရင်းတွင် သက်သေ၏ အမည်၊ အဖအမည်၊ အသက်၊ မှတ်ပုံတင်အမှတ်၊ နေရပ်လိပ်စာ၊ ယင်းသက်သေသည် ဖော်ပြပါလိပ်စာတွင် အမှန်တကယ်နေထိုင်ကြောင်း သက်ဆိုင်ရာ ရပ်/ကျေး အုပ်ချုပ်ရေးမှူး၏ ထောက်ခံချက် ပါရှိအောင် တောင်းရန်။
(၈) ဆီလျော်သောအကြောင်းမရှိဘဲ သက်သေတင်ပြရန် ပျက်ကွက်သည့် အမှုတွေမှာ ယင်းသက်သေကို ပယ်နိုင်ခွင့်အာဏာ တရားသူကြီးကို အပ်နှင်းရန်။(ဥပမာ - ပြည်သူ့ တရားသူကြီးအဖွဲ့ဥပဒေပုဒ်မ - ၇၇ ကဲ့သို့)
(၉) အမှုချိန်းဆိုရာတွင် အဆိုပါအမှုခေါ်မည့်အချိန်နာရီကို အတိအကျညှိနှိုင်းသတ်မှတ်ရန်။ ယင်းနာရီအတိုင်းအတိအကျ အမှုခေါ်ရန်။ အမှုခေါ်သည့်အချိန်တွင် သက်ဆိုင်ရာ အမှုသည်၊ ရှေ့နေများပျက်ကွက်သည့် ကိစ္စများ၊သက်သေမလာသည့်ကိစ္စများတွင် ကျင့်ထုံးဥပဒေပါ ပြဌာန်းချက်များနှင့်အညီ အရေးယူဆောင်ရွက်ရန်။
(၁၀) လျှောက်လဲချက်ကို စာဖြင့်တင်ပြခွင့်မပြုဘဲ နှုတ်ဖြင့် တင်ပြစေရန်။
ကျန်တာတွေတော့ အများကြီးရှိမှာပါ ကျနော့် ဦးနှောက်သေးသေးလေး နှင့် ချက်ချင်းစဉ်းစားမိတာလေးပြောတာပါ။ အဲဒီအပိုင်းလောက် ဆောင်ရွက်နိုင်ရင်ပဲ လက်ရှိ အမှုဦးရေကနေ ၅၀% လောက်တော့ လျော့ကျသွားမည်ထင်ပါတယ်။
------
မေး။ ။ computer နှင့် မီးစက်က ဘယ်လိုဆိုင်သလဲဆရာ။
ဖြေ။ ။ တရားသူကြီးကို Laptop ဆင်ခိုင်းတာက သက်သေထွက်ချက်ကို တရားသူကြီးက ကိုယ်တိုင်ရေးရတာ။ မရေးနိုင်ရင် နှုတ်က နှုတ်တိုက်ချပေးရတာ။ လက်နှင့်ရေးနေရင် တစ်နာရီ (၁)ယောက်ပြီးအောင်မနည်းရေးရတယ်။
ရေးရင်း နဲ့ မရေးနိုင်တော့ လက်ရေးတွေလည်း မလှတော့ဘူး။ အထက်ရုံးတက်ရင် လက်ရေးဖတ်မရတာတွေလည်းရှိတာပေါ့။
Laptop နှင့် စစ်ပြီး print out ထုတ်ကြည့်ပါလား။ တစ်နေ့ သက်သေ ၅ ယောက်စစ်နိုင်ရင် သက်သေ (၃)ဆ အနည်းဆုံးစစ်လို့ရတယ်။
ထွက်ချက်ကို print ထုတ်။ သက်သေကို လက်မှတ်ထိုးခိုင်း။ ပြသနာမရှိပါဘူး။
အမိန့်၊ စီရင်ချက်ရေးရင်လည်း အလားတူပါပဲ။ ပတဖ ညွှန်ကြားချက် - ၁၅၊ ၁၆ နှင့် အညီဆိုရင် သက်သေထွက်ချက် အကျဥ်း ပြန်ကောက်ရတယ်။ သက်သေထွက်ချက် တွေကို computer နှင့် ရိုက်ထားတော့ ချက်ချင်း copy ယူလိုက်ရုံပဲ ။ သုံးသပ်ချက်ရေးဖို့၊ စဉ်းစားဖုိ့ အချိန်တွေပိုထွက်လာတာပေါ့။
အထက်ရုံးတက်သွားရင်လည်း သက်သေထွက်ချက်အကျဉ်းပြည့်ပြည့်စုံစုံ ပါသွားနိုင်တော့ မူလရုံး အမှုတွဲတောင်းခေါ်ကြည့်ရတာတွေနည်းသွားမလားလို့။
နောက်တစ်ခုက စက်ထဲမှာ အမိန့်ပုံစံတွေ သီးခြားဖန်တီးထားလို့ရတော့ အမှုစစ်နေရင် အငြင်းပွားမှုတစ်စုံရာပေါ်ရင် ချက်ချင်း ကြည့်ပြီး အမိန့်ချလို့ရတယ်။
တရားခွင်စာရေးကို computer ဆင်ပေးရင် ဘာအကျိုးရမလဲဆိုတော့ ရုံးသုံးပုံစံတွေကို computerက တိုက်ရိုက်ထုတ်လို့ရတယ်။ ဒါဆို ရုံးသုံးပုံစံတွေ လိုအပ်သည့်ပုံစံ မလောက်ငတာ။ မလိုအပ်သည့်ပုံစံတွေ ပိုနေတာတွေမရှိတော့ဘူး။ စရိတ်သက်သာသွားမယ်။ ပုံစံတွေလည်း သပ်ရပ်ပြီး ခန့်ခန့်ညားညား ရှိသွားမယ်။
ဥပမာ ပုံစံ တစ်ခုတည်းကို (၅)စောင်ထုတ်ရမှာဆိုရင် မှင်ခံနဲ့ရေးရင်တောင် (၃)ခါရေးရမယ်။ computer နဲ့ဆိုတော့ တစ်ခါတည်းရိုက်ရမယ်။ အချိန် (၃)ဆသက်သာတာပေါ့။ ဥပမာ- အရောင်းကြော်ငြာတို့၊အမိန့် - ၂၁၊ နည်း - ၅၄ ၀ရမ်းတို့ ကြည့်ပါလား။ ပစ္စည်းစာရင်းကို ၃ ခါလောက်ပြန်ရေးရင် အခြားအလုပ်တွေမလုပ်ရတော့ဘူး။အဲဒီတစ်စောင်ရေးဖို့ကို အချိန်အတော်ပေးရပြီ။
လချုပ်စာရင်းတွေလည်း နေ့စဉ်ပြီးသည့် စာရင်းတွေ တစ်ခါတည်း ရိုက်ထားလိုက်ရင် လချုပ်သည့်နေ့ကျ သက်သက် အချိန်တစ်ခု ပေးစရာမလိုတော့ဘူးပေါ့။ စဉ်းစားမိသလောက်ပါ။ အကျိုးရလဒ်က ဒီထက်မကနိုင်ပါ။ လျော့စရာတော့မရှိပါ။
မီးစက်က တော့ဆရာရယ်ရှင်းပါတယ်။ မီးပျက်မှာစိုးလို့ပေါ့။
-------
မေး။ ။ ကုန်ကျစရိတ်ကကောစရာ။
ဖြေ။ ။ ဆရာရယ် Laptop တစ်လုံး သာမန် ၄၀၀၀၀၀ ၀န်းကျင် ၊ desktop computer က ၃၅၀၀၀၀ ၀န်းကျင် ၊ printer တစ်လုံး ၁သိန်းကျော်ပေါ့။ ဒီလောက်ကတော့ အမှုမြန်ဆန်ရေးနှင့် နှိုင်းယှဉ်ရင် မပြောပလောက်သည့်ပမာဏပါ။ theory ပိုင်းတွေထက်စာရင် အမှုမြန်ဆန်ရေးမှာ ပိုမိုထိရောက်မလားလုိ့။
-------
မေး။ ။ သက်သေစာရင်းတွေကို တိတိကျကျတောင်းခံတာကကောဆရာ။
ဖြေ။ ။ ဒါကရှင်းပါတယ်။ ယနေ့တရားရုံးတွေမှာ ၆၅% နှုန်းက သက်သေမလာလို့ ရုံးချိန်းပေးနေရသည့်ပြသနာပါ။ ဒ့ါ့ကြောင့် အမှုကြာနေတာ။ သက်သေစာရင်းကို တိတိကျကျလုပ်ပြီး ရုံးကဆင့်ခေါ်စစ်ဆေးမည်ဆိုရင်ဖြင့် အမှုမြန်ဆန်ရေးထိရောက် မလားလို့ပါဆရာ။
-----
မေး။ ။ တရားသူကြီး သက်သေပယ်ပိုင်ခွင့်အာဏာ အပ်ခိုင်းတာကကောဆရာ။
ဖြေ။ ။ ဆရာရယ် တစ်ချို့ မရှိတဲ့သက်သေကို သက်သေစာရင်းထဲထည့်ထားတယ်။ လိပ်စာအမှန်လည်း မတင်ပြနိုင်။ သက်ဆိုင်ရာ အမှုသည်ကလည်း မပယ်။ တရားသူကြီးက သက်သေက ပယ်လို့မရ။ ဒီအတိုင်းကြည့်နေတာ နှင့် အမှုကြာပြီပေါ့။ အခုမှပြဌာန်းမှာလည်းမဟုတ်ပါဘူး ယခင် ပြည်သူ့တရားသူကြီးအဖွဲ့ ဥပဒေပုဒ်မ - ၇၇ မှာပြဌာန်းပေးဖူးပါတယ်။
--
မေး။ ။ ရုံးချိန်းကို နာရီနှင့်ပေးဖို့ဆိုတာကကောဆရာ။
ဖြေ။ ။ မနက် ၁၀ နာရီကတည်းက အမှုသည်မစုံလို့၊ သက်သေမလာလို့ ၊ ရှေ့နေမလာလို့ တစ်နေကုန်စောင့်ခိုင်းထားတာထက်စာရင် နာရီနှင့်ပေးလိုက်တော့ အမှုခေါ်ချိန်မရှိတာ နှင့် ကျင့်ထုံးမှာပါသည့် penalty ပြဌာန်းချက်တွေကို သုံးလုိ့ရပြီပေါ့။
ဘယ်အချိန်လာမှန်းမသိလုိ့ တစ်နေကုန်စောင့်ခိုင်းထားတာလည်း ပုံစံမကျပါဘူး။ မစောင့်ပြန်တော့လည်း အချိန်အတိအကျသတ်မှတ်မထားလို့ အမှုသည်က စောဒကတက်ပါလိမ့်မယ်။
ဒီအတိုင်းပါပဲ သက်သေလည်း သတ်မှတ်ချိန်မလာရင် ပျက်ကွက်တာပဲ ။ ၀ါရမ်းထုတ်ရုံပေါ့။
ရှေ့နေတွေဆိုလည်း အခြားအမှုရှိရင် နာရီရှောင်ချိန်းပြီး တစ်နေ့တည်း ၄/၅ မှု စစ်လို့ရတာပေါ့။ နောက်မို့ တစ်မှုတည်း ဘယ်အချိန်ခေါ်မလဲမသိလို့ အကြာကြီး စောင့်နေရရင် မဖြစ်သင့်ဘူးထင်လို့ပါ။
----
( ကျနော့် ဦးနှောက်သေးသေးလေးနှင့် စဉ်းစားကြည့်မိတာပါ။ အမြင်မတူတွေလည်း ရှိနိုင်ပါသည်။ ကောင်းစေချင်သည့် စေတနာဖြင့်သာဖြစ်ပါသည်။ ရိုသေစွာဖြင့်။)
